1 Сла́ва высоты̀, тве́рдь чистоты̀, зра́къ небесѐ въ видѣ́нїи сла́вы.
2 Со́лнце во ѩ҆вле́нїи возвѣща́ющее во и҆схо́дѣ сосѹ́дъ ди́венъ, дѣ́ло вы́шнѧгѡ.
3 Въ полѹ́дни свое́мъ и҆зсѹша́етъ странѹ̀, и҆ прѧ́мѡ ва́рѹ є҆гѡ̀ кто̀ постои́тъ;
4 (А҆́ки) пе́щь ды́шѹщее въ дѣ́лѣхъ ва́ра, трегѹ́бѡ со́лнце пожига́ющее го́ры: воскѹрє́нїѧ ѻ҆́гнєннаѧ и҆зды́шѹщее и҆ простира́ющее лѹчи҄ ѡ҆мрача́етъ ѻ҆́чи.
5 Ве́лїй гд҇ь сотвори́вый є҆̀, и҆ словесы̀ свои́ми ѹ҆скорѝ ше́ствїе.
6 И҆ лѹна̀ всѣ҄мъ во своѐ вре́мѧ ѩ҆влѧ́етъ лѣ҄та и҆ зна́менїе вѣ́ка.
7 Ѿ лѹны̀ зна́менїе пра́здника: свѣти́ло ѹ҆малѧ́ющеесѧ до конца̀.
8 Мц҇ъ по и҆́мени своемѹ̀ є҆́сть, возраста́ющь ди́внѡ во и҆змѣне́нїи.
9 Сосѹ́дъ ѡ҆полче́нїй на высотѣ̀, на тве́рди небе́снѣй сїѧ́ющь.
10 Добро́та небесѐ, сла́ва ѕвѣ́здъ, красота̀ свѣтѧ́щисѧ на высо́кихъ гд҇нихъ:
11 словесы̀ ст҃а́гѡ ста́нѹтъ по чи́нѹ и҆ не и҆́мѹтъ ѡ҆слабѣ́ти въ стражба́хъ свои́хъ.
12 Ви́ждь дѹгѹ̀ и҆ благословѝ сотво́ршаго ю҆̀, ѕѣлѡ̀ прекра́сна сїѧ́нїемъ свои́мъ:
13 ѡ҆крѹжѝ не́бо ѡ҆крѹже́нїемъ сла́вы, рѹ́цѣ вы́шнѧгѡ простро́стѣ ю҆̀.
14 Повелѣ́нїемъ є҆гѡ̀ потща́сѧ снѣ́гъ, и҆ ѹ҆скорѧ́етъ мо́лнїю сѹдбо́ю свое́ю.
15 Сегѡ̀ ра́ди ѿверзо́шасѧ сокрѡ́вища, и҆ парѧ́тъ ѡ҆́блацы ѩ҆́кѡ пти҄цы.
16 Вели́чїемъ свои́мъ ѹ҆крѣпѝ ѡ҆́блаки, и҆ сокрѹши́шасѧ ка́менїе гра́дное:
17 и҆ воззрѣ́нїемъ є҆гѡ̀ подви́жѹтсѧ го́ры, и҆ во́лею є҆гѡ̀ возвѣ́етъ ю҆́гъ.
18 Гла́съ гро́ма є҆гѡ̀ поразѝ зе́млю, и҆ бѹ́рѧ сѣ́верова и҆ ви́хорь вѣ́тра.
19 ѩ҆́кѡ пти҄цы парѧ́щыѧ сы́плетъ снѣ́гъ, и҆ ѩ҆́коже прѹ́зи садѧ́щїисѧ спадє́нїѧ є҆гѡ̀.
20 Добро́тѣ бѣ́лости є҆гѡ̀ подиви́тсѧ ѻ҆́ко, и҆ ѡ҆ дождѝ є҆гѡ̀ ѹ҆жа́снетсѧ се́рдце.
21 И҆ сла́нѹ ѩ҆́кѡ со́ль на зе́млю сы́плетъ, и҆ сме́рзшисѧ быва́етъ на концы̀ ѻ҆стра̀.
22 Стѹде́нъ вѣ́тръ сѣ́верный возвѣ́етъ, и҆ сме́рзнетсѧ ле́дъ ѿ воды̀: на всѧ́цѣмъ собра́нїи воднѣ́мъ ѡ҆бита́ти и҆́мать, и҆ а҆́ки во броню̀ ѡ҆блече́тсѧ вода̀.
23 Поѧ́стъ го́ры и҆ пѹсты҄ни пожже́тъ, и҆ ѹ҆гаси́тъ травѹ̀ ѩ҆́кѡ ѻ҆́гнь.
24 И҆зцѣле́нїе всѣ́хъ со тща́нїемъ мгла̀: роса̀ срѣта́ющаѧ ѿ ва́ра ѹ҆тиши́тъ.
25 Мы́слїю є҆гѡ̀ преста̀ бе́здна, и҆ насадѝ въ не́й (гд҇ь) ѻ҆́стровы.
26 Пла́вающїи по мо́рю повѣ́даютъ бѣ́дство є҆гѡ̀, и҆ слѹ́хомъ ѹ҆ше́съ на́шихъ чѹди́мсѧ,
27 и҆ та́мѡ (сѹ́ть) пресла҄вна и҆ чѹ҄дна дѣла̀ є҆гѡ̀, разли́чїе всѧ́кагѡ живо́тнагѡ, созда́нїе ки́тѡвъ.
28 И҆́мъ благополѹ́чный коне́цъ сво́й полѹча́ютъ и҆ сло́вомъ є҆гѡ̀ составлѧ́ютсѧ всѧ́чєскаѧ.
29 Мно́гѡ и҆́мамы рещѝ, и҆ не и҆́мамы пости́гнѹти, и҆ сконча́нїе слове́съ: всѐ є҆́сть то́й.
30 Сла́вѧще є҆го̀ гдѣ̀ ѹ҆крѣпи́мсѧ; то́й бо вели́къ па́че всѣ́хъ дѣ́лъ свои́хъ:
31 стра́шенъ гд҇ь и҆ вели́къ ѕѣлѡ̀, и҆ чѹ́дно могѹ́тство є҆гѡ̀.
32 Сла́вѧще гд҇а вознеси́те, є҆ли́кѡ а҆́ще мо́жете, превзы́детъ бо и҆ є҆щѐ:
33 возносѧ́ще є҆го̀ ѹ҆мно́житесѧ крѣ́постїю: не трѹди́тесѧ, не и҆́мате бо пости́гнѹти.
34 Кто̀ ви́дѣ є҆го̀ и҆ и҆сповѣ́сть; и҆ кто̀ возвели́читъ є҆го̀, ѩ҆́коже є҆́сть;
35 Мнѡ́га сокровє́на сѹ́ть вѧ҄щшаѧ си́хъ: ма҄лаѧ бо ви́дѣхомъ дѣ́лъ є҆гѡ̀.
36 Всѧ҄ бо сотворѝ гд҇ь и҆ бл҃гочести́вымъ дадѐ премѹ́дрость.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 43 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784