1 Ѿвѣща́въ же їѡвъ, речѐ:
2 вѣ́мъ ѹ҆̀бо, ѩ҆́кѡ и҆з̾ рѹкѝ моеѧ̀ ѡ҆бличе́нїе моѐ є҆́сть, и҆ рѹка̀ є҆гѡ̀ тѧжка̀ бы́сть па́че моегѡ̀ воздыха́нїѧ.
3 Кто̀ ѹ҆̀бо ѹ҆вѣ́сть, ѩ҆́кѡ ѡ҆брѧ́щѹ є҆го̀ и҆ прїидѹ̀ ко кончи́нѣ;
4 И҆ рекѹ̀ мо́й сѹ́дъ, ѹ҆ста́ же моѧ҄ и҆спо́лню ѡ҆бличе́нїѧ,
5 ѹ҆разѹмѣ́ю же и҆зцѣлє́нїѧ, ѩ҆̀же мѝ рече́тъ, и҆ ѡ҆щѹщѹ̀, что́ ми возвѣсти́тъ.
6 И҆ а҆́ще со мно́гою крѣ́постїю на́йдетъ на мѧ̀, посе́мъ же не воспрети́тъ мѝ.
7 И҆́стина бо и҆ ѡ҆бличе́нїе ѿ негѡ̀: да и҆зведе́тъ же въ коне́цъ сѹ́дъ мо́й.
8 А҆́ще бо во пе́рвыхъ пойдѹ̀, ктомѹ̀ нѣ́смь: въ послѣ́днихъ же, ка́кѡ вѣ́мъ є҆го̀;
9 ѡ҆шѹ́юю творѧ́щѹ є҆мѹ̀, и҆ не разѹмѣ́хъ: ѡ҆бложи́тъ ѡ҆деснѹ́ю, и҆ не ѹ҆зрю̀.
10 Вѣ́сть бо ѹ҆жѐ пѹ́ть мо́й, и҆скѹси́ же мѧ̀ ѩ҆́кѡ зла́то.
11 И҆зы́дѹ же въ за́повѣдехъ є҆гѡ̀, пѹти҄ бо є҆гѡ̀ сохрани́хъ, и҆ не ѹ҆клоню́сѧ ѿ за́повѣдїй є҆гѡ̀
12 и҆ не престѹплю̀, въ нѣ́дрѣхъ же мои́хъ сокры́хъ гл҃го́лы є҆гѡ̀.
13 А҆́ще же и҆ са́мъ сѹди́лъ та́кѡ, кто́ є҆сть рекі́й проти́вѹ є҆мѹ̀; са́мъ бо восхотѣ̀ и҆ сотворѝ.
14 Сегѡ̀ ра́ди ѡ҆ не́мъ тре́петенъ бы́хъ, наказѹ́емь же попеко́хсѧ ѡ҆ не́мъ:
15 сегѡ̀ ра́ди ѿ лица̀ є҆гѡ̀ потщѹ́сѧ, поѹчѹ́сѧ и҆ ѹ҆бою́сѧ ѿ негѡ̀.
16 И҆ гд҇ь ѹ҆мѧгчи́лъ се́рдце моѐ, и҆ вседержи́тель потща́сѧ ѡ҆ мнѣ̀:
17 не вѣ́дѣхъ бо, ѩ҆́кѡ на́йдетъ на мѧ̀ тма̀, пред̾ лице́мъ же мои́мъ покры́етъ мра́къ.
Нашли в тексте ошибку? Выделите её и нажмите:
Ctrl + Enter
Книга Иова, 23 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784