1 Каса́ѧйсѧ смолѣ̀ ѡ҆черни́тсѧ, и҆ приѡбща́ѧйсѧ го́рдомѹ то́ченъ є҆мѹ̀ бѹ́детъ.
2 Бре́мене па́че себє̀ не воздви́жи, и҆ крѣ́пльшѹ и҆ богатѣ́йшѹ себє̀ не приѡбща́йсѧ.
3 Ко́е прича́стїе горнцѹ̀ съ котло́мъ; се́й прирази́тсѧ, и҆ то́й сокрѹши́тсѧ.
4 Бога́тый ѡ҆би́дѹ сотворѝ, и҆ са́мъ приразгнѣ́васѧ: ни́щїй же ѡ҆би́димь бы́сть, и҆ са́мъ приѹмо́литсѧ.
5 А҆́ще потре́бенъ бѹ́деши, ѹ҆потреблѧ́етъ тѧ̀: а҆́ще же лише́нъ бѹ́деши, ѡ҆ста́витъ тѧ̀.
6 А҆́ще и҆́маши, поживе́тъ съ тобо́ю и҆ и҆стощи́тъ тѧ̀, са́мъ же не поболи́тъ.
7 А҆́ще востре́бѹетъ тѧ̀, прельсти́тъ тѧ̀ и҆ возсмѣе́ттисѧ и҆ да́стъ тѝ наде́ждѹ, возглаго́летъ тѝ до́брѣ
8 и҆ рече́тъ тѝ: є҆́сть ли тѝ что̀ потре́бно; и҆ посрами́тъ тѧ̀ бра́шномъ свои́мъ, до́ндеже и҆стощи́тъ тѧ̀ два́щи и҆лѝ три́щи, и҆ на послѣ́докъ порѹга́еттисѧ.
9 Пото́мъ ѹ҆́зритъ тѧ̀ и҆ ѡ҆ста́витъ тѧ̀ и҆ главо́ю свое́ю покива́етъ на тѧ̀.
10 Внима́й, да не заблѹди́ши
11 и҆ да не смири́шисѧ во весе́лїи твое́мъ.
12 Е҆гда́ тѧ̀ си́льный призове́тъ, ѿстѹпа́й, и҆ толи́кѡ па́че призове́тъ тѧ̀.
13 Не приближа́йсѧ, да не ѿринове́нъ бѹ́деши, и҆ не сто́й ѿдале́че, да не забве́нъ бѹ́деши.
14 Не належѝ бесѣ́довати съ ни́мъ и҆ не вѣ́рѹй мно́жайшымъ словесє́мъ є҆гѡ̀: мно́гою бо бесѣ́дою и҆скѹ́ситъ тѧ̀ и҆ ѩ҆́кѡ смѣѧ́сѧ и҆спыта́етъ та҄йнаѧ твоѧ҄.
15 Неми́лостивъ є҆́сть не соблюда́ѧй слове́съ и҆ не пощади́тъ (ѡ҆сла́бити) ѡ҆ѕлобле́нїѧ твоегѡ̀ и҆ ѹ҆́зъ.
16 Блюди́сѧ и҆ внима́й ѕѣлѡ̀, ѩ҆́кѡ съ паде́нїемъ твои́мъ хо́диши:
17 слы́шай сїѧ҄ во снѣ̀ твое́мъ, бо́дрствѹй.
18 Во все́мъ житїѝ любѝ гд҇а и҆ призыва́й є҆го̀ во спасе́нїе твоѐ.
19 Всѧ́ко живо́тно лю́битъ подо́бное себѣ̀, и҆ всѧ́къ человѣ́къ и҆́скреннѧго своего̀:
20 всѧ́ка пло́ть по ро́дѹ собира́етсѧ, и҆ подо́бномѹ себѣ̀ прилѣпи́тсѧ мѹ́жъ.
21 Ко́е ѻ҆бще́нїе во́лкѹ со а҆́гнцемъ; та́кѡ грѣ́шникѹ со благочести́вымъ.
22 Кі́й ми́ръ гѷе́нѣ со псо́мъ; и҆ кі́й ми́ръ бога́томѹ со ѹ҆бо́гимъ;
23 Ло́въ львѡ́въ ѻ҆на́гри въ пѹсты́ни, та́кожде па҄жити бога҄тымъ ѹ҆бо́зїи.
24 Ме́рзость го́рдомѹ смире́нїе, си́це ме́рзость бога́томѹ ни́щїй.
25 Бога́тъ коле́блѧйсѧ подтвержда́етсѧ ѿ дрѹгѡ́въ: ѹ҆бо́гїй же пады́й ѿрѣ́ѧнъ бѹ́детъ ѿ дрѹгѡ́въ.
26 Бога́тѹ поползнѹ́вшѹсѧ мно́зи застѹ҄пницы, возглаго́ла нелѣ҄паѧ, и҆ ѡ҆правда́ша є҆го̀:
27 ѹ҆бо́гїй поползнѹ́сѧ, и҆ воспрети́ша є҆мѹ̀, провѣща̀ ра́зѹмъ, и҆ не да́ша є҆мѹ̀ мѣ́ста.
28 Бога́тый возглаго́ла, и҆ всѝ ѹ҆молча́ша и҆ сло́во є҆гѡ̀ вознесо́ша да́же до ѡ҆́блакъ:
29 ѹ҆бо́гїй возглаго́ла, и҆ рѣ́ша: кто̀ се́й є҆́сть; и҆ а҆́ще преткне́тсѧ, низвратѧ́тъ є҆го̀.
30 Добро̀ є҆́сть бога́тство, въ не́мже нѣ́сть грѣха̀, и҆ ѕла̀ є҆́сть нищета̀ во ѹ҆стѣ́хъ нечести́вагѡ.
31 Се́рдце человѣ́ческо и҆змѣнѧ́етъ лицѐ є҆гѡ̀, и҆лѝ на добро̀ и҆лѝ на ѕло̀.
32 Слѣ́дъ се́рдца во благи́хъ лицѐ ве́селое, и҆ и҆з̾ѡбрѣ́тенїе при́тчей размышле́нїе со трѹдо́мъ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 13 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784