1 Моли́тва ї҆исѹ́са сы́на сїра́хова. И҆сповѣ́мсѧ тебѣ̀, гд҇и цр҃ю̀, и҆ восхвалю̀ тебѐ, бг҃а сп҃са моего̀, и҆сповѣ́даюсѧ и҆́мени твоемѹ̀,
2 ѩ҆́кѡ покрови́тель и҆ помо́щникъ бы́лъ є҆сѝ мѝ
3 и҆ и҆зба́вилъ є҆сѝ тѣ́ло моѐ ѿ па́гѹбы и҆ ѿ сѣ́ти клеветы̀ ѧ҆зы́чныѧ, ѿ ѹ҆сте́нъ дѣ́лающихъ лжѹ̀, и҆ на проти́вѧщихсѧ мѝ бы́лъ є҆сѝ помо́щникъ,
4 и҆ и҆зба́вилъ мѧ̀ є҆сѝ по мно́жествѹ мл҇ти и҆́мене твоегѡ̀ ѿ скрежета́нїѧ гото́выхъ снѣ́сти мѧ̀,
5 и҆з̾ рѹкѝ и҆́щѹщихъ дѹшѝ моеѧ̀, ѿ мно́гихъ скорбе́й, ѩ҆̀же и҆мѣ́хъ,
6 ѿ стѹжа́нїѧ ѻ҆́гненнагѡ ѡ҆́крестъ и҆ ѿ среды̀ ѻ҆гнѧ̀, и҆дѣ́же не сожего́хсѧ,
7 и҆з̾ глѹбины̀ чре́ва а҆́дова и҆ ѿ ѧ҆зы́ка нечи́ста и҆ словесѐ ло́жна, ко царю̀ ѿ ѡ҆болга́нїѧ ѧ҆зы́ка непра́ведна.
8 Прибли́жисѧ да́же до сме́рти дѹша̀ моѧ̀,
9 и҆ живо́тъ мо́й бѣ̀ бли́з̾ а҆́да преиспо́днѧгѡ.
10 Ѡ҆бдержа́ша мѧ̀ ѿвсю́дѹ, и҆ не бѣ̀ помога́ющагѡ: воззрѣ́хъ на по́мощь человѣ́чѹ, и҆ не бѣ̀.
11 И҆ помѧнѹ́хъ мл҇ть твою̀, гд҇и, и҆ дѣѧ́нїе твоѐ, є҆́же ѿ вѣ́ка:
12 ѩ҆́кѡ и҆з̾има́еши терпѧ́щихъ тѧ̀, (гд҇и,) и҆ сп҃са́еши и҆̀хъ ѿ рѹ́къ вра́жїихъ.
13 И҆ вознесо́хъ ѿ землѝ моле́нїе моѐ и҆ ѡ҆ и҆збавле́нїи ѿ сме́рти помоли́хсѧ:
14 и҆ призва́хъ гд҇а, ѻ҆ц҃а̀ гд҇а моегѡ̀, не ѡ҆ста́вити менѐ во дни҄ ско́рби, во вре́мѧ го́рдыхъ без̾ по́мощи.
15 Восхвалю̀ и҆́мѧ твоѐ непреста́ннѡ и҆ воспою̀ тѧ̀ во и҆сповѣ́данїи. И҆ ѹ҆слы́шана бы́сть моли́тва моѧ̀.
16 Сп҇лъ бо мѧ̀ є҆сѝ ѿ па́гѹбы и҆ и҆з̾ѧ́лъ є҆сѝ мѧ̀ ѿ вре́мене лѹка́вна.
17 Сегѡ̀ ра́ди и҆сповѣ́мсѧ тебѣ̀, и҆ восхвалю̀ тѧ̀, и҆ бл҃гословлю̀ и҆́мѧ твоѐ, гд҇и.
18 Е҆щѐ ю҆́нъ сы́й, пре́жде не́же стра́нствовати мѝ, и҆ска́хъ премѹ́дрости ѩ҆́вѣ въ моли́твѣ мое́й:
19 пред̾ це́рковїю моли́хсѧ ѡ҆ не́й, и҆ да́же до послѣ́днихъ взыщѹ̀ є҆ѧ̀: ѿ цвѣ́та, ѩ҆́кѡ зрѣ́ющагѡ гро́зда,
20 возвесели́сѧ се́рдце моѐ ѡ҆ не́й: по́йде нога̀ моѧ̀ въ пра́вости, ѿ ю҆́ности моеѧ̀ и҆зслѣ́дихъ ю҆̀.
21 Приклони́хъ ма́лѡ ѹ҆́хо моѐ и҆ прїѧ́хъ, и҆ мно́гое ѡ҆брѣто́хъ себѣ̀ наказа́нїе:
22 пред̾ѹспѣ́ѧнїе бы́сть мѝ въ не́й.
23 Даю́щемѹ мнѣ̀ премдрость возда́мъ сла́вѹ.
24 Ѹ҆мы́слихъ бо твори́ти ю҆̀, и҆ поревнова́хъ благо́мѹ, и҆ не постыжѹ́сѧ.
25 Борѧ́шесѧ дѹша̀ моѧ̀ ѡ҆ не́й, и҆ въ творе́нїи мое́мъ и҆спыта́хъ:
26 рѹ́цѣ моѝ воздѣ́хъ на высотѹ̀ и҆ невѣ҄дѣнїѧ є҆ѧ̀ ѹ҆разѹмѣ́хъ.
27 Дѹ́шѹ мою̀ напра́вихъ къ не́й,
28 се́рдце стѧжа́хъ съ не́ю и҆спе́рва, и҆ во ѡ҆чище́нїи ѡ҆брѣто́хъ ю҆̀: сегѡ̀ ра́ди не ѡ҆ста́вленъ бѹ́дѹ.
29 И҆ ѹ҆тро́ба моѧ̀ смѧте́сѧ и҆́щѹщи є҆ѧ̀: тѣ́мже стѧжа́хъ благо́е стѧжа́нїе.
30 Дадѐ гд҇ь ѧ҆зы́къ мѝ мздѹ̀ мою̀, и҆ тѣ́мъ восхвалю̀ є҆го̀.
31 Прибли́житесѧ ко мнѣ̀, ненака́заннїи, и҆ водвори́тесѧ въ домѹ̀ наказа́нїѧ.
32 Почто̀ лиша́етесѧ, глаго́лете, въ си́хъ, и҆ дѹ́ши ва́шѧ жа́ждѹтъ ѕѣлѡ̀;
33 Ѿверзо́хъ ѹ҆ста̀ моѧ҄ и҆ глаго́лахъ: стѧжи́те себѣ̀ без̾ сребра̀ (мѹ́дрость):
34 вы́ю ва́шѹ подложи́те под̾ и҆́го, и҆ да прїи́метъ дѹша̀ ва́ша наказа́нїе: бли́з̾ є҆́сть ѡ҆брѣстѝ ю҆̀.
35 Ви́дите ѻ҆чи́ма ва́шима, ѩ҆́кѡ ма́лѡ трѹди́хсѧ и҆ ѡ҆брѣто́хъ себѣ̀ мно́гъ поко́й.
36 Приѡбщи́тесѧ наказа́нїю мно́гимъ число́мъ сребра̀, и҆ мно́го зла́то пристѧ́жете є҆́ю.
37 Да возвесели́тсѧ дѹша̀ ва́ша въ мл҇ти є҆гѡ̀, и҆ да не постыдите́сѧ въ хвале́нїи є҆гѡ̀.
38 Дѣ́лайте дѣ́ло ва́ше пре́жде вре́мене, и҆ да́стъ мздѹ̀ ва́шѹ во вре́мѧ своѐ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 51 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784