1 То́чїю вдаѧ́й дѹ́шѹ свою̀ и҆ размышлѧ́ѧй въ зако́нѣ вы́шнѧгѡ премѹ́дрости всѣ́хъ дре́внихъ взы́щетъ и҆ во про҇ро́чествїихъ поѹча́тисѧ бѹ́детъ:
2 пѡ́вѣсти мѹже́й и҆мени́тыхъ соблюде́тъ и҆ во и҆зви҄тїѧ при́тчей совни́детъ,
3 сокровє́ннаѧ при́тчей и҆зы́щетъ и҆ въ гада́нїи при́тчей поживе́тъ,
4 посредѣ̀ вельмо́жъ послѹ́житъ и҆ пред̾ старѣ́йшинѹ ѩ҆ви́тсѧ,
5 въ землѝ чѹжди́хъ ѩ҆зы҄къ про́йдетъ, добро́ бо и҆ ѕло̀ въ человѣ́цѣхъ и҆скѹсѝ.
6 Се́рдце своѐ вда́стъ ѹ҆́треневати ко гд҇ѹ сотво́ршемѹ є҆го̀ и҆ пред̾ вы́шнимъ помо́литсѧ, и҆ ѿве́рзетъ ѹ҆ста̀ своѧ҄ на моли́твѹ и҆ ѡ҆ грѣсѣ́хъ свои́хъ помо́литсѧ.
7 А҆́ще гд҇ь ве́лїй восхо́щетъ, дѹ́хомъ ра́зѹма и҆спо́лнитсѧ:
8 то́й ѡ҆дожди́тъ глаго́лы премѹ́дрости своеѧ̀ и҆ въ моли́твѣ и҆сповѣ́стсѧ гд҇еви,
9 то́й ѹ҆пра́витъ совѣ́тъ є҆гѡ̀ и҆ хѹдо́жество и҆ въ сокрове́нныхъ є҆гѡ̀ размышлѧ́ти бѹ́детъ,
10 то́й и҆звѣсти́тъ наказа́нїе ѹ҆че́нїѧ є҆гѡ̀ и҆ въ зако́нѣ завѣ́та гд҇нѧ похва́литсѧ.
11 Восхва́лѧтъ ра́зѹмъ є҆гѡ̀ мно́зи, и҆ до вѣ́ка не поги́бнетъ:
12 не ѿи́детъ па́мѧть є҆гѡ̀, и҆ и҆́мѧ є҆гѡ̀ поживе́тъ въ ро́ды родѡ́въ:
13 премѹ́дрость є҆гѡ̀ повѣ́дѧтъ ѩ҆зы́цы, и҆ хвалѹ̀ є҆гѡ̀ и҆сповѣ́сть цр҃ковь.
14 А҆́ще пребѹ́детъ, приѹсво́итъ себѣ̀, и҆ а҆́ще почі́етъ, и҆́мѧ ѡ҆ста́витъ па́че ты́сѧщъ.
15 Е҆щѐ размы́сливъ повѣ́мъ, и҆ ѩ҆́коже лѹны̀ полнота̀ напо́лнихсѧ.
16 Послѹ́шайте менѐ, преподо́бнїи сы́нове, и҆ прозѧ́бните ѩ҆́кѡ ши́пки произраста́ющыѧ при пото́цѣ се́лнѣмъ,
17 и҆ ѩ҆́коже лїва́нъ дади́те благово́нїе,
18 и҆ процвѣти́те цвѣ́тъ ѩ҆́кѡ крі́нъ, преподади́те воню̀ и҆ воспо́йте пѣ́снь.
19 Благослови́те гд҇а во всѣ́хъ дѣ́лѣхъ є҆гѡ̀, дади́те и҆́мени є҆гѡ̀ вели́чїе и҆ и҆сповѣ́дайтесѧ во хвале́нїи є҆гѡ̀,
20 въ пѣ́снехъ ѹ҆сте́нъ и҆ въ гѹ́слехъ, и҆ си́це рцы́те во и҆сповѣ́данїи:
21 дѣла̀ гд҇нѧ всѧ҄ ѩ҆́кѡ дѡбра̀ ѕѣлѡ̀, и҆ всѧ́ко повелѣ́нїе во вре́мѧ своѐ бѹ́детъ.
22 И҆ нѣ́сть рещѝ: что̀ сїѐ; на что̀ сїѐ; всѧ҄ бо сїѧ҄ во вре́мѧ своѐ взы҄скана бѹ́дѹтъ.
23 Сло́вомъ є҆гѡ̀ ста̀ вода̀ ѩ҆́кѡ сто́гъ, и҆ гл҃го́ломъ ѹ҆́стъ є҆гѡ̀ прїѧ́тєлища вѡдна́ѧ.
24 Повелѣ́нїемъ є҆гѡ̀ всѧ́кое благоволе́нїе, и҆ нѣ́сть, и҆́же ѹ҆ма́литъ сп҇нїе є҆гѡ̀.
25 Дѣла̀ всѧ́кїѧ пло́ти пред̾ ни́мъ, и҆ нѣ́сть ѹ҆кры́тисѧ ѿ ѻ҆че́съ є҆гѡ̀:
26 ѿ вѣ́ка на вѣ́къ призрѣ̀, и҆ ничто́же є҆́сть ди́вно пред̾ ни́мъ.
27 Нѣ́сть рещѝ: что̀ сїѐ; на что̀ сїѐ; всѧ҄ бо на потре́бѹ и҆́хъ создана҄ бы́ша.
28 Блг҇ве́нїе є҆гѡ̀ ѩ҆́кѡ рѣка̀ покры̀ и҆ ѩ҆́кѡ пото́къ сѹ́шѹ напоѝ:
29 си́це гнѣ́въ є҆гѡ̀ ѩ҆зы́цы наслѣ́дѧтъ, ѩ҆́кѡ превратѝ во́дѹ въ сла́ность.
30 Пѹтїѐ є҆гѡ̀ преподѡ́бнымъ пра́ви, та́кѡ беззако́нникѡмъ претыка҄нїѧ.
31 Блага҄ѧ благи҄мъ создана҄ бы́ша и҆з̾ нача́ла, та́кожде грѣ҄шнымъ ѕла҄ѧ.
32 Нача́ло всѧ́кїѧ потре́бы въ житїѐ человѣ́кѹ, вода̀ и҆ ѻ҆́гнь, и҆ желѣ́зо и҆ со́ль, и҆ семїда́лъ пшени́цы и҆ млеко̀ и҆ ме́дъ, кро́вь гро́здова и҆ ма́сло и҆ ри́за:
33 всѧ҄ сїѧ҄ благочести҄вымъ во блага҄ѧ, си́це и҆ грѣ́шникѡмъ превратѧ́тсѧ во ѕла҄ѧ.
34 Сѹ́ть дѹ́си, и҆̀же со́здани бы́ша на ме́сть и҆ ѩ҆́ростїю свое́ю ѹ҆тверди́ша ра҄ны и҆̀мъ:
35 во вре́мѧ сконча́нїѧ и҆злїю́тъ крѣ́пость и҆ ѩ҆́рость сотво́ршагѡ и҆̀хъ соверша́тъ.
36 Ѻ҆́гнь и҆ гра́дъ, и҆ гла́дъ и҆ сме́рть, всѧ҄ сїѧ҄ создана҄ бы́ша на ме́сть:
37 зѹ́бы ѕвѣре́й и҆ скѡрпі́и, и҆ є҆хї҄дны и҆ ме́чь ѿмща́ѧй въ поги́бель нечести́выхъ,
38 въ за́повѣдехъ є҆гѡ̀ возвеселѧ́тсѧ, и҆ на землѝ на потре́бѹ ѹ҆гото́вѧтсѧ, и҆ во бремена́хъ свои́хъ не и҆́мѹтъ прейтѝ сло́ва.
39 Сегѡ̀ ра́ди и҆спе́рва ѹ҆тверди́хсѧ и҆ размы́слихъ и҆ въ писа́нїи ѡ҆ста́вихъ:
40 всѧ҄ дѣла̀ гд҇нѧ бла҄га, и҆ всю̀ потре́бѹ во вре́мѧ своѐ пода́стъ:
41 и҆ нѣ́сть рещѝ: сїѐ сегѡ̀ ѕлѣ́е: всѧ҄ бо во вре́мѧ на ѹ҆гожде́нїе бѹ́дѹтъ.
42 И҆ нн҃ѣ всѣ́мъ се́рдцемъ и҆ ѹ҆сты҄ воспо́йте и҆ благослови́те и҆́мѧ гд҇не.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 39 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784