1 Ѿвѣща́въ же валда́дъ саѵхе́йскїй, речѐ: доко́лѣ глаго́лати бѹ́деши сїѧ҄;
2 дѹ́хъ многоглаго́ливъ во ѹ҆стѣ́хъ твои́хъ.
3 Е҆да̀ гд҇ь ѡ҆би́дитъ сѹдѧ́й; и҆лѝ всѧ҄ сотвори́вый возмѧте́тъ пра́вдѹ;
4 А҆́ще сы́нове твоѝ согрѣши́ша пред̾ ни́мъ, посла̀ рѹ́кѹ на беззакѡ́нїѧ и҆́хъ:
5 ты́ же ѹ҆́тренюй ко гд҇ѹ вседержи́телю молѧ́сѧ:
6 а҆́ще чи́стъ є҆сѝ и҆ и҆́стиненъ, моли́твѹ твою̀ ѹ҆слы́шитъ, ѹ҆стро́итъ же тѝ па́ки житїѐ пра́вды:
7 бѹ́дѹтъ ѹ҆̀бо пє́рваѧ твоѧ҄ ма҄ла, послѣ҄днѧѧ же твоѧ҄ без̾ числа̀.
8 Вопроси́ бо ро́да пе́рваго, и҆зслѣ́ди же по ро́дѹ ѻ҆тцє́въ:
9 вчера́шни бо є҆смы̀ и҆ не вѣ́мы, сѣ́нь бо є҆́сть на́ше житїѐ на землѝ:
10 не сі́и ли наѹча́тъ тѧ̀ и҆ возвѣстѧ́тъ тѝ и҆ ѿ се́рдца и҆знесѹ́тъ словеса̀;
11 Е҆да̀ произни́четъ ро́гозъ без̾ воды̀, и҆лѝ расте́тъ си́тникъ без̾ напаѧ́нїѧ;
12 є҆щѐ сѹ́щѹ на ко́рени, и҆ не по́жнетсѧ ли; пре́жде напаѧ́нїѧ всѧ́кое бы́лїе не и҆зсыха́етъ ли;
13 та́кѡ ѹ҆̀бо бѹ́дѹтъ послѣ҄днѧѧ всѣ́хъ забыва́ющихъ гд҇а: наде́жда бо нечести́вагѡ поги́бнетъ:
14 не населе́нъ бо бѹ́детъ до́мъ є҆гѡ̀, паѹчи́на же сбѹ́детсѧ селе́нїе є҆гѡ̀.
15 А҆́ще подпре́тъ хра́минѹ свою̀, не ста́нетъ: є҆́мшѹсѧ же є҆мѹ̀ за ню̀, не пребѹ́детъ.
16 Вла́жный бо є҆́сть под̾ со́лнцемъ, и҆ ѿ тлѣ́нїѧ є҆гѡ̀ лѣ́торасль є҆гѡ̀ и҆зы́детъ:
17 на собра́нїи ка́менїѧ спи́тъ, посредѣ́ же креме́нїѧ поживе́тъ:
18 а҆́ще поглоти́тъ мѣ́сто, солже́тъ є҆мѹ̀, не ви́дѣлъ є҆сѝ такова҄ѧ,
19 ѩ҆́кѡ превраще́нїе нечести́вагѡ таково̀, и҆з̾ земли́ же и҆на́го произрасти́тъ.
20 Гд҇ь бо не ѿри́нетъ неѕло́бивагѡ: всѧ́кагѡ же да́ра ѿ нечести́вагѡ не прїи́метъ.
21 И҆́стиннымъ же ѹ҆ста̀ и҆спо́лнитъ смѣ́ха, ѹ҆стнѣ́ же и҆́хъ и҆сповѣ́данїѧ.
22 Врази́ же и҆́хъ ѡ҆блекѹ́тсѧ въ стѹ́дъ: жили́ще же нечести́вагѡ не бѹ́детъ.
Нашли в тексте ошибку? Выделите её и нажмите:
Ctrl + Enter
Книга Иова, 8 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784