1 Сі́мѡнъ сы́нъ ѻ҆ні́инъ ї҆ере́й вели́кїй, и҆́же въ животѣ̀ свое́мъ состро́и до́мъ и҆ во дни҄ своѧ҄ ѹ҆твердѝ це́рковь.
2 И҆ тѣ́мъ ѡ҆снована̀ бы́сть высота̀ сѹгѹ́ба, воздвиже́нїе высо́ко ѡ҆гражде́нїѧ церко́внагѡ.
3 Во дни҄ є҆гѡ̀ ѹ҆ма́лишасѧ сосѹ́ди водні́и, ро́въ ѩ҆́кѡ мо́рѧ ѡ҆крѹже́нїе.
4 Блюды́й лю́ди своѧ҄ ѿ паде́нїѧ и҆ ѹ҆крѣпи́вый гра́дъ во ѡ҆бсѣде́нїи.
5 Ко́ль просла́вленъ бы́сть въ сожи́телствѣ люді́й, во и҆схо́дѣ до́мѹ катапета́смы;
6 ѩ҆́кѡ ѕвѣзда̀ ѹ҆́треннѧѧ посредѣ̀ ѡ҆блакѡ́въ, а҆́ки лѹна̀ полна̀ во дне́хъ свои́хъ,
7 ѩ҆́кѡ со́лнце сїѧ́ющее на це́рковь вы́шнѧгѡ, и҆ а҆́ки дѹга̀ свѣтѧ́щаѧсѧ на ѡ҆́блацѣхъ сла́вы:
8 ѩ҆́кѡ цвѣ́тъ ши́пкѡвъ во дне́хъ весе́нныхъ, ѩ҆́кѡ крі́нъ при и҆схо́дищихъ воды̀, ѩ҆́кѡ стебло̀ лїва́ново во дне́хъ жа́твы:
9 ѩ҆́кѡ ѻ҆́гнь и҆ лїва́нъ на ѻ҆гни́щи,
10 ѩ҆́коже сосѹ́дъ зла́тъ и҆ско́ванъ, ѹ҆кра́шенъ всѧ́кимъ ка́менїемъ многоцѣ́ннымъ,
11 ѩ҆́кѡ ма́слина и҆зносѧ́щаѧ плоды̀ и҆ ѩ҆́кѡ кѷпарі́съ возраста́ѧй до ѡ҆́блакъ.
12 Внегда̀ взима́ти є҆мѹ̀ ѻ҆де́ждѹ сла́вы и҆ ѡ҆блача́тисѧ є҆мѹ̀ въ соверше́нїе хвале́нїѧ, въ восхожде́нїи ѻ҆лтарѧ̀ ст҃а́гѡ просла́ви ѻ҆де́ждѹ ст҃ы́ни.
13 Внегда́ же прїима́ти ча҄сти ѿ рѹ́къ ї҆ере́йскихъ, и҆ то́й стоѧ́ше при ѻ҆гни́щи ѻ҆лтарѧ̀:
14 ѡ҆́крестъ є҆гѡ̀ вѣне́цъ бра́тїи, ѩ҆́кѡ прозѧбе́нїе ке́дрско въ лїва́нѣ, и҆ ѡ҆крѹжи́ша є҆го̀ ѩ҆́кѡ сте́блїе фі́нїково:
15 и҆ всѝ сы́нове а҆арѡ҄ни во сла́вѣ свое́й, и҆ приноше́нїе гд҇не въ рѹка́хъ и҆́хъ пред̾ всѣ́мъ собо́ромъ ї҆и҃левымъ.
16 И҆ соверше́нїе слѹжи́телей на ѻ҆лтаре́хъ, є҆́же ѹ҆краси́ти приноше́нїе вы́шнѧгѡ вседержи́телѧ,
17 прострѐ на ча́шѹ возлїѧ́нїѧ рѹ́кѹ свою̀, и҆згнетѐ ѿ кро́ве гро́здныѧ, возлїѧ̀ на ѡ҆снова́нїе ѻ҆лтарѧ̀ въ воню̀ благоѹха́нїѧ вы́шнемѹ всѣ́хъ цр҃е́ви.
18 Тогда̀ возопи́ша сы́нове а҆арѡ҄ни, трѹба́ми ко́ваными вострѹби́ша, ѹ҆слы́шанъ сотвори́ша гла́съ вели́къ на па́мѧть пред̾ вы́шнимъ.
19 Тогда̀ всѝ лю́дїе ѻ҆́бще приспѣ́ша и҆ падо́ша ни́цы на землѝ поклони́тисѧ гд҇еви своемѹ̀ вседержи́телю бг҃ѹ вы́шнемѹ:
20 и҆ восхвали́ша пѣвцы̀ гла҄сы свои́ми, въ вели́цѣмъ гла́сѣ ѹ҆слади́сѧ пѣ́нїе:
21 и҆ помоли́шасѧ лю́дїе гд҇ѹ вы́шнемѹ моли́твою пред̾ мл҇тивымъ, до́ндеже соверши́сѧ красота̀ гд҇нѧ, и҆ слѹ́жбѹ свою̀ сконча́ша.
22 Тогда̀ соше́дъ воздви́же рѹ́ки своѧ҄ на ве́сь собо́ръ сынѡ́въ ї҆и҃левыхъ, да́ти бл҃гослове́нїе гд҇еви ѿ ѹ҆сте́нъ свои́хъ и҆ и҆́менемъ є҆гѡ̀ похвали́тисѧ.
23 И҆ повторѝ поклоне́нїе прїѧ́ти блг҇ве́нїе ѿ вы́шнѧгѡ.
24 И҆ нн҃ѣ благослове́нїе бг҃а всѣ́хъ, вє́лїѧ творѧ́щагѡ є҆ди́нагѡ всю́дѹ, возносѧ́щагѡ дни҄ на́шѧ ѿ ложе́снъ и҆ творѧ́щагѡ съ на́ми по мл҇ти свое́й:
25 да да́стъ на́мъ весе́лїе се́рдца, и҆ да бѹ́детъ ми́ръ во дни҄ на́шѧ во ї҆и҃ли ѩ҆́коже дни҄ вѣ́ка:
26 да ѹ҆вѣ́ритъ съ на́ми мл҇ть свою̀ и҆ во дни҄ своѧ҄ и҆зба́витъ ны̀.
27 Два̀ ѩ҆зы҄ка ѡ҆мерзѣ́ста дѹшѝ мое́й, а҆ тре́тїй нѣ́сть ѩ҆зы́къ:
28 сѣдѧ́щїи на горѣ̀ самарі́йстѣй и҆ фѷлїсті́млѧне, и҆ лю́дїе бѹ́и живѹ́щїи въ сїкі́мѣхъ.
29 Наказа́нїе ра́зѹма и҆ вѣ́дѣнїѧ начерта̀ въ кни́зѣ се́й ї҆исѹ́съ сы́нъ сїра́ховъ, ї҆ер҇ли́млѧнинъ, и҆́же ѡ҆дождѝ премѹ́дрость ѿ се́рдца своегѡ̀.
30 Блаже́нъ, и҆́же въ си́хъ поживе́тъ, и҆ и҆́же ѧ҆̀ положи́тъ въ се́рдцы свое́мъ, ѹ҆премѹ́дритсѧ.
31 А҆́ще бо сотвори́тъ сїѧ҄, ко всѣ҄мъ ѹ҆крѣпи́тсѧ, ѩ҆́кѡ свѣ́тъ гд҇ень слѣ́дъ є҆гѡ̀.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 50 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784