1 Соблюда́ѧй зако́нъ ѹ҆множа́етъ приношє́нїѧ, прино́ситъ же́ртвѹ спасе́нїѧ внима́ѧй за́повѣдемъ.
2 Воздаѧ́й благода́ть а҆́ки приносѧ́й семїда́лъ, и҆ творѧ́й ми́лостыню а҆́ки жрѧ́й же́ртвѹ хвале́нїѧ.
3 Бл҃говоле́нїе гд҇не є҆́же ѿстѹпи́ти ѿ лѹка́вства, и҆ ѡ҆чище́нїе є҆́сть є҆́же ѿстѹпи́ти ѿ непра́вды.
4 Не ѩ҆ви́сѧ пред̾ гд҇емъ то́щь: всѧ҄ бо сїѧ҄ за́повѣди ра́ди.
5 Приноше́нїе пра́веднагѡ ѹ҆тѹчнѧ́етъ ѻ҆лта́рь, и҆ благоѹха́нїе є҆гѡ̀ пред̾ вы́шнимъ:
6 же́ртва мѹ́жа пра́веднагѡ прїѧ́тна, и҆ па́мѧть є҆ѧ̀ не забве́на бѹ́детъ.
7 Ѻ҆́комъ благи́мъ просла́ви гд҇а и҆ не ѹ҆ма́ли ѿ нача́тка рѹ́къ твои́хъ:
8 во всѧ́цѣмъ даѧ́нїи ве́село и҆мѣ́й лицѐ твоѐ и҆ со весе́лїемъ ѡ҆свѧтѝ десѧти́нѹ.
9 Да́ждь вы́шнемѹ по даѧ́нїю є҆гѡ̀, и҆ ѻ҆́комъ благи́мъ приѡбрѣ́тенїе рѹкѝ:
10 ѩ҆́кѡ гд҇ь воздаѧ́й є҆́сть и҆ седмери́цею возда́стъ тѝ.
11 Да́ра не ѹ҆малѧ́й, и҆́бо не прїи́метъ, и҆ не внима́й же́ртвѣ непра́веднѣй:
12 ѩ҆́кѡ гд҇ь сѹдїѧ̀ є҆́сть, и҆ нѣ́сть ѹ҆ негѡ̀ сла́вы лица̀.
13 Не прїи́метъ лица̀ на ѹ҆бо́га и҆ моли́твѹ ѡ҆би́димагѡ ѹ҆слы́шитъ:
14 не пре́зритъ моли́твы си́рагѡ, ни вдови́цы, є҆гда̀ и҆злїе́тъ проше́нїе.
15 Не сле́зы ли вдови҄чи по лани́тома текѹ́тъ, и҆ во́пль є҆ѧ̀ на наве́дшаго ѧ҆̀;
16 Слѹжа́й (бг҃ѹ) во благоволе́нїи прїѧ́тъ бѹ́детъ, и҆ моли́тва є҆гѡ̀ до ѡ҆́блакъ до́йдетъ:
17 моли́тва смире́ннагѡ про́йде ѡ҆́блаки, и҆ до́ндеже прибли́житсѧ, не ѹ҆тѣ́шитсѧ,
18 и҆ не ѿстѹ́питъ, до́ндеже посѣти́тъ вы́шнїй, сѹ́дитъ въ пра́вдѹ и҆ сотвори́тъ сѹ́дъ:
19 и҆ гд҇ь не заме́длитъ, нижѐ и҆́мать долготерпѣ́ти ѡ҆ ни́хъ, до́ндеже сокрѹши́тъ чрє́сла неми́лостивыхъ.
20 И҆ ѩ҆зы́кѡмъ возда́стъ ме́сть, до́ндеже потреби́тъ мно́жество досади́телей и҆ ски́птры непра́ведныхъ сокрѹши́тъ:
21 до́ндеже возда́стъ человѣ́кѹ по дѣѧ́нїємъ є҆гѡ̀, по дѣлѡ́мъ человѣ́чєскимъ и҆ помышле́нїємъ и҆́хъ:
22 до́ндеже разсѹ́дитъ сѹдо́мъ лю́ди своѧ҄ и҆ возвесели́тъ ѧ҆̀ мл҇тїю свое́ю.
23 Ко́ль красна̀ ми́лость во вре́мѧ ско́рби є҆гѡ̀, ѩ҆́коже ѡ҆́блацы дожде́внїи во вре́мѧ бездо́ждїѧ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 35 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784