1 Ко́ль добро̀ є҆́сть ѡ҆бличи́ти, не́жели ѩ҆ри́тисѧ та́йнѡ: и҆ и҆сповѣ́даѧйсѧ ѿ ѹ҆мале́нїѧ возбране́нъ бѹ́детъ.
2 Ко́ль добро̀ ѡ҆бличе́нномѹ ѩ҆ви́ти покаѧ́нїе:
3 се́й бо во́льнагѡ и҆збѣжи́тъ грѣха̀.
4 Жела́нїе ско́пчо растли́тъ ли дѣви́цѹ; та́кожде творѧ́й нѹ́ждею сѹды̀.
5 Е҆́сть молча́й ѡ҆брѣта́ѧйсѧ премѹ́дръ, и҆ є҆́сть ненави́димь ѿ мно́гїѧ бесѣ́ды.
6 Е҆́сть молча́й, не и҆́мать бо ѿвѣ́та: и҆ є҆́сть молча́й вѣ́дый вре́мѧ.
7 Человѣ́къ премѹ́дръ ѹ҆молчи́тъ до вре́мене: проде́рзый же и҆ безѹ́мный превосхо́дитъ вре́мѧ.
8 Ѹ҆множа́ѧй словеса̀ ме́рзокъ бѹ́детъ, и҆ восхища́ѧй вла́сть возненави́дѣнъ бѹ́детъ.
9 Е҆́сть благопоспѣ́шство во ѕлы́хъ мѹ́жеви, и҆ є҆́сть и҆з̾ѡбрѣ́тенїе на ѹ҆мале́нїе.
10 Е҆́сть даѧ́нїе, є҆́же тѝ не бѹ́детъ на по́льзѹ, и҆ є҆́сть даѧ́нїе, є҆гѡ́же ѿда́нїе сѹгѹ́бо.
11 Е҆́сть ѹ҆мале́нїе сла́вы ра́ди, и҆ є҆́сть, и҆́же ѿ смире́нїѧ вознесѐ главѹ̀.
12 Е҆́сть кѹпѹ́ѧй мнѡ́гаѧ ма́лымъ и҆ возвраща́ѧй ѧ҆̀ седмери́цею.
13 Премѹ́дрый во словесѝ любе́зна сотвори́тъ себѐ: благѡда́ти же безѹ́мныхъ и҆злїю́тсѧ.
14 Даѧ́нїе безѹ́мнагѡ не ѹ҆по́льзѹетъ тѝ, ѻ҆́чи бо є҆гѡ̀ вмѣ́стѡ є҆ди́нагѡ мно́зи ко воспрїѧ́тїю:
15 ма́лѡ да́стъ, а҆ мно́гѡ поноси́ти бѹ́детъ и҆ ѿве́рзетъ ѹ҆ста̀ своѧ҄ ѩ҆́кѡ проповѣ́дникъ: дне́сь взаи́мъ да́стъ, а҆ ѹ҆́трѡ и҆стѧ́жетъ: ненави́димь человѣ́къ таковы́й гд҇ѹ и҆ человѣ́кѡмъ.
16 Бѹ́й рече́тъ: нѣ́сть мѝ дрѹ́га и҆ нѣ́сть хвалы̀ благи҄мъ мои҄мъ: ѩ҆дѹ́щїи хлѣ́бъ мо́й льсти́ви ѧ҆зы́комъ.
17 Коли́кощи и҆ коли́цы посмѣю́тсѧ є҆мѹ̀;
18 Поползнове́нїе на землѝ лѹ́чше не́же ѿ ѧ҆зы́ка: та́кѡ паде́нїе ѕлы́хъ со тща́нїемъ прїи́детъ.
19 Человѣ́къ безблагода́тенъ ба́снь безвре́менна: во ѹ҆стѣ́хъ ненака́занныхъ пр҇нѡ бѹ́детъ.
20 Ѿ ѹ҆́стъ бѹ́ѧгѡ ѿве́ржена бѹ́детъ при́тча: не и҆́мать бо є҆ѧ̀ рещѝ во вре́мѧ своѐ.
21 Е҆́сть возбранѧ́емый согрѣша́ти ѿ скѹ́дости, и҆ въ поко́и свое́мъ не ѹ҆мили́тсѧ.
22 Е҆́сть погѹблѧ́ѧй дѹ́шѹ свою̀ за сты́дъ, и҆ ѿ лица̀ безѹ́мна погѹби́тъ ю҆̀.
23 Е҆́сть ра́ди стыда̀ ѡ҆бѣща́ѧйсѧ дрѹ́гови, и҆ приѡбрѣ́те є҆го̀ врага̀ тѹ́не.
24 Поро́къ ѕо́лъ человѣ́кѹ лжа̀, и҆ во ѹ҆стѣ́хъ ненака́занныхъ пр҇нѡ бѹ́детъ.
25 Ѹ҆́не є҆́сть та́ть, не́жели пр҇нѡ лжа́й: ѻ҆́ба же па́гѹбѹ наслѣ́дѧтъ.
26 Ѡ҆бы́чай человѣ́ка лжи́ва безче́стїе, и҆ стѹ́дъ є҆гѡ̀ пр҇нѡ съ ни́мъ.
27 Премѹ́дрый словесы̀ произведе́тъ себѐ, и҆ человѣ́къ мѹ́дрый ѹ҆го́денъ бѹ́детъ вельмо́жамъ.
28 Дѣ́лаѧй зе́млю вознесе́тъ сто́гъ сво́й, и҆ ѹ҆гожда́ѧй вельмо́жамъ ѹ҆ми́лостивитъ ѡ҆ непра́вдѣ (свое́й).
29 Мзда̀ и҆ да́рове ѡ҆слѣплѧ́ютъ ѻ҆́чи премѹ́дрыхъ, и҆ ѩ҆́коже бразды҄ на ѹ҆стѣ́хъ ѿвраща́ютъ ѡ҆бличє́нїѧ.
30 Премѹ́дрость сокровє́на и҆ сокро́вище не ѩ҆вле́но, ка́ѧ по́льза є҆́сть во ѻ҆бои́хъ;
31 Лѹ́чше человѣ́къ скрыва́ѧй бѹ́йство своѐ, не́жели человѣ́къ скрыва́ѧй премѹ́дрость свою̀.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 20 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784