1 Не ревнѹ́й женѣ̀ нѣ́дра твоегѡ̀, нижѐ наѹчѝ на тебѐ самаго̀ ѹ҆че́нїю лѹка́вѹ.
2 Не да́ждь женѣ̀ дѹшѝ твоеѧ̀, є҆́же превзы́ти є҆́й над̾ крѣ́пость твою̀.
3 Не срѣта́й жены̀ блѹдни́цы, да не ка́кѡ впаде́ши въ сѣ҄ти є҆ѧ̀.
4 Къ спѣва́ющей не примѣша́йсѧ, да не ка́кѡ ѹ҆вѧ́знеши въ начина́нїихъ є҆ѧ̀.
5 Дѣ́вы не назира́й, да не когда̀ соблазни́шисѧ въ красотѣ̀ є҆ѧ̀.
6 Не да́ждь блѹдни́цамъ дѹшѝ твоеѧ̀, да не погѹби́ши наслѣ́дїѧ твоегѡ̀.
7 Не ѡ҆бзира́й сто́гнъ гра́да и҆ въ пѹсты́хъ є҆гѡ̀ не заблѹжда́й.
8 Ѿвратѝ ѻ҆́ко твоѐ ѿ жены̀ кра́сныѧ и҆ не назира́й чѹжды́ѧ добро́ты:
9 добро́тою же́нскою мно́зи прельсти́шасѧ, и҆ ѿ сеѧ̀ по́хоть ѩ҆́кѡ ѻ҆́гнь разгара́етсѧ.
10 Съ мѹжа́тицею ѿню́дъ не сѣдѝ и҆ не ме́дли съ не́ю въ вїнѣ̀:
11 да не когда̀ приклони́тсѧ дѹша̀ твоѧ̀ на ню̀, и҆ дѹ́хомъ твои́мъ поползне́шисѧ въ па́гѹбѹ.
12 Не ѡ҆ставлѧ́й дрѹ́га ста́рагѡ, но́вый бо нѣ́сть то́ченъ є҆мѹ̀:
13 вїно̀ но́вое дрѹ́гъ но́въ: а҆́ще ѡ҆бетша́етъ, съ весе́лїемъ и҆спїе́ши є҆го̀.
14 Не ревнѹ́й сла́вѣ грѣ́шника: не вѣ́си бо, ко́е бѹ́детъ превраще́нїе є҆гѡ̀.
15 Не соизво́ли и҆зволе́нїємъ нечести́выхъ: помѧнѝ, ѩ҆́кѡ да́же до а҆́да не ѡ҆правдѧ́тсѧ.
16 Дале́че ѿстѹпѝ ѿ человѣ́ка, и҆́же и҆́мать вла́сть ѹ҆бива́ти, и҆ не ѹ҆бои́шисѧ стра́ха сме́ртна:
17 и҆ а҆́ще пристѹ́пиши, не согрѣша́й, да не ѿи́метъ живота̀ твоегѡ̀:
18 познава́й, ѩ҆́кѡ посредѣ̀ сѣ́тей минѹ́еши и҆ по забра́лѡмъ гра́да хо́диши.
19 По крѣ́пости твое́й разсмотрѧ́й и҆́скреннѧго и҆ со премѹ́дрыми совѣ́тѹй.
20 Съ разѹми́выми бѹ́ди размышле́нїе твоѐ, и҆ всѧ̀ по́вѣсть твоѧ̀ въ зако́нѣ вы́шнѧгѡ.
21 Мѹ́жїе првднїи да вечерѧ́ютъ съ тобо́ю, и҆ во стра́сѣ гд҇ни бѹ́ди хвала̀ твоѧ̀.
22 Ѿ рѹкѝ хѹдо́жникѡвъ дѣ́ло похвале́но быва́етъ, и҆ во́ждь люді́й премѹ́дръ въ словесѝ свое́мъ.
23 Стра́шенъ во гра́дѣ свое́мъ мѹ́жъ ѧ҆зы́ченъ, и҆ де́рзый въ словесѝ свое́мъ возненави́дѣнъ бѹ́детъ.
Нашли в тексте ошибку? Выделите её и нажмите: Ctrl + Enter

Книга Премудрости Иисуса, сына Сирахова, 9 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.