1 Посе́мъ ѿве́рзе їѡвъ ѹ҆ста̀ своѧ҄ и҆ проклѧ̀ де́нь сво́й,
2 глаго́лѧ:
3 да поги́бнетъ де́нь, въ ѻ҆́ньже роди́хсѧ, и҆ но́щь ѻ҆́наѧ, въ ню́же рѣ́ша: сѐ, мѹ́жескъ по́лъ:
4 та̀ но́щь бѹ́ди тма̀, и҆ да не взы́щетъ є҆ѧ̀ гд҇ь свы́ше, нижѐ да прїи́детъ на ню̀ свѣ́тъ,
5 и҆ да прїи́метъ ю҆̀ тма̀ и҆ сѣ́нь сме́ртнаѧ, да прїи́детъ на ню̀ сѹмра́къ: про́клѧтъ бѹ́ди де́нь то́й
6 и҆ но́щь ѻ҆́наѧ: да пости́гнетъ ю҆̀ тма̀, да не бѹ́детъ во дне́хъ лѣ́та, нижѐ да вчи́слитсѧ во дне́хъ мц҇ей:
7 но но́щь ѻ҆́наѧ да бѹ́детъ болѣ́знь, и҆ да не прїи́детъ на ню̀ весе́лїе и҆ ра́дость,
8 но да проклене́тъ ю҆̀ проклина́ѧй то́й де́нь, и҆́же и҆́мать ѡ҆долѣ́ти вели́каго ки́та:
9 да поме́ркнѹтъ ѕвѣ́зды тоѧ̀ но́щи, да ѡ҆жида́етъ и҆ на свѣ́тъ да не прїи́детъ, и҆ да не ви́дитъ денни́цы возсїѧва́ющїѧ,
10 ѩ҆́кѡ не затворѝ вра́тъ чре́ва ма́тере моеѧ̀: ѿѧ́ла бо бы̀ болѣ́знь ѿ ѻ҆́чїю моє́ю:
11 почто́ бо во ѹ҆тро́бѣ не ѹ҆мро́хъ; и҆з̾ чре́ва же и҆зше́дъ, и҆ а҆́бїе не погибо́хъ;
12 почто́ же мѧ̀ прїѧ́ша на кѡлѣ́на; почто́ же сса́хъ сосца҄;
13 нн҃ѣ ѹ҆́бѡ ѹ҆снѹ́въ ѹ҆молча́лъ бы́хъ, ѹ҆снѹ́въ же почи́лъ бы́хъ
14 со царьмѝ и҆ совѣ҄тники землѝ, и҆̀же хвалѧ́хѹсѧ ѻ҆рѹ҄жїи,
15 и҆лѝ со кнѧ҄зи, и҆̀мже мно́гѡ зла́та, и҆̀же напо́лниша до́мы своѧ҄ сребра̀,
16 и҆лѝ ѩ҆́коже и҆́звергъ и҆зла́зѧй и҆з̾ ложе́снъ ма́тернихъ, и҆лѝ ѩ҆́коже младе́нцы, и҆̀же не ви́дѣша свѣ́та:
17 та́мѡ нечести́вїи ѹ҆толи́ша ѩ҆́рость гнѣ́ва, та́мѡ почи́ша претрѹжде́ннїи тѣ́ломъ,
18 вкѹ́пѣ же въ вѣ́цѣ се́мъ бы́вшїи не слы́шатъ гла́са собира́ющагѡ да́нь:
19 ма́лъ и҆ вели́къ та́мѡ є҆́сть, и҆ ра́бъ не боѧ́йсѧ господи́на своегѡ̀:
20 почто́ бо да́нъ є҆́сть сѹ́щымъ въ го́рести свѣ́тъ и҆ сѹ́щымъ въ болѣ́знехъ дѹша́мъ живо́тъ,
21 и҆̀же жела́ютъ сме́рти и҆ не полѹча́ютъ, и҆́щѹще ѩ҆́коже сокро́вища,
22 ѡ҆бра́довани же быва́ютъ, а҆́ще ѹ҆лѹча́тъ (сме́рть);
23 сме́рть бо мѹ́жѹ поко́й, є҆гѡ́же пѹ́ть сокрове́нъ є҆́сть, затвори́ бо бг҃ъ ѡ҆́крестъ є҆гѡ̀:
24 пре́жде бо бра́шенъ мои́хъ воздыха́нїе мѝ прихо́дитъ, слезю́ же а҆́зъ ѡ҆держи́мь стра́хомъ,
25 стра́хъ бо, є҆гѡ́же ѹ҆жаса́хсѧ, прїи́де мѝ, и҆ є҆гѡ́же боѧ́хсѧ, срѣ́те мѧ̀:
26 ни ѹ҆мири́хсѧ, нижѐ ѹ҆молча́хъ, нижѐ почи́хъ, и҆ на́йде мѝ гнѣ́въ.
Нашли в тексте ошибку? Выделите её и нажмите:
Ctrl + Enter
Книга Иова, 3 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784