1 Непра́зднство ве́лїе создано̀ бы́сть всѧ́комѹ человѣ́кѹ, и҆ и҆́го тѧ́жко на сынѣ́хъ а҆да́млихъ, ѿ днѐ и҆схо́да и҆з̾ чре́ва ма́тере и҆́хъ до днѐ погребе́нїѧ въ ма́терь всѣ́хъ.
2 Размышлє́нїѧ и҆́хъ и҆ стра́хъ серде́чный, помышле́нїе ча́ѧнїѧ, де́нь сконча́нїѧ:
3 ѿ сѣдѧ́щагѡ на престо́лѣ сла́вы и҆ да́же до смире́ннагѡ на землѝ и҆ пе́пелѣ,
4 ѿ носѧ́щагѡ багрѧни́цѹ и҆ вѣне́цъ и҆ да́же до ѡ҆дѣва́ющагѡсѧ льнѧ́ною,
5 ѩ҆́рость и҆ за́висть, и҆ мѧте́жъ и҆ молва̀, и҆ стра́хъ сме́рти и҆ вражда̀ и҆ рве́нїе, и҆ во вре́мѧ поко́ѧ на ло́жи со́нъ нощны́й и҆змѣнѧ́етъ ра́зѹмъ є҆гѡ̀:
6 ма́лѡ ѩ҆́кѡ ничто́же на поко́й, и҆ ѿ тогѡ̀ во снѣ́хъ ѩ҆́кѡ во дне́хъ блюде́нїѧ:
7 возмѹще́нъ видѣ́нїемъ се́рдца своегѡ̀, ѩ҆́кѡ и҆збѣжа́въ ѿ лица̀ бра́ни, во вре́мѧ спасе́нїѧ своегѡ̀ воста̀, и҆ дивѧ́сѧ ни при є҆ди́нѣмъ же стра́сѣ.
8 Со всѧ́кою пло́тїю ѿ человѣ́ка да́же до скота̀, и҆ на грѣ́шныхъ седмери́цею къ си҄мъ:
9 сме́рть и҆ кро́вь, и҆ рве́нїе и҆ ѻ҆рѹ́жїе, наведє́нїѧ, гла́дъ и҆ сокрѹше́нїе и҆ ра҄ны,
10 на беззако́нныхъ создана҄ бы́ша сїѧ҄ всѧ҄, и҆ си́хъ ра́ди бы́сть пото́пъ.
11 Всѧ҄, є҆ли҄ка ѿ землѝ, въ зе́млю возвраща́ютсѧ, и҆ ѿ воды̀, въ мо́ре возвраща́ютсѧ.
12 Всѧ́къ да́ръ и҆ непра́вда и҆стреби́тсѧ, а҆ вѣ́ра во вѣ́къ стоѧ́ти бѹ́детъ.
13 И҆мѣ́нїе непра́ведныхъ ѩ҆́кѡ рѣка̀ и҆́зсхнетъ, и҆ ѩ҆́коже гро́мъ вели́къ въ до́ждь возгреми́тъ.
14 Е҆гда̀ разгне́тъ рѹ́цѣ, возвесели́тсѧ, та́кѡ престѹпа́ющїи до конца̀ и҆зче́знѹтъ.
15 И҆зча҄дїѧ нечести́выхъ не ѹ҆мно́жатъ вѣ́твїй, и҆ корє́нїѧ нечи҄стаѧ на тве́рдѣ ка́мени:
16 ѕла́къ над̾ всѧ́кою водо́ю и҆ на бре́зѣ рѣкѝ пре́жде всѧ́кїѧ травы̀ и҆сто́рженъ бѹ́детъ.
17 Благода́ть ѩ҆́кѡ ра́й во благослове́нїихъ, и҆ ми́лостынѧ во вѣ́къ пребыва́етъ.
18 Живо́тъ самодово́лнагѡ дѣ́лателѧ ѹ҆слади́тсѧ, и҆ па́че ѻ҆бои́хъ ѡ҆брѣта́ѧй сокро́вище.
19 Ча҄да и҆ созида́нїе гра́да ѹ҆твержда́ютъ и҆́мѧ, и҆ па́че ѻ҆бои́хъ жена̀ непоро́чна вмѣнѧ́етсѧ.
20 Вїно̀ и҆ мѹсїкі́а веселѧ́тъ се́рдце, а҆ па́че ѻ҆бои́хъ возлюбле́нїе премѹ́дрости.
21 Свирѣ́ль и҆ ѱалти́рь ѹ҆слажда́ютъ пѣ́снь, а҆ па́че ѻ҆бои́хъ ѧ҆зы́къ сла́дкїй.
22 Благода́ти и҆ добро́ты возжела́етъ ѻ҆́ко твоѐ, а҆ па́че ѻ҆бои́хъ ѕла́ка сѣ́мене.
23 Прїѧ́тель и҆ дрѹ́гъ срѣта҄ющасѧ во вре́мѧ, а҆ па́че ѻ҆бои́хъ жена̀ съ мѹ́жемъ.
24 Бра́тїѧ и҆ по́мощь во вре́мѧ ско́рби, а҆ па́че ѻ҆бои́хъ ми́лостынѧ и҆зба́витъ.
25 Зла́то и҆ сребро̀ ѹ҆твердѧ́тъ но́гѹ, а҆ па́че ѻ҆бои́хъ совѣ́тъ благоѹго́денъ бѹ́детъ.
26 И҆мѣ́нїе и҆ крѣ́пость вознесѹ́тъ се́рдце, а҆ па́че ѻ҆бои́хъ стра́хъ гд҇ень:
27 нѣ́сть во стра́сѣ гд҇ни ѹ҆мале́нїѧ и҆ нѣ́сть въ не́мъ лише́нїѧ по́мощи:
28 стра́хъ гд҇ень ѩ҆́кѡ ра́й благослове́нїѧ, и҆ па́че всѧ́кїѧ сла́вы покры̀ є҆го̀.
29 Ча́до, живото́мъ просли́вымъ не живѝ: лѹ́чше ѹ҆мре́ти, не́жели проси́ти.
30 Мѹ́жъ зрѧ̀ на чѹждѹ́ю трапе́зѹ, нѣ́сть живо́тъ є҆гѡ̀ въ числѣ̀ живота̀: ѡ҆печа́литъ дѹ́шѹ свою̀ чѹжды́ми бра́шны:
31 мѹ́жъ же хѹдо́гъ и҆ нака́занъ сохрани́тсѧ.
32 Во ѹ҆стѣ́хъ нестыдли́вагѡ проше́нїе ѹ҆слади́тсѧ, и҆ во чре́вѣ є҆гѡ̀ ѻ҆́гнь возгори́тсѧ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 40 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784