1 Ѿвѣща́въ же їѡвъ, речѐ:
2 вои́стиннѹ вѣ́мъ, ѩ҆́кѡ та́кѡ є҆́сть: ка́кѡ бо бѹ́детъ пра́веденъ человѣ́къ ѹ҆ гд҇а;
3 а҆́ще бо восхо́щетъ сѹди́тисѧ съ ни́мъ, не послѹ́шаетъ є҆гѡ̀, да не пререче́тъ ко є҆ди́номѹ словесѝ є҆гѡ̀ ѿ ты́сѧщи.
4 Премдръ бо є҆́сть мы́слїю, крѣ́покъ же и҆ вели́къ: кто̀ же́стокъ бы́въ проти́вѹ є҆гѡ̀, пребы́сть;
5 Ѡ҆бетша́ѧй го́ры, и҆ не вѣ́дѧтъ, превраща́ѧй ѧ҆̀ гнѣ́вомъ:
6 трѧсы́й поднебе́снѹю и҆з̾ ѡ҆снова́нїй, столпи́ же є҆ѧ̀ коле́блютсѧ:
7 гл҃ѧй со́лнцѹ, и҆ не восхо́дитъ, ѕвѣ́зды же печа́тствѹетъ:
8 простры́й є҆ди́нъ не́бо и҆ ходѧ́й но мо́рю, ѩ҆́кѡ по землѝ:
9 творѧ́й плїа҄ды и҆ є҆спе́ра, и҆ а҆рктѹ́ра и҆ сокрѡ́вища ю҆́жнаѧ:
10 творѧ́й вє́лїѧ и҆ неизслѣ́дѡваннаѧ, сла҄внаѧ же и҆ и҆зрѧ҄днаѧ, и҆̀мже нѣ́сть числа̀.
11 А҆́ще прїи́детъ ко мнѣ̀, не и҆́мамъ ви́дѣти: и҆ а҆́ще мимои́детъ менє̀, ника́кѡ ѹ҆разѹмѣ́хъ.
12 А҆́ще во́зметъ, кто̀ возврати́тъ; и҆лѝ кто̀ рече́тъ є҆мѹ̀: что̀ сотвори́лъ є҆сѝ;
13 Са́мъ бо ѿвраща́етъ гнѣ́въ, слѧко́шасѧ под̾ ни́мъ ки́ти поднебе́снїи.
14 А҆́ще же мѧ̀ ѹ҆слы́шитъ, и҆лѝ разсѹ́дитъ глаго́лы моѧ҄;
15 А҆́ще бо и҆ пра́веденъ бѹ́дѹ, не ѹ҆слы́шитъ менѐ, сѹдѹ̀ є҆гѡ̀ помолю́сѧ:
16 а҆́ще же воззовѹ̀, и҆ ѹ҆слы́шитъ мѧ̀, не и҆мѹ̀ вѣ́ры, ѩ҆́кѡ ѹ҆слы́ша гла́съ мо́й.
17 Да не мгло́ю мѧ̀ потреби́тъ, мнѡ́га же мѝ сотрє́нїѧ сотворѝ всѹ́е,
18 не ѡ҆ставлѧ́етъ бо мѧ̀ ѿдохнѹ́ти, и҆спо́лни же мѧ̀ го́рести.
19 Поне́же си́ленъ є҆́сть крѣ́постїю: кто̀ ѹ҆̀бо сѹдѹ̀ є҆гѡ̀ воспроти́витсѧ;
20 А҆́ще бо бѹ́дѹ пра́веденъ, ѹ҆ста̀ моѧ҄ нечє́стїѧ сотворѧ́тъ: а҆́ще же бѹ́дѹ непоро́ченъ, стро́потенъ бѹ́дѹ.
21 А҆́ще бо нече́стїе сотвори́хъ, не вѣ́мъ дѹше́ю мое́ю: ѻ҆ба́че ѿе́млетсѧ мѝ живо́тъ.
22 Тѣ́мже рѣ́хъ: вели́ка и҆ си́льна гѹби́тъ гнѣ́въ.
23 ѩ҆́кѡ лѹка́вїи сме́ртїю лю́тою поги́бнѹтъ, ѻ҆ба́че пра́вєднымъ посмѣва́ютсѧ.
24 Предана̀ є҆́сть землѧ̀ въ рѹ́цѣ нечести́вагѡ, ли́ца сѹді́й є҆ѧ̀ покрыва́етъ: а҆́ще же не са́мъ є҆́сть, кто̀ є҆́сть;
25 Житїе́ же моѐ є҆́сть легча́е скороте́чца: ѿбѣго́ша и҆ не ви́дѣша.
26 И҆лѝ є҆́сть кораблє́мъ слѣ́дъ пѹтѝ, и҆лѝ ѻ҆рла̀ летѧ́ща, и҆́щѹща ѩ҆́ди;
27 А҆́ще бо рекѹ̀: забѹ́дѹ глаго́лѧ, прини́кнѹвъ лице́мъ воздохнѹ̀,
28 трѧсѹ́сѧ всѣ́ми ѹ҆десы̀: вѣ́мъ бо, ѩ҆́кѡ не безви́нна мѧ̀ ѡ҆ста́виши.
29 А҆́ще же нечести́въ є҆́смь, почто̀ не ѹ҆мро́хъ;
30 А҆́ще бо и҆змы́юсѧ снѣ́гомъ и҆ ѡ҆чи́щѹсѧ рѹка́ми чи́стыми,
31 дово́лнѡ во скве́рнѣ ѡ҆мочи́лъ мѧ̀ є҆сѝ, возгнѹша́сѧ же мно́ю ѻ҆де́жда моѧ̀.
32 Нѣ́си бо человѣ́къ, ѩ҆́коже а҆́зъ, є҆мѹ́же противопрю́сѧ, да прїи́демъ вкѹ́пѣ на сѹ́дъ.
33 Ѽ, дабы̀ хода́тай на́мъ бы́лъ, и҆ ѡ҆блича́ѧй и҆ разслѹ́шаѧй междѹ̀ ѻ҆бѣ́ма.
34 Да ѿи́метъ ѿ менє̀ же́злъ, стра́хъ же є҆гѡ̀ да не смѹща́етъ менѐ:
35 и҆ не ѹ҆бою́сѧ, но возглаго́лю, и҆́бо та́кѡ не вѣ́мъ са́мъ себѐ.
Нашли в тексте ошибку? Выделите её и нажмите: Ctrl + Enter

Книга Иова, 9 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.