1 Ѿвѣща́въ же їѡвъ, речѐ:
2 ѹ҆́бѡ вы̀ ли є҆ди́ни є҆стѐ человѣ́цы, и҆лѝ съ ва́ми сконча́етсѧ премѹ́дрость;
3 И҆ ѹ҆ менє̀ се́рдце є҆́сть ѩ҆́коже и҆ ѹ҆ ва́съ.
4 Пра́веденъ бо мѹ́жъ и҆ непоро́ченъ бы́сть въ порѹга́нїе:
5 во вре́мѧ бо ѡ҆предѣле́ное ѹ҆гото́ванъ бы́сть па́сти ѿ и҆ны́хъ, до́мы же є҆гѡ̀ ѡ҆пѹстошє́ны бы́ти беззако́нными. ѻ҆ба́че никто́же да ѹ҆пова́етъ, лѹка́въ сы́й, непови́ненъ бы́ти,
6 є҆ли́цы разгнѣвлѧ́ютъ гд҇а, а҆́ки и҆ и҆стѧза́нїѧ и҆̀мъ не бѹ́детъ.
7 Но вопросѝ четвероно́гихъ, а҆́ще тѝ рекѹ́тъ, и҆ пти́цъ небе́сныхъ, а҆́ще тѝ возвѣстѧ́тъ:
8 повѣ́ждь землѝ, а҆́ще тѝ ска́жетъ, и҆ и҆сповѣ́дѧтъ тѝ ры҄бы мѡрскі́ѧ.
9 Кто̀ ѹ҆́бѡ не разѹмѣ̀ во всѣ́хъ си́хъ, ѩ҆́кѡ рѹка̀ гд҇нѧ сотворѝ сїѧ҄;
10 Не въ рѹцѣ́ ли є҆гѡ̀ дѹша̀ всѣ́хъ живѹ́щихъ и҆ дѹ́хъ всѧ́кагѡ человѣ́ка;
11 Ѹ҆́хо бо словеса̀ разсѹжда́етъ, горта́нь же бра҄шна вкѹша́етъ.
12 Во мно́зѣмъ вре́мени премѹ́дрость, во мно́зѣ же житїѝ вѣ́дѣнїе.
13 Ѹ҆ негѡ̀ премѹ́дрость и҆ си́ла, ѹ҆ тогѡ̀ совѣ́тъ и҆ ра́зѹмъ.
14 А҆́ще низложи́тъ, кто̀ сози́ждетъ; а҆́ще затвори́тъ ѿ человѣ́кѡвъ, кто̀ ѿве́рзетъ;
15 А҆́ще возбрани́тъ во́дѹ, и҆зсѹши́тъ зе́млю: а҆́ще же пѹ́ститъ, погѹби́тъ ю҆̀ преврати́въ.
16 Ѹ҆ негѡ̀ держа́ва и҆ крѣ́пость, ѹ҆ тогѡ̀ вѣ́дѣнїе и҆ ра́зѹмъ.
17 Проводѧ́й совѣ́тники плѣнє́ны, сѹдїи҄ же землѝ ѹ҆жасѝ:
18 посажда́ѧй цари҄ на престо́лѣхъ и҆ ѡ҆бвѧзѹ́ѧй по́ѧсомъ чрє́сла и҆́хъ:
19 ѿпѹща́ѧй жерцы̀ плѣ́нники, си́льныхъ же землѝ низвратѝ:
20 и҆змѣнѧ́ѧй ѹ҆стнѣ̀ вѣ́рныхъ, ра́зѹмъ же ста́рцєвъ ѹ҆разѹмѣ̀:
21 и҆злива́ѧй безче́стїе на кнѧ҄зи, смирє́нныѧ же и҆зцѣлѝ:
22 ѿкрыва́ѧй глѹбѡ́каѧ ѿ тмы̀, и҆зведе́ же на свѣ́тъ сѣ́нь сме́ртнѹю:
23 прельща́ѧй ѩ҆зы́ки и҆ погѹблѧ́ѧй и҆̀хъ, низлага́ѧй ѩ҆зы́ки и҆ наставлѧ́ѧй и҆̀хъ:
24 и҆змѣнѧ́ѧй сердца̀ кнѧзе́й земны́хъ, прельсти́ же и҆̀хъ на пѹтѝ, є҆гѡ́же не вѣ́дѧхѹ,
25 да ѡ҆сѧ́жѹтъ тмѹ̀, а҆ не свѣ́тъ, да заблѹ́дѧтъ же ѩ҆́кѡ пїѧ́ный.
Нашли в тексте ошибку? Выделите её и нажмите:
Ctrl + Enter
Книга Иова, 12 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784