1 Ѿвѣща́ же є҆лїфа́зъ ѳемані́тинъ, глаго́лѧ:
2 є҆да̀ мно́жицею глаго́лано тѝ бы́сть въ трѹдѣ̀; тѧ́жести же глагѡ́лъ твои́хъ кто̀ стерпи́тъ;
3 а҆́ще бо ты̀ наѹчи́лъ є҆сѝ мнѡ́ги и҆ рѹ́цѣ немощны́хъ ѹ҆тѣ́шилъ є҆сѝ,
4 немѡщны́ѧ же воздви́глъ є҆сѝ словесы̀, колѣ́нѡмъ же немѡщны́мъ си́лѹ ѡ҆бложи́лъ є҆сѝ.
5 Нн҃ѣ же прїи́де на тѧ̀ болѣ́знь и҆ коснѹ́сѧ тебє̀, ты́ же возмѹти́лсѧ є҆сѝ.
6 Е҆да̀ стра́хъ тво́й є҆́сть не въ безѹ́мїи, и҆ наде́жда твоѧ̀ и҆ ѕло́ба пѹтѝ твоегѡ̀;
7 Помѧнѝ ѹ҆̀бо, кто̀ чи́стъ сы́й поги́бе; и҆лѝ когда̀ и҆́стиннїи всѝ и҆з̾ ко́рене погибо́ша;
8 ѩ҆́коже ви́дѣхъ ѡ҆рю́щихъ неподѡ́бнаѧ, сѣ́ющїи же ѧ҆̀ бѡлѣ́зни по́жнѹтъ себѣ̀,
9 ѿ повелѣ́нїѧ гд҇нѧ поги́бнѹтъ, ѿ дх҃а же гнѣ́ва є҆гѡ̀ и҆зче́знѹтъ.
10 Си́ла льво́ва, гла́съ же льви́цы, весе́лїе же ѕмїє́въ ѹ҆гасѐ:
11 мраволе́въ поги́бе, зане́же не и҆мѣ́ѧше бра́шна, скѵ́мни же львѡ́вы ѡ҆ста́виша дрѹ́гъ дрѹ́гѹ.
12 А҆́ще же глаго́лъ кі́й и҆́стиненъ бѣ̀ во словесѣ́хъ твои́хъ, ни ко́еже бы̀ ѿ си́хъ тѧ̀ срѣ́тило ѕло̀. не прїи́метъ ли ѹ҆́хо моѐ преди́вныхъ ѿ негѡ̀;
13 Стра́хомъ же и҆ гла́сомъ нощны́мъ, напа́дающь стра́хъ на человѣ́ки,
14 ѹ҆́жасъ же мѧ̀ срѣ́те и҆ тре́петъ, и҆ ѕѣлѡ̀ кѡ́сти моѧ҄ стрѧсѐ:
15 и҆ дѹ́хъ на лице́ ми на́йде: ѹ҆страши́шасѧ же мѝ власѝ и҆ плѡ́ти,
16 воста́хъ и҆ не разѹмѣ́хъ, ви́дѣхъ, и҆ не бѣ̀ ѡ҆бли́чїѧ пред̾ ѻ҆чи́ма мои́ма, но то́кмѡ дѹ́хъ ти́хъ и҆ гла́съ слы́шахъ:
17 что́ бо; є҆да̀ чи́стъ бѹ́детъ человѣ́къ пред̾ бг҃омъ; и҆лѝ въ дѣ́лѣхъ свои́хъ без̾ поро́ка мѹ́жъ;
18 а҆́ще рабѡ́мъ свои҄мъ не вѣ́рѹетъ, и҆ во а҆́гг҃лѣхъ свои́хъ стро́потно что̀ ѹ҆смотрѣ̀,
19 живѹ́щихъ же въ бре́нныхъ хра́минахъ, ѿ ни́хже и҆ мы̀ са́ми ѿ тогѡ́жде бре́нїѧ є҆смы̀, поразѝ, ѩ҆́коже мо́лїе,
20 и҆ ѿ ѹ҆́тра да́же до ве́чера ктомѹ̀ не сѹ́ть: зане́же не мого́ша себѣ̀ помощѝ, погибо́ша:
21 дхнѹ́ бо на нѧ̀, и҆ и҆зсхо́ша, и҆ поне́же не и҆мѣ́ѧхѹ премѹ́дрости, погибо́ша.
Нашли в тексте ошибку? Выделите её и нажмите:
Ctrl + Enter
Книга Иова, 4 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784