1 Боѧ́йсѧ гд҇а сотвори́тъ сїѐ, и҆ держа́йсѧ зако́на пости́гнетъ ю҆̀.
2 И҆ срѧ́щетъ є҆го̀ ѩ҆́кѡ ма́ти, и҆ ѩ҆́кѡ жена̀ дѣ́вства прїи́метъ и҆̀:
3 ѹ҆хлѣ́битъ є҆го̀ хлѣ́бомъ ра́зѹма и҆ водо́ю премѹ́дрости напои́тъ и҆̀:
4 ѹ҆тверди́тсѧ на не́й и҆ не преклони́тсѧ, и҆ до неѧ̀ приста́нетъ и҆ не постыди́тсѧ:
5 и҆ вознесе́тъ є҆го̀ па́че и҆́скреннихъ є҆гѡ̀ и҆ посредѣ̀ цр҃кве ѿве́рзетъ ѹ҆ста̀ є҆гѡ̀:
6 весе́лїе и҆ вѣне́цъ ра́дости и҆ и҆́мѧ вѣ́чно наслѣ́дитъ.
7 Не пости́гнѹтъ є҆ѧ̀ человѣ́цы неразѹ́мивїи, и҆ мѹ́жїе грѣ́шнїи не ѹ҆́зрѧтъ є҆ѧ̀:
8 дале́че є҆́сть ѿ горды́ни, и҆ мѹ́жїе лжи́вїи не и҆́мѹтъ помѧнѹ́ти є҆ѧ̀.
9 Не красна̀ похвала̀ во ѹ҆стѣ́хъ грѣ́шника, ѩ҆́кѡ не ѿ гд҇а послана̀ бы́сть:
10 премѹ́дростїю бо речє́на бѹ́детъ хвала̀, и҆ гд҇ь бл҃гопоспѣши́тъ є҆́й.
11 Не рцы̀, ѩ҆́кѡ гд҇а ра́ди ѿстѹпи́хъ: и҆̀хже бо возненави́дѣ, да не сотвори́ши.
12 Не рцы̀, ѩ҆́кѡ са́мъ мѧ̀ прельстѝ: не тре́бѹетъ бо мѹ́жа грѣ́шника.
13 Всѧ́кѹ ме́рзость возненави́дѣ гд҇ь, и҆ нѣ́сть любе́зна боѧ́щымсѧ є҆гѡ̀.
14 Са́мъ и҆з̾ нача́ла сотворѝ человѣ́ка и҆ ѡ҆ста́ви є҆го̀ въ рѹцѣ̀ произволе́нїѧ є҆гѡ̀:
15 а҆́ще хо́щеши, соблюде́ши за́пѡвѣди и҆ вѣ́рѹ сотвори́ши благоволе́нїѧ.
16 Предложи́лъ тѝ ѻ҆́гнь и҆ во́дѹ, и҆ на не́же хо́щеши, простре́ши рѹ́кѹ твою̀.
17 Пред̾ человѣ́комъ живо́тъ и҆ сме́рть, и҆ є҆́же а҆́ще и҆зво́литъ, да́стсѧ є҆мѹ̀.
18 ѩ҆́кѡ мно́га премѹ́дрость гд҇нѧ: крѣ́покъ си́лою и҆ ви́дѧй всѧ҄:
19 и҆ ѻ҆́чи є҆гѡ̀ на боѧ́щихсѧ є҆гѡ̀, и҆ то́й позна́етъ всѧ́ко дѣ́ло человѣ́ческо.
20 Не заповѣ́да ни є҆ди́номѹ же нече́ствовати и҆ не дадѐ ѡ҆сла́бы ни є҆ди́номѹ не согрѣша́ти.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 15 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784