1 Ча́до, живота̀ ни́щагѡ не лишѝ и҆ не ѿвраща́й ѻ҆че́съ ѿ просѧ́щагѡ,
2 дѹшѝ а҆́лчѹщїѧ не ѡ҆скорбѝ и҆ не разгнѣ́вай мѹ́жа въ нищетѣ̀ є҆гѡ̀,
3 се́рдца раздраже́нагѡ не превозмѹтѝ и҆ не продолжа́й даѧ́нїѧ тре́бѹющемѹ,
4 раба̀ скорбѧ́ща не ѿрѣ́й и҆ не ѿвратѝ лица̀ твоегѡ̀ ѿ ни́щагѡ,
5 ѿ тре́бѹющагѡ не ѿвратѝ ѻ҆че́съ и҆ не да́ждь мѣ́ста человѣ́кѹ клѧ́ти тѧ̀:
6 кленѹ́щагѡ бо тѧ̀ въ го́рести дѹшѝ своеѧ̀ мольбѹ̀ ѹ҆слы́шитъ сотвори́вый є҆го̀.
7 Прїѧ́тна собо́рищѹ творѝ себѐ и҆ кнѧ́зю смирѧ́й главѹ̀ твою̀,
8 приклонѝ ѹ҆́хо твоѐ къ ни́щемѹ и҆ ѿвѣща́й є҆мѹ̀ ми҄рнаѧ въ кро́тости,
9 и҆змѝ ѡ҆би́димаго и҆з̾ рѹкѝ ѡ҆би́дѧщаго и҆ не малодѹ́шествѹй, є҆гда̀ сѹ́диши,
10 бѹ́ди си҄рымъ ѩ҆́кѡ ѻ҆те́цъ и҆ вмѣ́стѡ мѹ́жа ма́тери и҆́хъ:
11 и҆ бѹ́деши ѩ҆́кѡ сы́нъ вы́шнѧгѡ, и҆ возлю́битъ тѧ̀ па́че не́же ма́ти твоѧ̀.
12 Премѹ́дрость сы́ны своѧ҄ вознесѐ и҆ застѹпа́етъ и҆́щѹщихъ є҆ѧ̀:
13 любѧ́й ю҆̀ лю́битъ жи́знь, и҆ ѹ҆́тренюющїи къ не́й и҆спо́лнѧтсѧ весе́лїѧ:
14 держа́йсѧ є҆ѧ̀ наслѣ́дитъ сла́вѹ, и҆ и҆дѣ́же вхо́дитъ, блг҇ви́тъ є҆го̀ гд҇ь:
15 слѹжа́щїи є҆́й послѹ́жатъ ст҃о́мѹ, и҆ лю́бѧщихъ ю҆̀ лю́битъ гд҇ь:
16 слѹ́шаѧй є҆ѧ̀ сѹди́ти и҆́мать ѩ҆зы́ки, и҆ внима́ѧй є҆́й всели́тсѧ надѣ́ѧвсѧ.
17 А҆́ще ѹ҆вѣ́рѹеши, наслѣ́диши ю҆̀, и҆ во ѡ҆держа́нїи бѹ́дѹтъ ро́ды є҆гѡ̀:
18 ѩ҆́кѡ стро́потнѡ хо́дитъ съ ни́мъ въ пе́рвыхъ, боѧ́знь же и҆ стра́хъ наведе́тъ на́нь
19 и҆ помѹ́читъ є҆го̀ въ наказа́нїи свое́мъ, до́ндеже вѣ́рѹ и҆́метъ дѹшѝ є҆гѡ̀ и҆ и҆скѹ́ситъ є҆го̀ во ѡ҆правда́нїихъ свои́хъ,
20 и҆ па́ки возврати́тсѧ прѧ́мѡ къ немѹ̀ и҆ возвесели́тъ є҆го̀
21 и҆ ѿкры́етъ є҆мѹ̀ та҄йны своѧ҄:
22 а҆́ще заблѹ́дитъ, ѡ҆ста́витъ є҆го̀ и҆ преда́стъ є҆го̀ въ рѹ́цѣ паде́нїѧ є҆гѡ̀.
23 Блюдѝ вре́мѧ и҆ храни́сѧ ѿ лѹка́вагѡ,
24 и҆ ѡ҆ дѹшѝ твое́й не постыди́сѧ:
25 є҆́сть бо сты́дъ наводѧ́й грѣ́хъ, и҆ є҆́сть сты́дъ сла́ва и҆ благода́ть.
26 Не прїимѝ лица̀ на дѹ́шѹ твою̀ и҆ не срамлѧ́йсѧ ѡ҆ паде́нїи твое́мъ.
27 Не возбранѝ словесѐ во вре́мѧ спасе́нїѧ:
28 въ словеси́ бо позна́на бѹ́детъ премѹ́дрость, и҆ наказа́нїе въ глаго́лѣхъ ѧ҆зы́ка.
29 Не прерѣка́й проти́вѹ и҆́стины и҆ ѡ҆ ненаказа́нїи твое́мъ срамлѧ́йсѧ:
30 не стыди́сѧ и҆сповѣ́дати грѣхѝ твоѧ҄ и҆ не воспѧща́й быстрины̀ рѣчны́ѧ.
31 И҆ не подстели́сѧ мѹ́жѹ бѹ́ю и҆ не ѡ҆бини́сѧ лица̀ си́льнагѡ.
32 Да́же до сме́рти подвиза́йсѧ ѡ҆ и҆́стинѣ, и҆ гд҇ь бг҃ъ побо́ретъ по тебѣ̀.
33 Не бѹ́ди ско́ръ ѧ҆зы́комъ твои́мъ, лѣни́въ же и҆ сла́бъ въ дѣ́лѣхъ твои́хъ.
34 Не бѹ́ди ѩ҆́кѡ ле́въ въ домѹ̀ твое́мъ и҆ жестоконеи́стовъ въ рабѣ́хъ твои́хъ.
35 Не бѹ́ди рѹка̀ твоѧ̀ просте́рта на взѧ́тїе, а҆ на ѿдаѧ́нїе согбе́на.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 4 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784