1 Блаже́нъ мѹ́жъ, и҆́же не поползнѹ́сѧ ѹ҆стна́ма свои́ма и҆ не ѹ҆ѧзви́сѧ печа́лїю грѣха̀.
2 Блаже́нъ, є҆мѹ́же не зазрѣ̀ дѹша̀ є҆гѡ̀, и҆ и҆́же не спадѐ ѿ наде́жды своеѧ̀.
3 Мѹ́жеви скѹпо́мѹ не лѣ́по є҆́сть бога́тство, и҆ человѣ́кѹ зави́дливѹ на что̀ и҆мѣ́нїе;
4 Собира́ѧй ѿ дѹшѝ своеѧ̀ и҆нѣ҄мъ собира́етъ, и҆ во благи́хъ є҆гѡ̀ и҆ні́и насладѧ́тсѧ.
5 И҆́же себѣ̀ ѕо́лъ, комѹ̀ до́бръ бѹ́детъ; и҆ не возвесели́тсѧ во и҆мѣ́нїи свое́мъ.
6 Зави́дѧщагѡ себѣ̀ самомѹ̀ нѣ́сть ѕлѣ́йша: и҆ сїѐ воздаѧ́нїе ѕло́бы є҆гѡ̀.
7 А҆́ще и҆ добро̀ твори́тъ, въ забы́тїи твори́тъ и҆ на послѣ́докъ и҆з̾ѧви́тъ ѕло́бѹ свою̀.
8 Лѹка́въ (є҆́сть) зави́дѧй ѻ҆́комъ, ѿвраща́ѧй лицѐ и҆ презира́ѧй дѹ́шы.
9 Ѻ҆́ко лихои́мца не насыща́етсѧ ча́сти, и҆ ѡ҆би́да лѹка́вагѡ и҆зсѹша́етъ дѹ́шѹ.
10 Ѻ҆́ко лѹка́во зави́дливо и҆ ѡ҆ хлѣ́бѣ, и҆ на трапе́зѣ свое́й скѹ́дно.
11 Ча́до, ѩ҆́коже и҆́маши, добро̀ творѝ себѣ̀, и҆ приношє́нїѧ гд҇еви досто́йнѡ приносѝ:
12 помѧнѝ, ѩ҆́кѡ сме́рть не заме́длитъ, и҆ завѣ́тъ а҆́довъ не пока́занъ тѝ бы́сть.
13 Пре́жде не́же ѹ҆́мреши ты̀, добро̀ творѝ дрѹ́гѹ и҆ по си́лѣ твое́й прострѝ и҆ да́ждь є҆мѹ̀.
14 Не лиши́сѧ ѿ днѐ добра̀, и҆ ча́сть жела́нїѧ бла́га да не пре́йдетъ тебѐ.
15 Не и҆нѣ҄мъ ли ѡ҆ста́виши притѧжа҄нїѧ твоѧ҄ и҆ трѹды̀ твоѧ҄, въ раздѣле́нїе жре́бїѧ;
16 Да́ждь и҆ возмѝ, и҆ ѡ҆свѧтѝ дѹ́шѹ твою̀:
17 ѩ҆́кѡ нѣ́сть во а҆́дѣ взыска́ти сла́дости.
18 Всѧ́ка пло́ть ѩ҆́кѡ ри́за ѡ҆бетша́етъ, завѣ́тъ бо ѿ вѣ́ка: сме́ртїю ѹ҆́мреши.
19 ѩ҆́кѡ ли́стъ расплоща́ѧсѧ на дре́вѣ ча́стѣ, ѻ҆́въ ѹ҆́бѡ спа́даетъ, дрѹгі́й же прозѧба́етъ: та́кожде и҆ ро́дъ пло́ти и҆ кро́ви, ѻ҆́въ ѹ҆́бѡ ѹ҆мира́етъ, ѻ҆́въ же роди́тсѧ.
20 Всѧ́кое дѣ́ло гнїю́щее и҆зчеза́етъ, и҆ дѣ́лаѧй є҆̀ съ ни́мъ ѿи́детъ.
21 Блаже́нъ мѹ́жъ, и҆́же во премѹ́дрости ѹ҆́мретъ и҆ и҆́же въ ра́зѹмѣ свое́мъ поѹча́етсѧ ст҃ы́ни:
22 размышлѧ́ѧй пѹти҄ є҆ѧ̀ въ се́рдцы свое́мъ, и҆ въ сокрове́нныхъ є҆ѧ̀ ѹ҆разѹми́тсѧ.
23 И҆зы́ди в̾слѣ́дъ є҆ѧ̀ ѩ҆́кѡ и҆зслѣ́дникъ и҆ на пѹте́хъ є҆ѧ̀ присѣдѝ.
24 Приница́ѧй сквозѣ̀ ѻ҆кѡ́нца є҆ѧ̀ и҆ при две́рехъ є҆ѧ̀ послѹ́шаетъ.
25 Ѡ҆бита́ѧй бли́з̾ до́мѹ є҆ѧ̀ и҆ вбїе́тъ ко́лъ въ стѣ́ны є҆ѧ̀, поста́витъ ски́нїю свою̀ вскра́й є҆ѧ̀ и҆ ѡ҆бита́ти бѹ́детъ во ѡ҆би́тели благи́хъ,
26 положи́тъ ча҄да своѧ҄ въ покро́вѣ є҆ѧ̀ и҆ под̾ вѣ́твьми є҆ѧ̀ водвори́тсѧ,
27 покры́етсѧ є҆́ю ѿ зно́ѧ и҆ во сла́вѣ є҆ѧ̀ ѡ҆бита́ти бѹ́детъ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 14 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784