1 Па́мѧть ї҆ѡсі́ева въ сложе́нїе ѳѷмїа́ма, и҆ состро́еное дѣ́ломъ мѷрова́рника:
2 во всѧ́цѣхъ ѹ҆стѣ́хъ ѩ҆́кѡ ме́дъ ѹ҆слади́тсѧ, и҆ ѩ҆́кѡ мѹсїкі́а въ пи́рѣ вїна̀.
3 То́й ѹ҆пра́вленъ бы́сть во ѡ҆браще́нїе люді́й и҆ ѿѧ́тъ ме́рзѡсти беззако́нїѧ,
4 и҆спра́ви ко гд҇ѹ се́рдце своѐ, во дни҄ беззако́нныхъ ѹ҆крѣпѝ бл҃гоче́стїе.
5 Кромѣ̀ даві́да и҆ є҆зекі́и и҆ ї҆ѡсі́и, всѝ прегрѣши́ша прегрѣше́нїемъ,
6 ѡ҆ста́виша бо зако́нъ вы́шнѧгѡ: ца́рїе ї҆ѹ҄дины ѡ҆скѹдѣ́ша,
7 да́ша бо ро́гъ сво́й и҆нѣ҄мъ и҆ сла́вѹ свою̀ ѩ҆зы́кѹ чѹжде́мѹ,
8 сожго́ша и҆збра́нъ гра́дъ ст҃ы́ни и҆ ѡ҆пѹстоши́ша пѹти҄ є҆гѡ̀ рѹко́ю ї҆еремі́иною:
9 ѡ҆ѕло́биша бо є҆го̀, и҆ то́й во чре́вѣ ѡ҆свѧще́нъ бы́сть про҇ро́къ и҆скорени́ти и҆ ѡ҆ѕло́бити и҆ погѹби́ти, та́кожде созда́ти и҆ насади́ти.
10 Ї҆езекі́иль, и҆́же ви́дѣ видѣ́нїе сла́вы, ю҆́же показа̀ є҆мѹ̀ въ колесни́цѣ херѹві́мстѣ:
11 помѧнѹ̀ бо врагѝ въ дождѝ, и҆ благосотвори́ти направлѧ́ющымъ пѹти҄.
12 И҆ ѻ҆боюна́десѧте про҇ро́кѡвъ да процвѣтѹ́тъ кѡ́сти ѿ мѣ́стъ свои́хъ: ѹ҆тѣ́ши бо ї҆а́кѡва и҆ и҆зба́вилъ ѧ҆̀ вѣ́рою наде́жды.
13 Ка́кѡ возвели́чимъ зорова́велѧ; и҆ се́й ѩ҆́кѡ печа́ть на деснѣ́й рѹцѣ̀:
14 та́кожде ї҆исѹ́съ сы́нъ ї҆ѡседе́ковъ: и҆̀же во дни҄ своѧ҄ созда́ста до́мъ и҆ воздвиго́ста це́рковь ст҃ѹ гд҇еви, ѹ҆гото́ванѹ во сла́вѹ вѣ́ка.
15 И҆ неемі́и на мно́зѣ (бѹ́ди) па́мѧть, воздви́гшемѹ на́мъ стѣ́ны па́дшыѧ и҆ поста́вльшемѹ двє́ри и҆ завѡ́ры и҆ воздви́гшемѹ до́мы па́дшыѧ на́шѧ.
16 Никто́же со́зданъ бы́сть тако́въ, ѩ҆́кѡ є҆нѡ́хъ на землѝ: то́й бо взѧ́тъ бы́сть ѿ землѝ.
17 Нижѐ ѩ҆́кѡ ї҆ѡ́сифъ бы́сть мѹ́жъ, во́ждь бра́тїи, ѹ҆твержде́нїе лю́демъ, и҆ кѡ́сти є҆гѡ̀ посѣщє́ны бы́ша.
18 Си́мъ и҆ си́ѳъ просла҄влена бы́ста въ человѣ́цѣхъ, и҆ па́че всѧ́кагѡ живо́тнагѡ въ тва́ри а҆да́мъ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 49 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784