1 И҆ ѹ҆молча̀ їѡвъ словесы̀. Ѹ҆молча́ша же и҆ трїѐ дрѹ́зїе є҆гѡ̀ ктомѹ̀ прерѣкова́ти їѡвѹ, бѣ̀ бо їѡвъ првднъ пред̾ ни́ми.
2 Разгнѣ́васѧ же є҆лїѹ́съ сы́нъ варахїи́левъ вѹзі́тѧнинъ, ѿ ѹ҆́жичества а҆ра́мска а҆ѵсїтїді́йскїѧ страны̀, разгнѣ́васѧ же на їѡва ѕѣлѡ̀, зане́же наречѐ себѐ првдна пред̾ бг҃омъ,
3 и҆ на трїе́хъ же дрѹгѡ́въ разгнѣ́васѧ ѕѣлѡ̀, ѩ҆́кѡ не возмого́ша ѿвѣща́ти проти́вѹ їѡвѹ и҆ сѹди́ша є҆го̀ бы́ти нечести́ва.
4 Е҆лїѹ́съ же терпѧ́ше да́ти ѿвѣ́тъ їѡвѹ, ѩ҆́кѡ старѣ́йшїи є҆гѡ̀ сѹ́ть де́ньми (дрѹ́зїе є҆гѡ̀).
5 И҆ ви́дѣ є҆лїѹ́съ, ѩ҆́кѡ нѣ́сть ѿвѣ́та во ѹ҆стѣ́хъ трїе́хъ мѹже́й, и҆ воз̾ѧри́сѧ гнѣ́вомъ свои́мъ.
6 Ѿвѣща́въ же є҆лїѹ́съ сы́нъ варахїи́левъ вѹзі́тѧнинъ, речѐ: ю҆нѣ́йшїй ѹ҆́бѡ є҆́смь лѣ́ты, вы́ же є҆стѐ старѣ́йшїи: тѣ́мже молча́хъ, ѹ҆боѧ́всѧ возвѣсти́ти ва́мъ хи́трость мою̀:
7 рѣ́хъ же: вре́мѧ є҆́сть глаго́лющее, и҆ во мно́зѣхъ лѣ́тѣхъ вѣ́дѧтъ премѹ́дрость,
8 но дѹ́хъ є҆́сть въ человѣ́цѣхъ, дыха́нїе же вседержи́телево є҆́сть наѹча́ющее:
9 не многолѣ́тнїи сѹ́ть премѹ́дри, нижѐ ста́рїи вѣ́дѧтъ сѹ́дъ:
10 тѣ́мже рѣ́хъ: послѹ́шайте менѐ, и҆ возвѣщѹ̀ ва́мъ, ѩ҆̀же вѣ́мъ, внѹши́те глаго́лы моѧ҄:
11 рекѹ́ бо ва́мъ послѹ́шающымъ, до́ндеже и҆спыта́ете словеса̀, и҆ да́же ва́съ ѹ҆разѹмѣ́ю,
12 и҆ сѐ, не бѣ̀ їѡва ѡ҆блича́ѧй, ѿвѣща́ѧй проти́внѡ глаго́лѡмъ є҆гѡ̀ ѿ ва́съ:
13 да не рече́те: ѡ҆брѣто́хомъ премѹ́дрость, гд҇еви приложи́вшесѧ:
14 человѣ́кѹ же попѹсти́сте глаго́лати такѡва́ѧ словеса̀:
15 ѹ҆жаснѹ́шасѧ, не ѿвѣща́ша ктомѹ̀, ѡ҆бетша́ша ѿ ни́хъ словеса̀:
16 терпѣ́хъ, не глаго́лахъ бо, ѩ҆́кѡ ста́ша, не ѿвѣща́ша, ѩ҆́кѡ да ѿвѣща́ю и҆ а҆́зъ ча́сть.
17 Ѿвѣща́ же є҆лїѹ́съ, глаго́лѧ:
18 па́ки возглаго́лю, и҆спо́лненъ бо є҆́смь слове́съ: ѹ҆бива́етъ бо мѧ̀ дѹ́хъ чре́ва:
19 чре́во же моѐ ѩ҆́кѡ мѣ́хъ мста̀ врѧ́ща завѧ́занъ, и҆лѝ ѩ҆́коже мѣ́хъ кова́ческїй расто́ргнѹтый:
20 возглаго́лю, да почі́ю, ѿве́рзъ ѹ҆ста̀:
21 человѣ́ка бо не постыждѹ́сѧ, но нижѐ бре́ннагѡ посрамлю́сѧ:
22 не вѣ́мъ бо чѹди́тисѧ лицѹ̀: а҆́ще же нѝ, то̀ и҆ менѐ мо́лїе и҆з̾ѧдѧ́тъ.
Нашли в тексте ошибку? Выделите её и нажмите:
Ctrl + Enter
Книга Иова, 32 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784