1 Гд҇ь созда̀ ѿ землѝ человѣ́ка, и҆ па́ки возвратѝ є҆го̀ въ ню̀.
2 Дни҄ числа̀ и҆ вре́мѧ дадѐ и҆̀мъ, и҆ дадѐ и҆̀мъ вла́сть над̾ сѹ́щими на не́й.
3 ѩ҆́коже ѻ҆нѝ са́ми, ѡ҆блечѐ и҆̀хъ крѣ́постїю, и҆ по ѡ҆́бразѹ своемѹ̀ сотворѝ ѧ҆̀:
4 и҆ положѝ стра́хъ є҆гѡ̀ на всѧ́цѣй пло́ти, є҆́же вла́стелствовати ѕвѣрьмѝ (и҆ скѡты̀) и҆ пти́цами.
5 Помышле́нїе и҆ ѧ҆зы́къ и҆ ѻ҆́чи, ѹ҆́ши и҆ се́рдце дадѐ и҆̀мъ размышлѧ́ти:
6 хѹдо́жествомъ ра́зѹма и҆спо́лни ѧ҆̀ и҆ дѡ́браѧ и҆ ѕла҄ѧ показа̀ и҆̀мъ.
7 Положи́лъ є҆́сть ѻ҆́ко своѐ на сердца́хъ и҆́хъ, показа́ти и҆̀мъ вели́чество дѣ́лъ свои́хъ,
8 да и҆́мѧ ст҃ы́ни є҆гѡ̀ восхва́лѧтъ и҆ да повѣ́даютъ вели́чєства дѣ́лъ є҆гѡ̀.
9 Приложи́лъ и҆̀мъ хѹдо́жество и҆ зако́нъ живота̀ дадѐ въ наслѣ́дїе и҆̀мъ.
10 Завѣ́тъ вѣ́чный поста́ви съ ни́ми и҆ сѹдбы҄ своѧ҄ показа̀ и҆̀мъ.
11 Вели́чество сла́вы ви́дѣша ѻ҆чеса̀ и҆́хъ, и҆ сла́вѹ гла́са и҆́хъ слы́ша ѹ҆́хо и҆́хъ.
12 И҆ речѐ и҆̀мъ: внемли́те ѿ всѧ́кїѧ непра́вды. и҆ заповѣ́да и҆̀мъ комѹ́ждо ѡ҆ и҆́скреннемъ.
13 Пѹтїѐ и҆́хъ пред̾ ни́мъ вы́нѹ, не ѹ҆кры́ютсѧ ѿ ѻ҆́чїю є҆гѡ̀.
14 Комѹ́ждо ѩ҆зы́кѹ ѹ҆стро́илъ вожда̀,
15 и҆ ча́сть гд҇нѧ ї҆и҃ль є҆́сть.
16 Всѧ҄ дѣла̀ и҆́хъ ѩ҆́кѡ со́лнце пред̾ ни́мъ, и҆ ѻ҆́чи є҆гѡ̀ вы́нѹ на пѹте́хъ и҆́хъ:
17 не ѹ҆кры́шасѧ непра҄вды и҆́хъ ѿ негѡ̀, и҆ всѝ грѣсѝ и҆́хъ пред̾ гд҇емъ.
18 Ми́лостынѧ мѹ́жа ѩ҆́кѡ печа́ть съ ни́мъ, и҆ благода́ть человѣ́чѹ ѩ҆́кѡ зѣ́ницѹ соблюде́тъ.
19 По си́хъ воста́нетъ и҆ возда́стъ и҆̀мъ, и҆ воздаѧ́нїе и҆́хъ на главѹ̀ и҆́хъ возда́стъ:
20 ѻ҆ба́че ка́ющымсѧ да́лъ є҆́сть возвраще́нїе и҆ ѹ҆тѣ́ши и҆знемога́ющихъ терпѣ́нїемъ.
21 Ѡ҆брати́сѧ ѹ҆̀бо ко гд҇ѹ и҆ ѡ҆ста́ви грѣхѝ:
22 помоли́сѧ пред̾ лице́мъ и҆ ѹ҆ма́ли претыка҄нїѧ:
23 восходѝ къ вы́шнемѹ и҆ ѿврати́сѧ ѿ непра́вды, и҆ ѕѣлѡ̀ возненави́ди ме́рзость.
24 Вы́шнѧго кто̀ восхва́литъ во а҆́дѣ, вмѣ́стѡ живы́хъ и҆ даю́щихъ и҆сповѣ́данїе;
25 Ѿ мертвеца̀ ѩ҆́кѡ ничто̀ сѹ́щагѡ погиба́етъ и҆сповѣ́данїе:
26 живы́й же и҆ здра́вый восхва́литъ гд҇а.
27 Ко́ль вели́ка мл҇ть гд҇нѧ и҆ ѡ҆чище́нїе ѡ҆браща́ющымсѧ къ немѹ̀;
28 Не мо́гѹтъ бо всѧ҄ бы́ти въ человѣ́цѣхъ:
29 ѩ҆́кѡ не безсме́ртенъ сы́нъ человѣ́ческїй.
30 Что̀ свѣтлѣ́е со́лнца; и҆ то̀ и҆зчеза́етъ: и҆ ѕло̀ помы́слитъ пло́ть и҆ кро́вь.
31 Си́лѹ высоты̀ небе́сныѧ то́й са́мъ назира́етъ, человѣ́цы же всѝ землѧ̀ и҆ пе́пелъ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 17 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784