1 Человѣ́къ бо рожде́нъ ѿ жены̀ малолѣ́тенъ и҆ и҆спо́лнь гнѣ́ва:
2 и҆лѝ ѩ҆́коже цвѣ́тъ процвѣты́й ѿпадѐ, ѿбѣже́ же ѩ҆́кѡ сѣ́нь, и҆ не постои́тъ.
3 Не и҆ ѡ҆ се́мъ ли сло́во сотвори́лъ є҆сѝ, и҆ семѹ̀ сотвори́лъ є҆сѝ вни́ти на сѹ́дъ пред̾ тѧ̀;
4 Кто́ бо чи́стъ бѹ́детъ ѿ скве́рны; никто́же,
5 а҆́ще и҆ є҆ди́нъ де́нь житїѐ є҆гѡ̀ на землѝ: и҆зочте́ни же мц҇ы є҆гѡ̀ ѿ тебє̀, на вре́мѧ положи́лъ є҆сѝ, и҆ не престѹ́питъ.
6 Ѿстѹпѝ ѿ негѡ̀, да ѹ҆мо́лкнетъ и҆ и҆збере́тъ житїѐ ѩ҆́коже нае́мникъ.
7 Е҆́сть бо дре́вѹ наде́жда: а҆́ще бо посѣ́чено бѹ́детъ, па́ки процвѣте́тъ, и҆ лѣ́торасль є҆гѡ̀ не ѡ҆скѹдѣ́етъ:
8 а҆́ще бо состарѣ́етсѧ въ землѝ ко́рень є҆гѡ̀, на ка́мени же сконча́етсѧ стебло̀ є҆гѡ̀,
9 ѿ вонѝ воды̀ процвѣте́тъ, сотвори́тъ же жа́твѹ, ѩ҆́коже новосажде́нное.
10 Мѹ́жъ же ѹ҆ме́рый ѿи́де, па́дъ же человѣ́къ, ктомѹ̀ нѣ́сть.
11 Вре́менемъ бо ѡ҆скѹдѣва́етъ мо́ре, рѣка́ же ѡ҆пѹстѣ́вши и҆́зсше:
12 человѣ́къ же ѹ҆снѹ́въ не воста́нетъ, до́ндеже не бѹ́детъ не́бо сошве́но, и҆ не возбѹдѧ́тсѧ ѿ сна̀ своегѡ̀.
13 Ѹ҆́бѡ, ѽ, дабы̀ во а҆́дѣ мѧ̀ сохрани́лъ є҆сѝ, скры́лъ же мѧ́ бы є҆сѝ, до́ндеже преста́нетъ гнѣ́въ тво́й, и҆ вчини́ши мѝ вре́мѧ, въ не́же па́мѧть сотвори́ши мѝ.
14 А҆́ще бо ѹ҆́мретъ человѣ́къ, жи́въ бѹ́детъ: сконча́въ дни҄ житїѧ̀ своегѡ̀, потерплю̀, до́ндеже па́ки бѹ́дѹ.
15 Посе́мъ воззове́ши, а҆́зъ же послѹ́шаю тѧ̀: дѣ́лъ же рѹкѹ̀ твоє́ю не ѿвраща́йсѧ:
16 и҆зчи́слилъ же є҆сѝ начина҄нїѧ моѧ҄, и҆ ничто́же тѧ̀ мимои́детъ ѿ грѣ҄хъ мои́хъ:
17 запечатлѣ́лъ же мѝ є҆сѝ беззакѡ́нїѧ въ мѣшцѣ̀, назна́меналъ же є҆сѝ, а҆́ще что̀ нево́лею престѹпи́хъ.
18 Ѻ҆ба́че и҆ гора̀ па́дающи распаде́тсѧ, и҆ ка́мень ѡ҆бетша́етъ ѿ мѣ́ста своегѡ̀:
19 ка́менїе ѡ҆гла́диша во́ды, и҆ потопи́ша во́ды взна́къ хо́лмы земны҄ѧ, и҆ ѡ҆жида́нїе человѣ́ческо погѹби́лъ є҆сѝ.
20 Ѿри́нѹлъ є҆сѝ є҆го̀ до конца̀, и҆ ѿи́де: и҆змѣни́лъ є҆сѝ є҆мѹ̀ лицѐ и҆ и҆спѹсти́лъ є҆сѝ.
21 Мнѡ́гимъ же бы́вшымъ сынѡ́мъ є҆гѡ̀, не вѣ́сть: а҆́ще же и҆ ма́лѡ и҆́хъ бѹ́детъ, не зна́етъ:
22 но плѡ́ти є҆гѡ̀ болѣ́ша, дѹша́ же є҆гѡ̀ ѡ҆ себѣ̀ сѣ́това.
Нашли в тексте ошибку? Выделите её и нажмите:
Ctrl + Enter
Книга Иова, 14 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784