1 Ѿвѣща́въ же сѡфа́ръ мїне́йскїй, речѐ:
2 не та́кѡ мнѣ́хъ сїѧ҄ тебѣ̀ рещѝ проти́вѹ, и҆ не разѹмѣ́ете па́че не́жели и҆ а҆́зъ.
3 Наказа́нїе срамле́нїѧ моегѡ̀ ѹ҆слы́шѹ, и҆ дѹ́хъ ѿ ра́зѹма ѿвѣщава́етъ мѝ.
4 Е҆да̀ си́хъ не ѹ҆разѹмѣ́лъ є҆сѝ ѿ вѣ́ка, ѿне́лѣже положе́нъ человѣ́къ бы́сть на землѝ;
5 весе́лїе бо нечести́выхъ паде́нїе стра́шно, ѡ҆бра́дованїе же беззако́нныхъ па́гѹба.
6 А҆́ще взы́дѹтъ на не́бо да́ры є҆гѡ̀, же́ртва же є҆гѡ̀ ѡ҆блакѡ́въ ко́снетсѧ:
7 є҆гда́ бо мни́тсѧ ѹ҆жѐ ѹ҆твержде́нъ бы́ти, тогда̀ въ коне́цъ поги́бнетъ. ви́дѣвшїи же є҆го̀ рекѹ́тъ: гдѣ́ є҆сть;
8 ѩ҆́коже со́нъ ѿлетѣ́вый не ѡ҆брѧ́щетсѧ, ѿлетѣ́ же а҆́ки мечта́нїе нощно́е.
9 Ѻ҆́ко призрѣ̀, и҆ не приложи́тъ, и҆ ктомѹ̀ не позна́етъ є҆го̀ мѣ́сто є҆гѡ̀.
10 Сынѡ́въ є҆гѡ̀ да погѹбѧ́тъ ме́ншїи, и҆ рѹ́цѣ є҆гѡ̀ возжгѹ́тъ бѡлѣ́зни.
11 Кѡ́сти є҆гѡ̀ напо́лнишасѧ грѣхѡ́въ ю҆́ности є҆гѡ̀ и҆ съ ни́мъ на пе́рсти ѹ҆снѹ́тъ.
12 А҆́ще ѹ҆слади́тсѧ во ѹ҆стѣ́хъ є҆гѡ̀ ѕло́ба, скры́етъ ю҆̀ под̾ ѧ҆зы́комъ свои́мъ:
13 не пощади́тъ є҆ѧ̀, и҆ не ѡ҆ста́витъ є҆ѧ̀, и҆ собере́тъ ю҆̀ посредѣ̀ горта́ни своегѡ̀,
14 и҆ не возмо́жетъ помощѝ себѣ̀: же́лчь а҆́спїдѡвъ во чре́вѣ є҆гѡ̀.
15 Бога́тство непра́веднѡ собира́емо и҆зблюе́тсѧ, и҆з̾ хра́мины є҆гѡ̀ и҆звлече́тъ є҆го̀ а҆́гг҃лъ.
16 ѩ҆́рость же ѕмїе́вѹ да ссе́тъ, да ѹ҆бїе́тъ же є҆го̀ ѧ҆зы́къ ѕмїи́нъ.
17 Да не ѹ҆́зритъ ѿдое́нїѧ скотѡ́въ, нижѐ прибы́тка ме́да и҆ ма́сла кра́вїѧ.
18 Вотщѐ и҆ всѹ́е трѹди́сѧ, бога́тство, ѿ негѡ́же не вкѹ́ситъ, ѩ҆́коже кло́ки не сожва́ємы и҆ не поглоща́ємы.
19 Мно́гихъ бо немощны́хъ до́мы сокрѹшѝ, жили́ще же разгра́би и҆ не поста́ви.
20 Нѣ́сть спасе́нїѧ и҆мѣ́нїю є҆гѡ̀, въ вожделѣ́нїи свое́мъне спасе́тсѧ.
21 Нѣ́сть ѡ҆ста́нка бра́шнѹ є҆гѡ̀, сегѡ̀ ра́ди не процвѣтѹ́тъ є҆мѹ̀ блага҄ѧ.
22 Е҆гда́ же мни́тъ ѹ҆жѐ и҆спо́лнь бы́ти, ѡ҆скорби́тсѧ, всѧ́ка же бѣда̀ на́нь прїи́детъ.
23 А҆́ще ка́кѡ ли́бо и҆спо́лнитъ чре́во своѐ, напѹ́ститъ на́нь ѩ҆́рость гнѣ́ва, ѡ҆дожди́тъ на него̀ бѡлѣ́зни:
24 и҆ не спасе́тсѧ ѿ рѹкѝ желѣ́за, да ѹ҆стрѣли́тъ є҆го̀ лѹ́къ мѣ́дѧнъ,
25 и҆ да про́йдетъ сквозѣ̀ тѣ́ло є҆гѡ̀ стрѣла̀: ѕвѣ́зды же въ жили́щихъ є҆гѡ̀: да прїи́дѹтъ на́нь стра́си,
26 и҆ всѧ́ка тма̀ на не́мъ да пребѹ́детъ: да поѧ́стъ є҆го̀ ѻ҆́гнь нераздеже́ный, да ѡ҆ѕло́битъ же пришле́цъ до́мъ є҆гѡ̀:
27 и҆ да ѿкры́етъ не́бо беззакѡ́нїѧ є҆гѡ̀, и҆ землѧ̀ да воста́нетъ на́нь:
28 да и҆звлече́тъ до́мъ є҆гѡ̀ па́гѹба до конца̀, де́нь гнѣ́ва да прїи́детъ на́нь.
29 Сїѧ̀ ча́сть человѣ́ка нечести́вагѡ ѿ гд҇а и҆ стѧжа́нїе и҆мѣ́нїй є҆гѡ̀ ѿ надзира́телѧ.
Нашли в тексте ошибку? Выделите её и нажмите: Ctrl + Enter

Книга Иова, 20 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.