1 Ѿвѣща́въ же їѡвъ, речѐ:
2 а҆́ще бы кто̀ вѣ́сѧ и҆звѣ́силъ гнѣ́въ мо́й, бѡлѣ́зни же моѧ҄ взѧ́лъ бы на мѣ́рило вкѹ́пѣ,
3 то̀ песка̀ морска́гѡ тѧжча́йшїи бы́ли бы: но, ѩ҆́коже мни́тсѧ, словеса̀ моѧ҄ ѕла҄ сѹ́ть.
4 Стрѣ́лы бо гд҇ни въ тѣ́лѣ мое́мъ сѹ́ть, и҆́хже ѩ҆́рость и҆спива́етъ кро́вь мою̀: є҆гда̀ начнѹ̀ глаго́лати, бодѹ́тъ мѧ̀.
5 Что́ бо; є҆да̀ вотщѐ возреве́тъ ди́вїй ѻ҆се́лъ, ра́звѣ бра҄шна просѧ̀; и҆лѝ возреве́тъ гла́сомъ во́лъ, въ ѩ҆́слехъ и҆мѣ́ѧй бра́шно;
6 Снѣ́стсѧ ли хлѣ́бъ без̾ со́ли; и҆лѝ є҆́сть вкѹ́съ во тщи́хъ словесѣ́хъ;
7 Не мо́жетъ бо ѹ҆тиши́тисѧ дѹша̀ моѧ̀: смра́дъ бо зрю̀ бра҄шна моѧ҄, ѩ҆́коже воню̀ льво́вѹ.
8 А҆́ще бо да́лъ бы, да прїи́детъ проше́нїе моѐ, и҆ наде́ждѹ мою̀ да́лъ бы гд҇ь.
9 Наче́нъ гд҇ь да ѹ҆ѧзвлѧ́етъ мѧ̀, до конца́ же да не ѹ҆бїе́тъ мѧ̀.
10 Бѹ́ди же мѝ гра́дъ гро́бъ, на є҆гѡ́же стѣна́хъ скака́хъ въ не́мъ: не пощажѹ̀: не солга́хъ бо во словесѣ́хъ ст҃ы́хъ бг҃а моегѡ̀.
11 Ка́ѧ бо крѣ́пость моѧ̀, ѩ҆́кѡ терплю̀; и҆лѝ ко́е мѝ вре́мѧ, ѩ҆́кѡ терпи́тъ моѧ̀ дѹша̀;
12 є҆да̀ крѣ́пость ка́менїѧ крѣ́пость моѧ̀; и҆лѝ плѡ́ти моѧ҄ сѹ́ть мѣ҄дѧны;
13 и҆лѝ не ѹ҆пова́хъ на него̀; по́мощь же ѿ менє̀ ѿстѹпѝ,
14 ѿрече́сѧ ѿ менє̀ ми́лость, посѣще́нїе же гд҇не презрѣ́ мѧ.
15 Не воззрѣ́ша на мѧ̀ бли́жнїи моѝ: ѩ҆́коже пото́къ ѡ҆скѹдѣва́ѧй, и҆лѝ ѩ҆́коже вѡ́лны преидо́ша мѧ̀:
16 и҆̀же менє̀ боѧ́хѹсѧ, нн҃ѣ нападо́ша на мѧ̀:
17 ѩ҆́коже снѣ́гъ и҆лѝ ле́дъ сме́рзлый, є҆гда̀ и҆ста́етъ теплотѣ̀ бы́вшей, не ктомѹ̀ познава́етсѧ, что̀ бѣ̀:
18 та́кѡ и҆ а҆́зъ ѡ҆ста́вленъ є҆́смь ѿ всѣ́хъ, погибо́хъ же и҆ бездо́мокъ бы́хъ:
19 ви́дите пѹти҄ ѳема҄нскїѧ, на стєзѝ савѡ҄нскїѧ смотрѧ́щїи,
20 и҆ стѹда̀ и҆спо́лнени бѹ́дѹтъ на гра́ды и҆ на и҆мѣ҄нїѧ надѣ́ющїисѧ.
21 Нн҃ѣ же и҆ вы̀ наидо́сте на мѧ̀ неми́лостивнѡ: ѹ҆̀бо ви́дѣвше мо́й стрѹ́пъ ѹ҆бо́йтесѧ.
22 Что́ бо; є҆да̀ что̀ ѹ҆ ва́съ проси́хъ, и҆лѝ ва́шеѧ крѣ́пости тре́бѹю,
23 да спасе́те мѧ̀ ѿ врагѡ́въ, и҆лѝ и҆з̾ рѹкѝ си́льныхъ и҆зба́вите мѧ̀;
24 Наѹчи́те мѧ̀, а҆́зъ же ѹ҆молчѹ̀: а҆́ще что̀ погрѣши́хъ, скажи́те мѝ.
25 Но, ѩ҆́коже мни́тсѧ, ѕла҄ (сѹ́ть) мѹ́жа и҆́стиннагѡ словеса̀, не ѿ ва́съ бо крѣ́пости прошѹ̀:
26 нижѐ ѡ҆бличе́нїе ва́ше словесы̀ мѧ̀ ѹ҆толи́тъ, ниже́ бо вѣща́нїѧ ва́шегѡ слове́съ стерплю̀.
27 Ѻ҆ба́че ѩ҆́кѡ на си́ра напа́даете, наска́чете же на дрѹ́га ва́шего.
28 Нн҃ѣ же воззрѣ́въ на ли́ца ва҄ша, не солжѹ̀.
29 Сѧ́дите нн҃ѣ, и҆ да не бѹ́детъ непра́ведно, и҆ па́ки ко пра́ведномѹ сни́дитесѧ.
30 И҆́бо нѣ́сть въ ѧ҆зы́цѣ мое́мъ непра́вды, и҆ горта́нь мо́йне ра́зѹмѹ ли поѹча́етсѧ;
Нашли в тексте ошибку? Выделите её и нажмите:
Ctrl + Enter
Книга Иова, 6 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784