1 Тремѝ ѹ҆краси́хсѧ и҆ ста́хъ красна̀ пред̾ гд҇емъ и҆ челѡвѣ́ки:
2 є҆диномы́слїемъ бра́тїй и҆ любо́вїю и҆́скреннихъ, и҆ мѹ́жъ и҆ жена̀ междѹ̀ собо́ю согла́сни.
3 Трѝ же ви́ды возненави́дѣ дѹша̀ моѧ̀, и҆ ѕѣлѡ̀ мѝ ѡ҆мерзѣ̀ живо́тъ и҆́хъ:
4 ѹ҆бо́га го́рда, и҆ бога́та лжи́ва, и҆ ста́ра прелюбодѣ́ѧ ѹ҆малѧ́ющагосѧ ѹ҆мо́мъ.
5 ѩ҆̀же въ ю҆́ности не собра́лъ є҆сѝ, то̀ ка́кѡ мо́жеши ѡ҆брѣстѝ въ ста́рости твое́й;
6 Ко́ль є҆́сть красе́нъ сѣди́намъ сѹ́дъ, и҆ старѣ́йшымъ разѹмѣ́ти совѣ́тъ;
7 Ко́ль красна̀ ста҄рымъ премѹ́дрость и҆ сла҄внымъ разѹмѣ́нїе и҆ совѣ́тъ;
8 Вѣне́цъ ста́рцємъ многоразли́чное и҆скѹ́сство, и҆ похвале́нїе и҆́хъ стра́хъ гд҇ень.
9 Де́вѧть помышле́нїй ѹ҆блажи́хъ въ се́рдцы мое́мъ, а҆ десѧ́тое и҆зрекѹ̀ ѧ҆зы́комъ:
10 человѣ́къ веселѧ́йсѧ ѡ҆ ча́дѣхъ, живѧ́й и҆ зрѧ́й паде́нїе врагѡ́въ.
11 Блаже́нъ живѧ́й со жено́ю разѹ́мною, и҆ и҆́же ѧ҆зы́комъ (свои́мъ) не поползнѹ́сѧ, и҆ и҆́же не порабо́та недосто́йномѹ себѣ̀.
12 Блаже́нъ, и҆́же ѡ҆брѣ́те мѹ́дрость и҆ повѣ́даѧй во ѹ҆́ши послѹ́шающихъ.
13 Ко́ль вели́къ, и҆́же мѹ́дрость ѡ҆брѣ́те, но нѣ́сть па́че боѧ́щагѡсѧ гд҇а.
14 Стра́хъ гд҇ень па́че всегѡ̀ пред̾ѹспѣ̀, держа́й є҆го̀ комѹ̀ ѹ҆подо́битсѧ;
15 Всѧ́ка ѩ҆́зва и҆ не ѩ҆́зва серде́чнаѧ и҆ всѧ́кое лѹка́вство и҆ не лѹка́вство же́нское:
16 всѧ́кое нападе́нїе и҆ не нападе́нїе ненави́дѧщихъ, и҆ всѧ́кое мще́нїе и҆ не ѿмще́нїе врагѡ́въ.
17 Нѣ́сть главы̀ па́че главы̀ ѕмїи́ны, и҆ нѣ́сть ѩ҆́рости па́че ѩ҆́рости вра́жїѧ.
18 Лѹ́чше жи́ти со льво́мъ и҆ ѕмі́емъ, не́же жи́ти со жено́ю лѹка́вою.
19 Лѹка́вство жены̀ и҆змѣнѧ́етъ зра́къ є҆ѧ̀ и҆ ѡ҆мрача́етъ лицѐ своѐ ѩ҆́кѡ вре́тище:
20 посредѣ̀ и҆́скреннихъ свои́хъ возлѧ́жетъ мѹ́жъ є҆ѧ̀, и҆ слы́шавъ воздо́хнетъ го́рькѡ.
21 Мала̀ є҆́сть всѧ́ка ѕло́ба проти́вѹ ѕло́бѣ же́нстѣй: жре́бїй грѣ́шника спаде́тъ на ню̀.
22 ѩ҆́коже восхожде́нїе по пескѹ̀ нога́ма ста́рагѡ, та́кѡ жена̀ ѧ҆зы́чна мѹ́жѹ молчали́вѹ.
23 Не сматрѧ́й на красотѹ̀ же́нскѹю и҆ жены̀ въ по́хоть не пожела́й.
24 Гнѣ́въ и҆ безстѹ́дїе и҆ срамота̀ вели́ка жена̀, а҆́ще ѡ҆блада́етъ мѹ́жемъ свои́мъ.
25 Се́рдце смире́но, и҆ лицѐ дрѧ́хло, и҆ ѩ҆́зва серде́чна жена̀ лѹка́ва:
26 рѹ́цѣ немѡщны́ѧ и҆ кѡлѣ́на разсла́блєна, (жена̀) ѩ҆́же не блажи́тъ мѹ́жа своего̀.
27 Ѿ жены̀ нача́ло грѣха̀, и҆ то́ю ѹ҆мира́емъ всѝ.
28 Не да́ждь водѣ̀ прохо́да, ни женѣ̀ лѹка́вѣ дерзнове́нїѧ:
29 а҆́ще не хо́дитъ под̾ рѹко́ю твое́ю, ѿсѣцы̀ ю҆̀ ѿ пло́ти твоеѧ̀.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 25 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784