1 За скѹ́дость мно́зи согрѣши́ша, и҆ и҆ща́й ѡ҆богатѣ́ти ѿврати́тъ ѻ҆́ко.
2 Посредѣ̀ со́браныхъ ка́менїй вонзе́тсѧ ко́лъ, и҆ посредѣ̀ продаѧ́нїѧ и҆ кѹ́пли соверши́тсѧ грѣ́хъ.
3 А҆́ще не держи́тсѧ стра́ха гд҇нѧ со тща́нїемъ, вско́рѣ преврати́тсѧ до́мъ є҆гѡ̀.
4 Трѧсе́нїемъ решета̀ ѡ҆ста́нетъ сме́тїе: та́кожде ѻ҆тре́би человѣ́честїи въ помышле́нїи є҆гѡ̀.
5 Сосѹ́ды скѹдє́льничи и҆скѹша́етъ пе́щь, и҆ и҆скѹше́нїе человѣ́ческо въ помышле́нїи є҆гѡ̀.
6 Воздѣ́ланїе дре́ва ѩ҆влѧ́етъ пло́дъ є҆гѡ̀: та́кѡ сло́во помышле́нїѧ въ се́рдцы человѣ́честѣмъ.
7 Пре́жде бесѣ́ды не похвалѝ мѹ́жа: сїѧ́ бо и҆скѹше́нїе (є҆́сть) человѣ́кѡвъ.
8 А҆́ще го́ниши пра́вдѹ, пости́гнеши ю҆̀ и҆ ѡ҆блече́шисѧ въ ню̀ ѩ҆́кѡ въ поди́ръ сла́вы.
9 Пти҄цы съ подо́бными себѣ̀ ѡ҆бита́ютъ, и҆ и҆́стина къ творѧ́щымъ ю҆̀ ѡ҆брати́тсѧ.
10 Ле́въ лови́тъ ло́въ, та́кожде и҆ грѣсѝ дѣ́лающихъ непра́вдѹ.
11 По́вѣсть благочести́вагѡ всегда̀ премѹ́дрость: безѹ́мный же ѩ҆́кѡ лѹна̀ и҆змѣнѧ́етсѧ.
12 Посредѣ̀ безѹ́мныхъ блюдѝ вре́мѧ, посредѣ́ же размышлѧ́ющихъ ѹ҆чаща́й.
13 По́вѣсть бѹ́ихъ ме́рзость, и҆ смѣ́хъ и҆́хъ во ѹ҆слажде́нїи грѣха̀.
14 Бесѣ́да многокленѹ́щагѡсѧ под̾и́метъ власы̀, и҆ сва́ръ є҆гѡ̀ затче́нїе ѹ҆ше́съ.
15 Проли́тїе кро́ве сва́ръ го́рдыхъ, и҆ ѹ҆кори́зна и҆́хъ слѹ́хъ тѧ́жкїй.
16 Ѿкрыва́ѧй та҄йнаѧ погѹблѧ́етъ вѣ́рность и҆ не ѡ҆брѧ́щетъ дрѹ́га проти́вѹ дѹшѝ своеѧ̀.
17 Возлюбѝ дрѹ́га и҆ ѹ҆вѣ́рисѧ съ ни́мъ:
18 а҆́ще же ѿкры́еши та҄йны є҆гѡ̀, не и҆́маши гна́ти по не́мъ.
19 ѩ҆́коже бо погѹби́тъ человѣ́къ врага̀ своего̀, та́кѡ погѹби́ши дрѹ́жбѹ и҆́скреннѧгѡ:
20 и҆ ѩ҆́коже пти́цѹ и҆з̾ рѹкѝ твоеѧ̀ и҆спѹ́стиши, та́кѡ и҆спѹсти́лъ є҆сѝ и҆́скреннѧго и҆ не ѹ҆лови́ши є҆го̀:
21 не гони́сѧ за ни́мъ, ѩ҆́кѡ дале́че ѿстѹпѝ и҆ и҆збѣжѐ ѩ҆́кѡ се́рна ѿ сѣ́ти.
22 ѩ҆́кѡ стрѹ́пъ є҆́сть ѡ҆бѧза́ти, и҆ клеветы̀ є҆́сть и҆змѣ́на:
23 ѿкры́вый же та҄йнаѧ погѹбѝ вѣ́рность.
24 Помиза́ѧй ѻ҆́комъ кѹе́тъ ѕло̀, и҆ никто́же є҆го̀ ѿста́витъ ѿ тогѡ̀:
25 пред̾ ѻ҆чи́ма твои́ма ѹ҆слади́тъ ѹ҆ста̀ своѧ҄ и҆ словесє́мъ твои҄мъ подиви́тсѧ,
26 послѣди́ же разврати́тъ ѹ҆ста̀ своѧ҄ и҆ въ словесѣ́хъ твои́хъ да́стъ собла́знъ.
27 Мнѡ́гаѧ возненави́дѣхъ и҆ не ѡ҆брѣто́хъ подо́бна є҆мѹ̀, и҆ гд҇ь возненави́дитъ є҆го̀.
28 Верга́ѧй ка́мень на высотѹ̀ на главѹ̀ свою̀ верга́етъ, и҆ ѩ҆́зва льсти́ва раздере́тъ стрѹ́пы.
29 И҆скопова́ѧй ро́въ впаде́тсѧ въ ѻ҆́нь, и҆ распростира́ѧй сѣ́ть ѹ҆вѧ́знетъ въ не́й.
30 Творѧ́й ѕло̀ ввали́тсѧ въ нѐ и҆ не позна́етъ, ѿкѹ́дѹ прїи́детъ є҆мѹ̀.
31 Порѹга́нїе и҆ поноше́нїе го́рдыхъ, и҆ ѿмще́нїе ѩ҆́кѡ ле́въ ѹ҆лови́тъ и҆̀хъ.
32 Сѣ́тїю ѹ҆ло́вѧтсѧ веселѧ́щїисѧ ѡ҆ паде́нїи благовѣ́рныхъ, и҆ болѣ́знь и҆знѹри́тъ ѧ҆̀ пре́жде сме́рти и҆́хъ.
33 Гнѣ́въ и҆ ѩ҆́рость, и҆ сїѧ҄ сѹ́ть ме́рзость, и҆ мѹ́жъ грѣ́шникъ ѡ҆держа́нъ и҆́ми бѹ́детъ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 27 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784