1 Восхва́лимъ ѹ҆́бѡ мѹ́жы сла҄вны и҆ ѻ҆тцы̀ на́шѧ въ бытїѝ.
2 Мно́гѹ сла́вѹ созда̀ гд҇ь въ ни́хъ вели́чїемъ свои́мъ ѿ вѣ́ка.
3 Госпо́дствѹюще во ца́рствїихъ свои́хъ и҆ мѹ́жїе и҆мени́ти си́лою, совѣ́тѹюще ра́зѹмомъ свои́мъ, провѣща́вшїи во про҇ро́чествахъ,
4 старѣ҄йшины люді́й въ совѣ́тѣхъ и҆ въ ра́зѹмѣ писа҄нїѧ люді́й:
5 премѹ҄драѧ словеса̀ въ наказа́нїи и҆́хъ, и҆́щѹще гла́са мѹсїкі́йска и҆ повѣ́дающе пѡ́вѣсти во писа́нїихъ:
6 мѹ́жїе бога́тїи, ѡ҆бдарова́ни крѣ́постїю, ми́рнѡ живѹ́ще въ жили́щихъ свои́хъ.
7 Всѝ сі́и въ ро́дѣхъ просла́влени бы́ша, и҆ во дне́хъ и҆́хъ похвала̀.
8 Сѹ́ть ѿ ни́хъ, и҆́же ѡ҆ста́виша и҆́мѧ, є҆́же повѣ́дати хвалы҄: и҆ сѹ́ть, и҆́хже нѣ́сть па́мѧти, и҆ погибо́ша ѩ҆́кѡ не сѹ́щїи, и҆ бы́ша ѩ҆́кѡ не бы́вше, и҆ ча҄да и҆́хъ по ни́хъ.
9 Но сі́и мѹ́жїе ми́лостивїи, и҆́хже пра҄вды не забвє́ны бы́ша:
10 съ сѣ́менемъ и҆́хъ пребѹ́детъ до́брое наслѣ́дїе, и҆зча҄дїѧ и҆́хъ въ завѣ́тѣхъ:
11 ѡ҆ста́сѧ сѣ́мѧ и҆́хъ, и҆ ча҄да и҆́хъ по ни́хъ:
12 до вѣ́ка пребѹ́детъ сѣ́мѧ и҆́хъ, и҆ сла́ва и҆́хъ не потреби́тсѧ:
13 тѣлеса̀ и҆́хъ въ ми́рѣ погребє́на бы́ша, а҆ и҆мена̀ и҆́хъ живѹ́тъ въ ро́ды.
14 Премѹ́дрость и҆́хъ повѣ́дѧтъ лю́дїе, и҆ похвалѹ̀ и҆́хъ и҆сповѣ́сть цр҃ковь.
15 Е҆нѡ́хъ ѹ҆годѝ гд҇еви и҆ преложи́сѧ, ѡ҆́бразъ покаѧ́нїѧ родѡ́мъ.
16 Нѡ́е ѡ҆брѣ́тесѧ соверше́нъ, пра́веденъ, во вре́мѧ гнѣ́ва бы́сть примире́нїе:
17 сегѡ̀ ра́ди бы́сть ѡ҆ста́нокъ землѝ, є҆гда̀ бѧ́ше пото́пъ.
18 Завѣ́ты вѣ́чнїи положе́ни бы́ша съ ни́мъ, да не потреби́тсѧ пото́помъ всѧ́ка пло́ть.
19 А҆враа́мъ вели́кїй ѻ҆те́цъ мно́жествѹ ѩ҆зы́кѡвъ, и҆ не ѡ҆брѣ́тесѧ подо́бный во сла́вѣ є҆гѡ̀:
20 и҆́же соблюдѐ зако́нъ вы́шнѧгѡ и҆ бы́сть въ завѣ́тѣ съ ни́мъ:
21 и҆ на пло́ти є҆гѡ̀ ѹ҆ста́ви завѣ́тъ и҆ во и҆скѹше́нїи ѡ҆брѣ́тесѧ вѣ́ренъ:
22 сегѡ̀ ра́ди клѧ́твою поста́ви съ ни́мъ благослови́тисѧ ѩ҆зы́кѡмъ ѡ҆ сѣ́мени є҆гѡ̀,
23 ѹ҆мно́жити є҆го̀ ѩ҆́кѡ пе́рсть землѝ, и҆ ѩ҆́кѡ ѕвѣ́зды возвы́сити сѣ́мѧ є҆гѡ̀, и҆ наслѣ́дити и҆̀мъ ѿ мо́рѧ до мо́рѧ и҆ ѿ рѣкѝ до кра́ѧ землѝ.
24 И҆ ѡ҆ ї҆саа́цѣ ѹ҆твердѝ си́це а҆враа́ма ра́ди ѻ҆тца̀ є҆гѡ̀ благослове́нїе всѣ́хъ человѣ́кѡвъ и҆ завѣ́тъ:
25 и҆ почѝ на главѣ̀ ї҆а́кѡвли.
26 Позна̀ є҆го̀ блг҇вє́нїи свои́ми и҆ дадѐ є҆го̀ въ наслѣ́дїе, и҆ раздѣлѝ ча҄сти є҆гѡ̀ на колѣ́нъ двана́десѧть,
27 и҆ и҆зведѐ ѿ негѡ̀ мѹ́жа ми́лости, ѡ҆брѣ́тшаго благода́ть пред̾ ѻ҆чесы̀ всѧ́кїѧ пло́ти.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 44 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784