1 И҆ по се́мъ воста̀ наѳа́нъ про҇ро́чествовати во дни҄ даві́дѡвы.
2 ѩ҆́коже тѹ́къ ѿлѹче́нъ ѿ же́ртвы ми́рныѧ, та́кѡ даві́дъ ѿ сынѡ́въ ї҆и҃левыхъ.
3 Со львы҄ и҆гра́ше ѩ҆́кѡ съ кѡ́злищи и҆ съ медвѣ́дми ѩ҆́кѡ со а҆́гнцы ѻ҆́вчими.
4 Во ю҆́ности свое́й не ѹ҆би́лъ ли и҆споли́на, и҆ ѿѧ́тъ поноше́нїе ѿ люді́й,
5 є҆гда̀ прострѐ рѹ́кѹ съ ка́менемъ и҆з̾ пра́щи низложи́ти горды́ню голїа́ѳовѹ;
6 Призва́ бо гд҇а вы́шнѧгѡ, и҆ вдадѐ въ десни́цѹ є҆гѡ̀ крѣ́пость низложи́ти человѣ́ка си́льна на бра́ни, вознестѝ ро́гъ люді́й свои́хъ.
7 Си́це во тма́хъ просла́ви є҆го̀ и҆ восхвалѝ є҆го̀ во блг҇ве́нїихъ гд҇нихъ, внегда̀ носи́ти є҆мѹ̀ вѣне́цъ сла́вы.
8 Потреби́ бо врагѝ ѡ҆́крестъ и҆ ѹ҆ничижѝ фѷлїсті́млѧны проти́вники: да́же додне́сь сокрѹшѝ и҆̀мъ ро́гъ.
9 Во всѧ́цѣмъ дѣ́лѣ свое́мъ дадѐ и҆сповѣ́данїе ст҃о́мѹ вы́шнемѹ глаго́ломъ сла́вы:
10 всѣ́мъ се́рдцемъ свои́мъ восхвалѝ и҆ возлюбѝ сотво́ршаго и҆̀.
11 И҆ поста́ви пѣвцы̀ прѧ́мѡ ѻ҆лтаре́ви, и҆ звѹ́комъ и҆́хъ ѹ҆слажда́ти пѣ́нїе.
12 Дадѐ во пра́здницѣхъ благолѣ́пїе и҆ ѹ҆красѝ времена̀ да́же до сконча́нїѧ, внегда̀ воспѣва́ти и҆̀мъ и҆́мѧ ст҃о́е є҆гѡ̀ и҆ ѿ ѹ҆́тра гласи́ти во свѧти́лищи.
13 Гд҇ь ѿѧ̀ грѣхѝ є҆гѡ̀ и҆ вознесѐ во вѣ́къ ро́гъ є҆гѡ̀, и҆ дадѐ є҆мѹ̀ завѣ́тъ ца́рскїй и҆ престо́лъ сла́вы во ї҆и҃ли.
14 По се́мъ воста̀ сы́нъ разѹми́ченъ и҆ сегѡ̀ ра́ди ѡ҆бита̀ въ простра́нствѣ:
15 соломѡ́нъ воцари́сѧ во дне́хъ ми́ра, ѩ҆́кѡ бг҃ъ препоко́и ѡ҆́крестъ, да сози́ждетъ до́мъ во и҆́мѧ є҆гѡ̀ и҆ да ѹ҆гото́витъ свѧти́лище во вѣ́къ.
16 Ко́ль преѹмѹдри́лсѧ є҆сѝ во ю҆́ности свое́й и҆ напо́лнилсѧ є҆сѝ ѩ҆́кѡ рѣка̀ ра́зѹма.
17 Зе́млю покры̀ дѹша̀ твоѧ̀, и҆ и҆спо́лнилъ є҆сѝ при́тчами гада́нїй:
18 про́йде и҆́мѧ твоѐ во ѻ҆́стровы дале́че, и҆ возлю́бленъ бы́лъ є҆сѝ въ ми́рѣ твое́мъ.
19 Въ пѣ́снехъ и҆ парїмїа́хъ и҆ во при́тчахъ и҆ во сказа́нїихъ ѹ҆диви́шасѧ тебѣ̀ страны҄.
20 И҆́менемъ гд҇а бг҃а, нарѣче́ннагѡ бг҃а ї҆и҃лева,
21 собра́лъ є҆сѝ ѩ҆́кѡ мѣ́дь зла́то и҆ ѩ҆́кѡ ѻ҆́лово ѹ҆мно́жилъ є҆сѝ сребро̀.
22 Вда́лъ є҆сѝ бока̀ твоѧ҄ жена́мъ и҆ порабо́тилсѧ є҆сѝ тѣ́ломъ твои́мъ:
23 да́лъ є҆сѝ поро́къ сла́вѣ твое́й и҆ ѡ҆скверни́лъ є҆сѝ сѣ́мѧ твоѐ, нанестѝ гнѣ́въ на ча҄да твоѧ҄, и҆ ѹ҆мили́тисѧ ѡ҆ безѹ́мїи твое́мъ: є҆́же раздѣли́тисѧ на дво́е ца́рствѹ, и҆ ѿ є҆фре́ма нача́тисѧ ца́рствѹ непокори́вѹ.
24 Гд҇ь же не ѡ҆ста́витъ мл҇ти своеѧ̀ и҆ не растли́тъ ѿ дѣ́лъ свои́хъ, нижѐ и҆стреби́тъ и҆збра́ннагѡ своегѡ̀ и҆зча́дїй и҆ сѣ́мѧ возлюби́вшагѡ є҆го̀ не и҆́зметъ.
25 И҆ ї҆а́кѡвѹ дадѐ ѡ҆ста́нокъ, и҆ даві́дѹ ѿ негѡ̀ ко́рень.
26 И҆ почѝ соломѡ́нъ со ѻ҆тцы҄ свои́ми
27 и҆ ѡ҆ста́ви по себѣ̀ ѿ сѣ́мене своегѡ̀ лю́демъ безѹ́мїе,
28 и҆ ѹ҆малѧ́ющасѧ ра́зѹмомъ ровоа́ма, и҆́же ѿста́ви лю́ди ѿ совѣ́та своегѡ̀,
29 и҆ ї҆еровоа́ма сы́на нава́това, и҆́же сотворѝ согрѣши́ти ї҆и҃лю и҆ дадѐ є҆фре́мѹ пѹ́ть ко грѣхѹ̀.
30 И҆ ѹ҆мно́жишасѧ грѣсѝ и҆́хъ ѕѣлѡ̀, ѿстѹпи́ти и҆̀мъ ѿ землѝ своеѧ̀:
31 и҆ всѧ́ко лѹка́вство и҆зыска́ша, до́ндеже ме́сть прїи́де на нѧ̀.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 47 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784