1 Е҆ще́ же приложи́въ їѡвъ, речѐ въ при́тчахъ:
2 жи́въ гд҇ь, и҆́же мѝ си́це сѹдѝ, и҆ вседержи́тель, и҆́же ѡ҆горчи́ ми дѹ́шѹ:
3 до́ндеже є҆щѐ дыха́нїе моѐ є҆́сть и҆ дх҃ъ бж҃їй сѹ́щїй въ но́здрехъ мои́хъ,
4 не возглаго́лютъ ѹ҆стнѣ̀ моѝ беззако́нїѧ, нижѐ дѹша̀ моѧ̀ поѹчи́тсѧ непра́вдѣ.
5 Не бѹ́ди мнѣ̀ правди́выми нарещѝ ва́съ, до́ндеже ѹ҆мрѹ̀: не и҆змѣню́ бо неѕло́бїѧ моегѡ̀.
6 Пра́вдѣ же внима́ѧ, не ѡ҆ста́влю є҆ѧ̀, не свѣ́мъ бо себѐ ѕлы́хъ содѣ́лавша.
7 Ѻ҆ба́че же, дабы̀ бы́ли вразѝ моѝ, ѩ҆́коже низвраще́нїе нечести́выхъ, и҆ востаю́щїи на мѧ̀, ѩ҆́коже па́гѹба пребеззако́нныхъ.
8 И҆ ка́ѧ бо є҆́сть наде́жда нечести́вомѹ, ѩ҆́кѡ ѡ҆жида́етъ; надѣ́ѧсѧ на гд҇а спасе́тсѧ ли;
9 и҆лѝ мольбѹ̀ є҆гѡ̀ ѹ҆слы́шитъ бг҃ъ; и҆лѝ наше́дшей є҆мѹ̀ бѣдѣ̀,
10 є҆да̀ и҆́мать ко́е дерзнове́нїе пред̾ ни́мъ; и҆лѝ ѩ҆́кѡ призва́вшѹ є҆мѹ̀, ѹ҆слы́шитъ ли є҆го̀;
11 Сегѡ̀ ра́ди возвѣщѹ̀ ва́мъ, что̀ є҆́сть въ рѹцѣ̀ гд҇ни, и҆, є҆́же є҆́сть ѹ҆ вседержи́телѧ, не солжѹ̀.
12 Сѐ, всѝ вѣ́сте, ѩ҆́кѡ тщє́тнаѧ ко тщє́тнымъ прилага́ете.
13 Сїѧ̀ ча́сть человѣ́ка нечести́вагѡ ѿ гд҇а: и҆ жре́бїй си́льныхъ прїи́детъ ѿ вседержи́телѧ на нѧ̀.
14 А҆́ще мно́зи бѹ́дѹтъ сы́нове и҆́хъ, на заколе́нїе бѹ́дѹтъ:а҆́ще же и҆ возмѹжа́ютъ, ни́щы бѹ́дѹтъ:
15 ѡ҆ста́вшїисѧ же є҆мѹ̀ сме́ртїю ѹ҆́мрѹтъ, и҆ вдови́цъ и҆́хъ никто́же поми́лѹетъ.
16 А҆́ще собере́тъ ѩ҆́коже зе́млю сребро̀, и҆ ѩ҆́коже бре́нїе ѹ҆гото́витъ зла́то,
17 сїѧ҄ всѧ҄ првднїи ѡ҆держа́тъ, и҆мѣ҄нїѧ же є҆гѡ̀ и҆́стиннїи во́змѹтъ:
18 бѹ́детъ же до́мъ є҆гѡ̀ ѩ҆́кѡ мо́лїе, и҆ ѩ҆́кѡ паѹчи́на, ѩ҆̀же снабдѣ̀.
19 Бога́тый ѹ҆́снетъ и҆ не приложи́тъ, ѻ҆́чи своѝ ѿве́рзе, и҆ нѣ́сть.
20 Ѡ҆быдо́ша є҆го̀ ѩ҆́коже вода̀ бѡлѣ́зни, но́щїю же ѩ҆́тъ є҆го̀ примра́къ.
21 Во́зметъ же є҆го̀ ва́ръ, и҆ ѿи́детъ, и҆ возвѣ́етъ є҆го̀ ѿ мѣ́ста є҆гѡ̀,
22 и҆ ве́ржетъ на него̀, и҆ не пощади́тъ, и҆з̾ рѹкѹ̀ є҆гѡ̀ бѣжа́нїемъ побѣжи́тъ:
23 воспле́щетъ на́нь рѹка́ма свои́ма и҆ съ шѹ́момъ во́зметъ є҆го̀ ѿ мѣ́ста своегѡ̀.
Нашли в тексте ошибку? Выделите её и нажмите:
Ctrl + Enter
Книга Иова, 27 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784