1 Любѧ́й сы́на своего̀ ѹ҆части́тъ є҆мѹ̀ ра҄ны, да возвесели́тсѧ въ послѣ҄днѧѧ своѧ҄.
2 Наказѹ́ѧй сы́на своего̀ наслади́тсѧ ѡ҆ не́мъ и҆ посредѣ̀ зна́емыхъ ѡ҆ не́мъ похва́литсѧ.
3 Ѹ҆ча́й сы́на своего̀ раздражи́тъ врага̀ и҆ пред̾ дрѹ́ги ѡ҆ не́мъ возра́дѹетсѧ.
4 Ѹ҆́мре ѻ҆те́цъ є҆гѡ̀, и҆ а҆́ки не ѹ҆́мре: подо́бна бо себѣ̀ ѡ҆ста́ви по себѣ̀.
5 Во житїѝ свое́мъ ви́дѣ и҆ возвесели́сѧ ѡ҆ не́мъ и҆ при кончи́нѣ свое́й не ѡ҆скорби́сѧ:
6 проти́вѹ врагѡ́мъ ѡ҆ста́ви ме́стника и҆ дрѹгѡ́мъ воздаю́ща благода́ть.
7 Ѹ҆гожда́ѧй сы́нѹ ѡ҆бѧ́жетъ стрѹ́пы є҆гѡ̀, и҆ ѡ҆ всѧ́цѣмъ во́пли возмѧте́тсѧ ѹ҆тро́ба є҆гѡ̀.
8 Ко́нь неѹкроще́нъ свирѣ́пъ быва́етъ, и҆ сы́нъ самово́льный проде́рзъ бѹ́детъ.
9 Ласка́й ча́до, и҆ ѹ҆страши́тъ тѧ̀, и҆гра́й съ ни́мъ, и҆ ѡ҆печа́литъ тѧ̀.
10 Не смѣ́йсѧ съ ни́мъ, да не поболи́ши ѡ҆ не́мъ и҆ на послѣ́докъ сти́снеши зѹ́бы твоѧ҄.
11 Не да́ждь є҆мѹ̀ вла́сти въ ю҆́ности и҆ не пре́зри невѣ́дѣнїѧ є҆гѡ̀:
12 слѧцы̀ вы́ю є҆гѡ̀ въ ю҆́ности и҆ сокрѹшѝ ре́бра є҆гѡ̀, до́ндеже мла́дъ є҆́сть, да не когда̀ ѡ҆жестѣ́въ не покори́ттисѧ.
13 Накажѝ сы́на твоего̀ и҆ дѣ́лай и҆́мъ, да не въ безстѹ́дїи є҆гѡ̀ поткне́шисѧ.
14 Лѹ́чше ни́щь здра́въ и҆ крѣ́покъ въ си́лѣ свое́й, не́жели бога́тъ ѹ҆ра́ненъ тѣ́ломъ свои́мъ.
15 Здра́вїе и҆ крѣ́пость лѹ́чше є҆́сть всѧ́кагѡ зла́та, и҆ тѣ́ло здра́вое, не́жели бога́тство безчи́сленное.
16 Нѣ́сть бога́тство лѹ́чше здра́вїѧ тѣле́снагѡ, и҆ нѣ́сть весе́лїе па́че ра́дости серде́чныѧ.
17 Лѹ́чше є҆́сть сме́рть па́че живота̀ го́рька и҆лѝ недѹ́га до́лгагѡ.
18 Блага҄ѧ и҆злїѧ҄ннаѧ пред̾ ѹ҆сты҄ затворе́нными предложє́нїѧ бра́шенъ предлежа҄щаѧ ѹ҆ гро́ба.
19 Ка́ѧ по́льза їдѡлѹ ѿ же́ртвы; не и҆́мать бо ѩ҆́сти, ни ѡ҆бонѧ́ти:
20 та́кѡ гони́мый ѿ гд҇а,
21 зрѧ́й ѻ҆чи́ма и҆ стенѧ́й, ѩ҆́коже є҆ѵнѹ́хъ ѡ҆сѧза́ѧй дѣви́цѹ и҆ воздыха́ѧй.
22 Не вда́ждь въ печа́ль дѹ́шѹ твою̀ и҆ не ѡ҆скорбѝ себѐ совѣ́томъ твои́мъ.
23 Весе́лїе се́рдца живо́тъ человѣ́ка, и҆ ра́дованїе мѹ́жа долгоде́нствїе.
24 Любѝ дѹ́шѹ твою̀ и҆ ѹ҆тѣша́й се́рдце твоѐ, и҆ печа́ль ѿ себє̀ ѿри́ни дале́че:
25 мнѡ́ги бо печа́ль ѹ҆бѝ, и҆ нѣ́сть по́льзы въ не́й.
26 Рве́нїе и҆ ѩ҆́рость ѹ҆малѧ́ютъ дни҄, и҆ печа́ль пре́жде вре́мене ста́рость наво́дитъ.
27 Свѣ́тло се́рдце и҆ бла́го ѡ҆ бра́шнѣ и҆ ѡ҆ ѩ҆́ди свое́й попече́тсѧ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 30 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784