1 Не жела́й ча҄дъ мно́жества неключи́мыхъ, нижѐ весели́сѧ ѡ҆ сынѣ́хъ нечести́выхъ: є҆гда̀ ѹ҆мно́жатсѧ, не весели́сѧ ѡ҆ ни́хъ, а҆́ще нѣ́сть стра́ха гд҇нѧ съ ни́ми.
2 Не вѣ́рѹй животѹ̀ и҆́хъ и҆ не належѝ на мно́жество и҆́хъ:
3 лѹ́чше бо є҆ди́нъ првдникъ, не́жели ты́сѧща (грѣ҄шникъ),
4 и҆ ѹ҆мре́ти безча́дномѹ, не́жели и҆мѣ́ти ча҄да нечести҄ва:
5 ѿ є҆ди́нагѡ бо разѹ́мна насели́тсѧ гра́дъ, колѣ́но же беззако́нныхъ запѹстѣ́етъ.
6 Мнѡ́га сицева҄ѧ ви́дѣ ѻ҆́ко моѐ, и҆ крѣ҄пльшаѧ си́хъ слы́ша ѹ҆́хо моѐ.
7 Въ собо́рищи грѣ́шныхъ возгори́тсѧ ѻ҆́гнь, и҆ во ѩ҆зы́цѣ непокори́вѣ возгори́тсѧ гнѣ́въ.
8 Не ѹ҆моле́нъ бы́сть (бг҃ъ) ѡ҆ дре́внихъ и҆споли́нѣхъ, и҆̀же ѿстѹпи́ша крѣ́постїю свое́ю:
9 не пощадѣ̀ ѡ҆ жили́щи лѡ́товѣ, и҆́миже возгнѹша́сѧ за горды́ню и҆́хъ:
10 не поми́лова ѩ҆зы́ка поги́бельнагѡ, возне́сшагѡсѧ во грѣсѣ́хъ свои́хъ,
11 и҆ та́кѡ ше́сть сѡ́тъ ты́сѧщъ пѣшцє́въ, соше́дшихсѧ въ жестосе́рдїи свое́мъ. И҆ а҆́ще бѹ́детъ є҆ди́нъ жестоковы́йный въ лю́дехъ, ди́вно є҆́сть сїѐ, а҆́ще непови́ненъ бѹ́детъ.
12 Мл҇ть бо и҆ гнѣ́въ ѹ҆ негѡ̀, си́ленъ ѹ҆моле́нъ бы́ти и҆ и҆злїѧ́ти гнѣ́въ.
13 По мно́зѣй мл҇ти є҆гѡ̀, та́кѡ мно́го и҆ ѡ҆бличе́нїе є҆гѡ̀: мѹ́жеви но дѣлѡ́мъ є҆гѡ̀ сѹ́дитъ.
14 Не ѹ҆бѣжи́тъ хище́нїемъ грѣ́шный, и҆ терпѣ́нїе благовѣ́рнагѡ не лише́но бѹ́детъ.
15 Всѧ́цѣй ми́лостыни сотвори́тъ мѣ́сто: кі́йждо бо по дѣлѡ́мъ свои҄мъ ѡ҆брѧ́щетъ.
16 Не рцы̀, ѩ҆́кѡ ѿ гд҇а скры́юсѧ, є҆да̀ свы́ше кто́ мѧ помѧне́тъ;
17 въ лю́дехъ мно́жайшихъ не воспомѧне́нъ бѹ́дѹ, что́ бо є҆́сть дѹша̀ моѧ̀ въ безчи́сленнѣй тва́ри;
18 сѐ, нб҃о и҆ нб҃о нб҃сѐ бж҃їѧ, бе́здна и҆ землѧ̀ посѣще́нїемъ є҆гѡ̀ подви́гнѹтсѧ:
19 вкѹ́пѣ го́ры и҆ ѡ҆снова҄нїѧ землѝ, є҆гда̀ воззри́тъ на нѧ̀, тре́петомъ стрѧсѹ́тсѧ,
20 и҆ ѡ҆ си́хъ не размы́слитъ се́рдце:
21 и҆ пѹти҄ є҆гѡ̀ кто̀ пости́гнетъ; и҆ бѹ́рю ю҆́же не ѹ҆́зритъ человѣ́къ, мнѡ́жайшаѧ же дѣ́лъ є҆гѡ̀ въ сокрове́нныхъ:
22 дѣла̀ пра́вды є҆гѡ̀ кто̀ возвѣсти́тъ; и҆лѝ кто̀ стерпи́тъ; дале́че бо завѣ́тъ.
23 Ѹ҆малѧ́ѧйсѧ се́рдцемъ размышлѧ́етъ сїѧ҄, а҆ мѹ́жъ безѹ́менъ и҆ заблѹжда́ѧй размышлѧ́етъ бѹ҄ѧѧ.
24 Послѹ́шай менѐ, ча́до, и҆ наѹчи́сѧ вѣ́дѣнїѧ, и҆ на словеса̀ моѧ҄ внима́й се́рдцемъ твои́мъ:
25 и҆з̾ѧвлѧ́ю въ мѣ́рилѣ наказа́нїе и҆ со и҆спыта́нїемъ возвѣщѹ̀ вѣ́дѣнїе.
26 Сѹдо́мъ гд҇нимъ дѣла̀ є҆гѡ̀ и҆з̾ нача́ла, и҆ ѿ сотворе́нїѧ є҆гѡ̀ раздѣлѝ ча҄сти и҆́хъ:
27 ѹ҆красѝ во вѣ́къ дѣла̀ своѧ҄, и҆ нача҄ла и҆́хъ въ ро́ды и҆́хъ: нижѐ взалка́ша, нижѐ ѹ҆трѹди́шасѧ, и҆ не преста́ша ѿ дѣ́лъ свои́хъ.
28 Кі́йждо и҆́скреннѧго своего̀ не ѡ҆скорбѝ,
29 и҆ да́же до вѣ́ка не воспроти́вѧтсѧ гл҃го́лѹ є҆гѡ̀.
30 И҆ по си́хъ гд҇ь на зе́млю призрѣ̀ и҆ и҆спо́лни ю҆̀ ѿ бл҃гъ свои́хъ:
31 дѹша̀ всѧ́кагѡ живо́тна покры̀ лицѐ є҆ѧ̀, и҆ въ ню̀ возвраще́нїе и҆́хъ.
Нашли в тексте ошибку? Выделите её и нажмите: Ctrl + Enter

Книга Премудрости Иисуса, сына Сирахова, 16 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.