1 Старѣ́йшинѹ ли тѧ̀ поста́виша, не возноси́сѧ, но бѹ́ди въ ни́хъ ѩ҆́кѡ є҆ди́нъ ѿ ни́хъ:
2 попецы́сѧ и҆́ми, и҆ та́кѡ сѧ́ди. И҆ всю̀ потре́бѹ твою̀ сотвори́въ возлѧ́зи,
3 да возвесели́шисѧ и҆́хъ ра́ди и҆ красоты̀ ра́ди прїи́меши вѣне́цъ.
4 Глаго́ли, старѣ́йшино, подоба́етъ бо тѝ,
5 и҆спы́тною хи́тростїю и҆ не возбранѝ мѹсїкі́и:
6 и҆дѣ́же слѹ́шанїе (бѹ́детъ), не и҆злива́й бесѣ́ды и҆ без̾ вре́мене не мѹдри́сѧ.
7 Печа́ть а҆нѳра́ѯа на ѹ҆краше́нїи зла́тѣ, и҆ сладкогла́сїе мѹсїкі́євъ въ пи́ршествѣ вїна̀.
8 Во ѹ҆краше́нїи златѣ́мъ печа́ть смара́гдова, сладкопѣ́нїе мѹсїкі́євъ по сла́дцѣмъ вїнѣ̀.
9 Глаго́ли, ю҆́ноше, а҆́ще тебѣ̀ є҆́сть потре́ба, є҆два̀ два́щи, а҆́ще вопроше́нъ бѹ́деши:
10 сократѝ сло́во, ма́лыми мнѡ́гаѧ (и҆зглаго́ли): бѹ́ди ѩ҆́кѡ вѣ́дый и҆ вкѹ́пѣ молчѧ̀.
11 Посредѣ̀ вельмо́жъ не ра́венъ твори́сѧ и҆ и҆но́мѹ глаго́лющѹ не многосло́ви.
12 Пре́жде гро́ма предварѧ́етъ мо́лнїѧ, и҆ пре́жде стыдли́вагѡ предварѧ́етъ благода́ть.
13 Во вре́мѧ востава́й, а҆ не послѣдѝ (и҆ны́хъ), въ до́мъ ѿидѝ и҆ не лѣни́сѧ:
14 та́мѡ и҆гра́й и҆ творѝ помышлє́нїѧ твоѧ҄, и҆ не согрѣша́й сло́вомъ го́рдымъ.
15 И҆ ѡ҆ си́хъ благословѝ сотво́ршаго тѧ̀ и҆ ѹ҆поева́ющаго тѧ̀ ѿ бл҃гъ свои́хъ.
16 Боѧ́йсѧ гд҇а прїи́метъ наказа́нїе, и҆ ѹ҆́тренюющїи ѡ҆брѧ́щѹтъ бл҃говоле́нїе.
17 И҆ща́й зако́на насы́титсѧ є҆гѡ̀, и҆ лицемѣ́рствѹѧй соблазни́тсѧ ѡ҆ не́мъ.
18 Боѧ́щїисѧ гд҇а ѡ҆брѧ́щѹтъ сѹ́дъ и҆ ѡ҆правда҄нїѧ ѩ҆́кѡ свѣ́тъ возжгѹ́тъ.
19 Человѣ́къ грѣ́шникъ ѹ҆кланѧ́етсѧ ѿ ѡ҆бличе́нїѧ и҆ по во́ли свое́й ѡ҆брѣта́етъ и҆звине́нїе.
20 Мѹ́жъ совѣ́тный не пре́зритъ размышле́нїѧ, чѹжды́й же и҆ го́рдый не ѹ҆бои́тсѧ стра́ха и҆ по сотворе́нїи свое́мъ без̾ совѣ́та.
21 Без̾ совѣ́та ничесо́же творѝ, и҆ є҆гда̀ сотвори́ши, не раскаѧва́йсѧ.
22 На пѹтѝ паде́нїѧ не ходѝ и҆ не претыка́йсѧ ѡ҆ ка́менїе:
23 не вѣ́рѹй пѹтѝ, въ не́мже не претыка́ешисѧ, и҆ ѿ ча҄дъ свои́хъ храни́сѧ.
24 Во всѧ́цѣмъ дѣ́лѣ бла́зѣ вѣ́рѹй дѹше́ю твое́ю, и҆́бо сїѐ є҆́сть соблюде́нїе за́повѣдїй.
25 Вѣ́рѹѧй зако́нѹ внима́етъ за́повѣдемъ, и҆ ѹ҆пова́ѧй на гд҇а не ѹ҆ма́литсѧ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 32 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784