1 А҆́ще добро̀ твори́ши, разѹмѣ́й, комѹ̀ твори́ши, и҆ бѹ́детъ благода́ть благи҄мъ твои҄мъ.
2 Добро̀ сотворѝ благочести́вомѹ, и҆ ѡ҆брѧ́щеши воздаѧ́нїе, и҆ а҆́ще не ѿ негѡ̀, то̀ ѿ вы́шнѧгѡ.
3 Не бѹ́детъ добро̀ прилѣжа́щемѹ во ѕлы́хъ и҆ не подаю́щемѹ ми́лостыни.
4 Да́ждь благочести́вомѹ и҆ не застѹпа́й грѣ́шника.
5 Добро̀ сотворѝ смире́нномѹ и҆ не да́ждь нечести́вомѹ: возбранѝ хлѣ́бы твоѧ҄ и҆ не да́ждь є҆мѹ̀, да не тѣ́ми тѧ̀ премо́жетъ:
6 сѹгѹ҄ба бо ѕла҄ ѡ҆брѧ́щеши во всѣ́хъ благи́хъ, ѩ҆̀же а҆́ще сотвори́ши є҆мѹ̀: ѩ҆́кѡ и҆ вы́шнїй возненави́дѣ грѣ́шники и҆ нечести҄вымъ возда́стъ ме́сть.
7 Да́ждь благо́мѹ и҆ не застѹпа́й грѣ́шника.
8 Не позна́нъ бѹ́детъ во благи́хъ дрѹ́гъ и҆ не скры́етсѧ во ѕлы́хъ вра́гъ.
9 Е҆гда̀ во благи́хъ бѹ́детъ мѹ́жъ, вразѝ є҆гѡ̀ во печа́ли сѹ́ть, во ѕлы́хъ же є҆гѡ̀ и҆ дрѹ́гъ разлѹчи́тсѧ.
10 Не и҆мѝ вѣ́ры врагѹ̀ твоемѹ̀ во вѣ́ки: ѩ҆́коже бо мѣ́дь ржа́вѣетъ, та́кѡ и҆ ѕло́ба є҆гѡ̀:
11 и҆ а҆́ще смири́тсѧ и҆ по́йдетъ пони́кнѹвъ, наста́ви дѹ́шѹ твою̀ и҆ храни́сѧ ѿ негѡ̀, и҆ бѹ́деши є҆мѹ̀ ѩ҆́кѡ ѡ҆чище́но зерца́ло, и҆ ѹ҆разѹмѣ́еши, ѩ҆́кѡ не до конца̀ ѡ҆торжа́вѣ:
12 не поста́ви є҆го̀ при себѣ̀, да не когда̀ и҆зри́нѹвъ тѧ̀ ста́нетъ на мѣ́стѣ твое́мъ: не посадѝ є҆го̀ ѡ҆деснѹ́ю себє̀, да не пои́щетъ когда̀ сѣда́лища твоегѡ̀, и҆ на послѣ́докъ ѹ҆разѹмѣ́еши словеса̀ моѧ҄ и҆ ѡ҆ глаго́лѣхъ мои́хъ ѹ҆мили́шисѧ.
13 Кто̀ поми́лѹетъ ѡ҆баѧ́нника ѕмі́емъ ѹ҆сѣ́кнена и҆ всѣ́хъ пристѹпа́ющихъ ко ѕвѣрє́мъ; та́кожде ходѧ́щаго съ мѹ́жемъ грѣ́шникомъ и҆ примѣша́ющагосѧ грѣхѡ́мъ є҆гѡ̀:
14 ча́съ съ тобо́ю пребѹ́детъ, и҆ а҆́ще ѹ҆клони́шисѧ, не стерпи́тъ.
15 Ѹ҆стна́ма свои́ма ѹ҆слади́тъ вра́гъ, и҆ мно́гѡ поше́пчетъ и҆ рече́тъ добро̀ глаго́лѧ: ѻ҆чи́ма свои́ма прослези́тсѧ, а҆ се́рдцемъ свои́мъ ѹ҆совѣ́тѹетъ ври́нѹти тѧ̀ въ ро́въ, и҆ є҆гда̀ ѡ҆брѧ́щетъ вре́мѧ, не насы́титсѧ кро́ве.
16 А҆́ще срѧ́щѹтъ тѧ̀ ѕла҄ѧ, тѹ̀ ѡ҆брѧ́щеши є҆го̀ пе́рвѣе себє̀,
17 и҆ ѩ҆́кѡ помага́ѧй подсѣче́тъ пѧ́тѹ твою̀:
18 покива́етъ главо́ю свое́ю и҆ воспле́щетъ рѹка́ма свои́ма, и҆ мно́гѡ поше́пчетъ и҆ и҆змѣни́тъ лицѐ своѐ.
Нашли в тексте ошибку? Выделите её и нажмите: Ctrl + Enter

Книга Премудрости Иисуса, сына Сирахова, 12 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.