1 Бдѣ́нїе бога́тства растлева́етъ плѡ́ти, и҆ попече́нїе є҆гѡ̀ ѿго́нитъ со́нъ:
2 печа́ль бдѣ́нїѧ ѿторга́етъ дрема́нїе, и҆ недѹ́гъ лю́тъ ѿима́етъ со́нъ.
3 Трѹди́тсѧ бога́тый въ собира́нїи бога́тства и҆ въ поко́и насыща́етсѧ сла́достей свои́хъ:
4 трѹди́тсѧ ѹ҆бо́гїй во ѹ҆мале́нїи житїѧ̀, и҆ въ поко́и скѹ́дный быва́етъ.
5 Любѧ́й зла́то не ѡ҆правди́тсѧ, и҆ гонѧ́й растлѣ́нїе си́мъ насы́титсѧ.
6 Мно́зи падо́ша зла́та ра́ди, и҆ бы́сть па́гѹба и҆́хъ прѧ́мѡ лицѹ̀ и҆́хъ.
7 Дре́во претыка́нїѧ є҆́сть всѣ҄мъ жрѹ́щымъ є҆мѹ̀, и҆ всѧ́къ безѹ́мливъ ѩ҆́тъ бѹ́детъ и҆́мъ.
8 Блаже́нъ бога́тый, и҆́же ѡ҆брѣ́тесѧ без̾ поро́ка и҆ и҆́же в̾слѣ́дъ зла́та не и҆́де.
9 Кто̀ є҆́сть се́й; и҆ ѹ҆блажи́мъ є҆го̀, сотвори́ бо ди҄внаѧ въ лю́дехъ свои́хъ.
10 Кто̀ и҆скѹше́нъ и҆́мъ и҆ соверше́нъ бы́сть; и҆ бѹ́детъ на похвале́нїе.
11 Кто̀ мо́глъ престѹпи́ти, и҆ не престѹпѝ, и҆ ѕло̀ сотвори́ти, и҆ не сотворѝ;
12 Ѹ҆твердѧ́тсѧ блага҄ѧ є҆гѡ̀, и҆ ми́лѡстыни є҆гѡ̀ и҆сповѣ́сть собра́нїе.
13 Сѣ́лъ ли є҆сѝ при трапе́зѣ вели́цѣй, не разве́рзи на не́й горта́ни твоегѡ̀
14 и҆ не рцы̀: мно́гѡ на не́й є҆́сть. Помѧнѝ, ѩ҆́кѡ ѕло̀ є҆́сть ѻ҆́ко лѹка́во.
15 Лѹка́внѣе ѻ҆́ка что̀ є҆́сть со́здано; сегѡ̀ ра́ди ѡ҆ ко́ей либо ве́щи слези́тъ.
16 И҆дѣ́же а҆́ще ѹ҆́зриши, не простира́й рѹкѝ и҆ не гнѣти́сѧ съ ни́мъ въ соли́ло.
17 Разсѹжда́й, ѩ҆̀же сѹ́ть и҆́скреннѧгѡ, ѿ тебє̀ сама́гѡ, и҆ ѡ҆ всѧ́цѣй ве́щи размышлѧ́й.
18 ѩ҆́ждь ѩ҆́кѡ человѣ́къ предлежа́щее тѝ и҆ не пресыща́йсѧ, да не возненави́дѣнъ бѹ́деши.
19 Преста́ни пе́рвый ра́ди наказа́нїѧ и҆ не пресыща́йсѧ, да не преткне́шисѧ:
20 и҆ а҆́ще сѧ́деши посредѣ̀ мно́гихъ, пе́рвѣе и҆́хъ не прострѝ рѹкѝ твоеѧ̀.
21 Ко́ль дово́лно человѣ́кѹ нака́занномѹ ма́лое, и҆ на ѻ҆дрѣ̀ свое́мъ не постра́ждетъ ѕла̀.
22 Со́нъ здра́вый ѿ чре́ва ѹ҆мѣ́ренна: воста̀ заѹ́тра, и҆ дѹша̀ є҆гѡ̀ съ ни́мъ:
23 трѹ́дъ бдѣ́нїѧ и҆ холе́ра и҆ чревоболѣ́нїе съ мѹ́жемъ ненасы́тнымъ.
24 И҆ а҆́ще ѡ҆тѧготи́лсѧ є҆сѝ бра́шны, воста́ни ѿ трапе́зы и҆ почі́еши.
25 Послѹ́шай менѐ, ча́до, и҆ не ѹ҆ничижѝ менѐ, и҆ на послѣ́докъ ѡ҆брѧ́щеши словеса̀ моѧ҄.
26 Во всѣ́хъ дѣ́лѣхъ твои́хъ бѹ́ди тща́теленъ, и҆ всѧ́къ недѹ́гъ не и҆́мать пристѹпи́ти къ тебѣ̀.
27 Ще́драго хлѣ́бами благословѧ́тъ ѹ҆стнѣ̀, и҆ послѹ́шество добро́ты є҆гѡ̀ вѣ́рно.
28 На скѹпа́го въ хлѣ́бѣхъ поро́пщетъ гра́дъ, и҆ послѹ́шество ѕло́бы є҆гѡ̀ и҆звѣ́стно.
29 Въ вїнѣ̀ не мѹжа́йсѧ, мно́гихъ бо погѹбѝ вїно̀.
30 Пе́щь и҆скѹша́етъ желѣ́зо въ кале́нїи, та́кѡ вїно̀ сердца̀ го́рдыхъ во пїѧ́нствѣ.
31 Поле́зно вїно̀ животѹ̀ человѣ́чѹ, а҆́ще пїе́ши є҆̀ въ мѣ́рѹ є҆гѡ̀.
32 Кі́й живо́тъ побѣжда́емомѹ вїно́мъ; сїе́ бо на весе́лїе человѣ́кѡмъ со́здано є҆́сть.
33 Ра́дованїе се́рдца и҆ весе́лїе дѹшѝ вїно̀ пїе́мо во вре́мѧ прили́чно:
34 го́ресть дѹшѝ вїно̀ пїе́мо мно́го въ ра́спри и҆ клеветѣ̀:
35 ѹ҆множа́етъ пїѧ́нство ѩ҆́рость безѹ́мнагѡ на претыка́нїе, ѹ҆малѧ́ѧ крѣ́пость и҆ сотворѧ́ѧ стрѹ҄пїѧ.
36 Въ пи́рѣ вїна̀ не ѡ҆блича́й и҆́скреннѧго и҆ не ѹ҆ничижѝ є҆го̀ въ весе́лїи є҆гѡ̀:
37 словесѐ поно́сна не рцы̀ є҆мѹ̀ и҆ не ѡ҆скорбѝ є҆го̀ во и҆стѧза́нїи.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 31 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784