1 Ѿвѣща́въ же їѡвъ, речѐ:
2 доко́лѣ притрѹ́днѹ творитѐ дѹ́шѹ мою̀ и҆ низлага́ете мѧ̀ словесы̀; ѹ҆разѹмѣ́йте то́кмѡ, ѩ҆́кѡ гд҇ь сотвори́ мѧ си́це.
3 Клеве́щете на мѧ̀, не стыдѧ́щесѧ менє̀ належите́ ми.
4 Бѹ́ди, ѩ҆́кѡ вои́стиннѹ а҆́зъ прельсти́хсѧ, и҆ ѹ҆ менє̀ водворѧ́етсѧ погрѣше́нїе, глаго́лати словеса̀, ѩ҆̀же не подоба́ше, словеса́ же моѧ҄ погрѣша́ютъ, и҆ не во вре́мѧ:
5 бѹ́ди же, ѩ҆́кѡ на мѧ̀ велича́етесѧ, наскака́ете же мѝ поноше́нїемъ:
6 разѹмѣ́йте ѹ҆̀бо, ѩ҆́кѡ гд҇ь є҆́сть и҆́же смѧте́ мѧ и҆ ѡ҆гра́дѹ свою̀ на мѧ̀ вознесѐ.
7 Сѐ, смѣю́сѧ поноше́нїю, не возглаго́лю: возопїю̀, и҆ нигдѣ́же сѹ́дъ.
8 Ѡ҆́крестъ ѡ҆гражде́нъ є҆́смь и҆ не могѹ̀ прейтѝ: пред̾ лице́мъ мои́мъ тмѹ̀ положѝ,
9 сла́вѹ же съ менє̀ совлечѐ и҆ ѿѧ̀ вѣне́цъ ѿ главы̀ моеѧ̀:
10 растерза́ мѧ ѡ҆́крестъ, и҆ ѿидо́хъ: посѣче́ же ѩ҆́кѡ дре́во наде́ждѹ мою̀.
11 Лю́тѣ же гнѣ́ва ѹ҆потребѝ на мѧ̀ и҆ возмнѣ́ мѧ ѩ҆́кѡ врага̀.
12 Вкѹ́пѣ же прїидо́ша и҆скѹшє́нїѧ є҆гѡ̀ на мѧ̀, на пѹте́хъ же мои́хъ ѡ҆быдо́ша мѧ̀ навѣ҄тницы.
13 Бра́тїѧ моѧ҄ ѿстѹпи́ша ѿ менє̀, позна́ша чѹжди́хъ па́че менє̀, и҆ дрѹ́зїе моѝ неми́лостиви бы́ша:
14 не снабдѣ́ша мѧ̀ бли́жнїи моѝ, и҆ вѣ́дѧщїи и҆́мѧ моѐ забы́ша мѧ̀.
15 Сосѣ́ди до́мѹ и҆ рабы҄ни моѧ҄, (ѩ҆́кѡ) и҆ноплеме́нникъ бы́хъ пред̾ ни́ми:
16 раба̀ моего̀ зва́хъ, и҆ не послѹ́ша, ѹ҆ста́ же моѧ҄ молѧ́хѹсѧ:
17 и҆ проси́хъ женѹ̀ мою̀, призыва́хъ же ласка́ѧ сы́ны подло́жницъ мои́хъ:
18 ѻ҆ни́ же менѐ въ вѣ́къ ѿри́нѹша, є҆гда̀ воста́нѹ, на мѧ̀ глаго́лютъ.
19 Гнѹша́хѹсѧ менє̀ ви́дѧщїи мѧ̀, и҆ и҆̀хже люби́хъ, воста́ша на мѧ̀.
20 Въ ко́жи мое́й согни́ша плѡ́ти моѧ҄, кѡ́сти же моѧ҄ въ зѹбѣ́хъ содержа́тсѧ.
21 Поми́лѹйте мѧ̀, поми́лѹйте мѧ̀, ѽ, дрѹ́зїе! рѹка́ бо гд҇нѧ коснѹ́вшаѧсѧ мѝ є҆́сть.
22 Почто́ мѧ го́ните ѩ҆́коже и҆ гд҇ь; ѿ пло́тей же мои́хъ не насыща́етесѧ;
23 Кто́ бо да́лъ бы, да напи́шѹтсѧ словеса̀ моѧ҄, и҆ положа́тсѧ ѡ҆́наѧ въ кни́зѣ во вѣ́къ;
24 и҆ на дщи́цѣ желѣ́знѣ и҆ ѻ҆́ловѣ, и҆лѝ на ка́менїихъ и҆зваѧ́ютсѧ;
25 Вѣ́мъ бо, ѩ҆́кѡ пр҇носѹ́щенъ є҆́сть, и҆́же и҆́мать и҆скѹпи́ти мѧ̀,
26 (и҆) на землѝ воскреси́ти ко́жѹ мою̀ терпѧ́щѹю сїѧ҄, ѿ гд҇а бо мѝ сїѧ҄ соверши́шасѧ,
27 ѩ҆̀же а҆́зъ въ себѣ̀ свѣ́мъ, ѩ҆̀же ѻ҆́чи моѝ ви́дѣста, а҆ не и҆́нъ: всѧ҄ же мѝ соверши́шасѧ въ нѣ́дрѣ.
28 А҆́ще же и҆ рече́те: что̀ рече́мъ проти́вѹ є҆мѹ̀; и҆ ко́рень словесѐ ѡ҆брѧ́щемъ въ не́мъ.
29 Ѹ҆бо́йтесѧ же и҆ вы̀ ѿ меча̀: ѩ҆́рость бо на беззакѡ́нныѧ на́йдетъ, и҆ тогда̀ ѹ҆ви́дѧтъ, гдѣ̀ є҆́сть и҆́хъ вещество̀.
Нашли в тексте ошибку? Выделите её и нажмите:
Ctrl + Enter
Книга Иова, 19 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784