1 Е҆ще́ же приложи́въ їѡвъ, речѐ въ при́тчахъ:
2 кто́ мѧ ѹ҆стро́итъ по мц҇амъ пре́жднихъ дні́й, въ ни́хже мѧ̀ бг҃ъ хранѧ́ше,
3 ѩ҆́коже є҆гда̀ свѣтѧ́шесѧ свѣти́лникъ є҆гѡ̀ над̾ главо́ю мое́ю, є҆гда̀ свѣ́томъ є҆гѡ̀ хожда́хъ во тмѣ̀,
4 є҆гда̀ бѣ́хъ тѧ́жекъ въ пѹте́хъ, є҆гда̀ бг҃ъ посѣще́нїе творѧ́ше до́мѹ моемѹ̀,
5 є҆гда̀ бѣ́хъ бога́тъ ѕѣлѡ̀, ѡ҆́крестъ же менє̀ рабѝ,
6 є҆гда̀ ѡ҆блива́хѹсѧ пѹтїѐ моѝ ма́сломъ кра́вїимъ, го́ры же моѧ҄ ѡ҆блива́хѹсѧ млеко́мъ,
7 є҆гда̀ и҆схожда́хъ и҆з̾ѹ́тра во гра́дъ, на сто́гнахъ же поставлѧ́шесѧ мѝ престо́лъ;
8 Ви́дѧще мѧ̀ ю҆́нѡши скрыва́шасѧ, старѣ҄йшины же всѝ востава́ша:
9 вельмѡ́жи же престава́хѹ глаго́лати, пе́рстъ возло́жше на ѹ҆ста̀ своѧ҄.
10 Слы́шавшїи же блажи́ша мѧ̀, и҆ ѧ҆зы́къ и҆́хъ прильпѐ горта́ни и҆́хъ:
11 ѩ҆́кѡ ѹ҆́хо слы́ша и҆ ѹ҆блажи́ мѧ, ѻ҆́ко же ви́дѣвъ мѧ̀ ѹ҆клони́сѧ.
12 Спасо́хъ бо ѹ҆бо́гаго ѿ рѹкѝ си́льнагѡ, и҆ сиротѣ̀, є҆мѹ́же не бѣ̀ помо́щника, помого́хъ.
13 Благослове́нїе погиба́ющагѡ на мѧ̀ да прїи́детъ, ѹ҆ста́ же вдѡви́ча благослови́ша мѧ̀.
14 Въ пра́вдѹ же ѡ҆блача́хсѧ, ѡ҆дѣва́хсѧ же въ сѹ́дъ ѩ҆́кѡ въ ри́зѹ.
15 Ѻ҆́ко бѣ́хъ слѣпы҄мъ, нога́ же хромы́мъ:
16 а҆́зъ бы́хъ ѻ҆те́цъ немѡщны́мъ, ра́спрю же, є҆ѧ́же не вѣ́дѧхъ, и҆зслѣ́дихъ:
17 сотро́хъ же членѡ́вныѧ непра́ведныхъ, ѿ среды́ же зѹбѡ́въ и҆́хъ грабле́нїе и҆з̾ѧ́хъ.
18 Рѣ́хъ же: во́зрастъ мо́й состарѣ́етсѧ ѩ҆́коже стебло̀ фі́нїково, мнѡ́га лѣ҄та поживѹ̀.
19 Ко́рень разве́рзесѧ при водѣ̀, и҆ роса̀ пребѹ́детъ на жа́твѣ мое́й.
20 Сла́ва моѧ̀ но́ва со мно́ю, и҆ лѹ́къ мо́й въ рѹцѣ̀ мое́й по́йдетъ.
21 (Старѣ҄йшины) слы́шавшїи мѧ̀ внима́хѹ, молча́хѹ же ѡ҆ мое́мъ совѣ́тѣ.
22 Къ моемѹ̀ глаго́лѹ не прилага́хѹ, ра́довахѹсѧ же, є҆гда̀ къ ни҄мъ глаго́лахъ:
23 ѩ҆́коже землѧ̀ жа́ждѹщаѧ ѡ҆жида́етъ дождѧ̀, та́кѡ сі́и моегѡ̀ глаго́ланїѧ.
24 А҆́ще возсмѣю́сѧ къ ни҄мъ, не вѣ́риша: и҆ свѣ́тъ лица̀ моегѡ̀ не ѿпада́ше.
25 И҆збра́хъ пѹ́ть и҆́хъ, и҆ сѣдѣ́хъ кнѧ́зь, и҆ вселѧ́хсѧ ѩ҆́коже ца́рь посредѣ̀ хра́брыхъ, а҆́ки ѹ҆тѣша́ѧй печа́льныхъ.
Нашли в тексте ошибку? Выделите её и нажмите:
Ctrl + Enter
Книга Иова, 29 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784