1 Не стыди́сѧ ѡ҆ си́хъ и҆ не прїимѝ лица̀, є҆́же согрѣша́ти:
2 ѡ҆ зако́нѣ вы́шнѧгѡ и҆ завѣ́тѣ, и҆ ѡ҆ сѹдѣ̀, є҆́же ѡ҆правда́ти нечести́ваго,
3 ѡ҆ словесѝ соѻбщника и҆ ѡ҆ пѹ́тницѣхъ, и҆ ѡ҆ даѧ́нїи наслѣ́дїѧ дрѹгѡ́въ,
4 ѡ҆ и҆́стинѣ мѣ́рила и҆ вѣ́сѡвъ, ѡ҆ стѧжа́нїи мно́гихъ и҆ ма́лыхъ,
5 ѡ҆ разли́чїи продаѧ́нїѧ кѹпцє́въ и҆ ѡ҆ наказа́нїи мно́зѣ ча҄дъ, и҆ є҆́же рабѹ̀ лѹка́вѹ ре́бра ѡ҆крова́вити.
6 На женѣ̀ лѹка́вѣ добро̀ (є҆́сть) печа́ть, и҆ и҆дѣ́же мнѡ́ги рѹ́ки, затворѝ.
7 Е҆́же а҆́ще преда́си, въ число̀ и҆ мѣ́рѹ, да́ждь и҆ возмѝ всѐ писа́нїемъ.
8 Ѡ҆ наказа́нїи неразѹ́мива и҆ бѹ́ѧгѡ, и҆ престарѣ́лагѡ сѹдѧ́щагѡсѧ съ ю҆́ными, и҆ бѹ́деши нака́занъ и҆́стиннѡ и҆ и҆скѹше́нъ пред̾ всѧ́кимъ живѹ́щимъ.
9 Дще́рь ѻ҆тцѹ̀ сокрове́нно бдѣ́нїе, и҆ попече́нїе ѡ҆ не́й ѿгонѧ́етъ со́нъ: во ю҆́ности свое́й да не когда̀ презрѣ́етъ и҆ сожи́телствѹющи (съ мѹ́жемъ), да не когда̀ возненави́дѣна бѹ́детъ:
10 въ дѣ́вствѣ да не когда̀ ѡ҆скверни́тсѧ и҆ во ѻ҆́тчихъ є҆ѧ̀ непра́здна бѹ́детъ, и҆ съ мѹ́жемъ сѹ́щи да не когда̀ престѹ́питъ и҆ сожи́телствѹющи да не когда̀ непло́ды бѹ́детъ.
11 Над̾ дще́рїю безстѹ́дною ѹ҆твердѝ стра́жѹ, да не когда̀ сотвори́тъ тѧ̀ ѡ҆бра́дованїе врагѡ́мъ, бесѣ́дѹ во гра́дѣ и҆ ѿлѹче́наго ѿ люді́й, и҆ посрами́тъ тѧ̀ въ наро́дѣ мно́зѣ.
12 Не взира́й на добро́тѹ всѧ́кагѡ человѣ́ка и҆ посредѣ̀ же́нъ не сѣдѝ:
13 ѿ ри́зъ бо и҆схо́дитъ мо́лїе, и҆ ѿ жены̀ лѹка́вство же́нское.
14 Лѹ́чше ѕло́ба мѹ́жеска, не́жели добродѣ́телнаѧ жена̀, и҆ жена̀ посрамлѧ́ющаѧ въ поноше́нїе.
15 Помѧнѹ̀ ѹ҆̀бо дѣла̀ гд҇нѧ, и҆ ѩ҆̀же ви́дѣхъ, повѣ́мъ: во словесѣ́хъ гд҇нихъ дѣла̀ є҆гѡ̀:
16 со́лнце просвѣща́ѧ на всѧ҄ призрѣ̀, и҆ сла́вы є҆гѡ̀ и҆спо́лнено дѣ́ло є҆гѡ̀.
17 Не сотворѝ ли ст҃ы҄мъ гд҇ь повѣ́дати всѧ҄ чѹдеса̀ є҆гѡ̀, ѩ҆̀же ѹ҆твердѝ гд҇ь вседержи́тель, ѹ҆тверди́тисѧ всемѹ̀ во сла́вѣ є҆гѡ̀;
18 Бе́зднѹ и҆ се́рдце и҆зслѣ́дова и҆ въ кова́рствѣхъ и҆́хъ размы́сли: разѹмѣ̀ бо гд҇ь всѧ́ко вѣ́дѣнїе и҆ призрѣ̀ на зна́менїе вѣ́ка,
19 возвѣща́ѧ мимошє́дшаѧ и҆ бѹ҄дѹщаѧ и҆ ѿкрыва́ѧ слѣды̀ та́йныхъ:
20 не пре́йде є҆гѡ̀ всѧ́ко помышле́нїе, не ѹ҆таи́сѧ ѿ негѡ̀ ни є҆ди́но сло́во.
21 Вели҄чїѧ премѹ́дрости своеѧ̀ ѹ҆красѝ: и҆́же є҆́сть пре́жде вѣ́ка и҆ во вѣ́къ,
22 ни приложи́сѧ, ни ѹ҆ма́лисѧ и҆ не востре́бова ни є҆ди́нагѡ совѣ́тника.
23 Ко́ль всѧ҄ дѣла̀ є҆гѡ̀ вожделѣ҄нна, и҆ да́же до и҆́скры є҆́сть ви́дѣти.
24 Всѧ҄ сїѧ҄ живѹ́тъ и҆ пребыва́ютъ во вѣ́къ во всѣ́хъ тре́бованїихъ, и҆ всѧ҄ послѹ́шаютъ.
25 Всѧ҄ сѹгѹ҄ба, є҆ди́но проти́вѹ є҆ди́нагѡ: и҆ не сотворѝ ничто́же скѹ́дно.
26 Е҆ди́но ѿ є҆ди́нагѡ ѹ҆твердѝ блага҄ѧ: и҆ кто̀ насы́титсѧ, зрѧ̀ сла́вѹ є҆гѡ̀;
Нашли в тексте ошибку? Выделите её и нажмите: Ctrl + Enter

Книга Премудрости Иисуса, сына Сирахова, 42 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.