1 Жены̀ до́брыѧ блаже́нъ є҆́сть мѹ́жъ, и҆ число̀ дні́й є҆гѡ̀ сѹгѹ́бо.
2 Жена̀ до́блѧѧ весели́тъ мѹ́жа своего̀ и҆ лѣ҄та є҆гѡ̀ и҆спо́лнитъ ми́ромъ.
3 Жена̀ добра̀ ча́сть блага̀, въ ча́сти боѧ́щихсѧ гд҇а дана̀ бѹ́детъ.
4 Бога́тагѡ же и҆ ѹ҆бо́гагѡ се́рдце бла́го, во всѧ́ко вре́мѧ лицѐ ти́хо.
5 Ѿ тре́хъ ѹ҆боѧ́сѧ се́рдце моѐ, и҆ ѿ лица̀ четве́ртагѡ ѹ҆страши́хсѧ:
6 преда́нїѧ гра́да и҆ собра́нїѧ наро́да, и҆ ѡ҆болга́нїѧ над̾ сме́рть, всѧ҄ тѧ́жєстна.
7 Болѣ́знь се́рдца и҆ сѣ́тованїе жена̀ ревни́ва ѡ҆ женѣ̀,
8 и҆ ѩ҆́зва ѧ҆зы́ка всѣ҄мъ приѡбща́ющаѧсѧ.
9 Воло́вое и҆́го дви́жимо жена̀ лѹка́вна, держа́йсѧ є҆ѧ̀ ѩ҆́кѡ є҆́млѧйсѧ скорпі́и.
10 Гнѣ́въ вели́къ жена̀ пїѧ́нчива, и҆ стѹда̀ своегѡ̀ не покры́етъ.
11 Блѹ́дъ же́нскїй въ возвыше́нїи ѻ҆че́съ и҆ бровьмѝ є҆ѧ̀ позна́нъ бѹ́детъ.
12 Над̾ дще́рїю безстѹ́дною ѹ҆твердѝ стра́жѹ, да не попѹще́нїе ѡ҆брѣ́тши ѹ҆потреби́тъ себѐ.
13 Вслѣ́дъ безстѹ́дна ѻ҆́ка сохрани́сѧ и҆ не диви́сѧ, а҆́ще въ тѧ̀ согрѣши́тъ:
14 ѩ҆́кѡ жа́жденъ пѹ́тникъ ѿве́рзетъ ѹ҆ста̀ и҆ ѿ всѧ́кїѧ воды̀ бли́жнїѧ и҆спїе́тъ,
15 прѧ́мѡ всѧ́кагѡ кола̀ сѧ́детъ и҆ прѧ́мѡ стрѣлы̀ ѿве́рзетъ тѹ́лъ.
16 Благода́ть же́нска возвесели́тъ мѹ́жа є҆ѧ̀, и҆ кѡ́сти є҆гѡ̀ ѹ҆тѹчни́тъ хѹдо́жество є҆ѧ̀.
17 Даѧ́нїе гд҇не жена̀ молчали́ва, и҆ нѣ́сть и҆скѹ́па нака́занныѧ дѹшѝ.
18 Благода́ть на благода́ти жена̀ стыдли́ва,
19 и҆ нѣ́сть мѣ́рило всѧ́кое досто́йное возде́ржныѧ дѹшѝ.
20 Со́лнце восходѧ́щее на высо́кихъ гд҇нихъ,
21 и҆ добро́та жены̀ до́брыѧ въ красотѣ̀ до́мѹ є҆ѧ̀:
22 свѣти́лникъ сїѧ́ѧ на свѣ́щницѣ свѧ́тѣ, и҆ добро́та лица̀ на во́зрастѣ постоѧ́ннѣмъ.
23 Столпѝ зла́ти на подсто́лпїихъ сре́брѧныхъ, и҆ но́зѣ кра́сни на плесна́хъ до́брѣ стоѧ́щихъ.
24 Ѡ҆ двои́хъ печа́льно бы́сть се́рдце моѐ, и҆ ѡ҆ тре́тїемъ ѩ҆́рость мѝ на́йде:
25 мѹ́жъ боре́цъ лиша́ѧсѧ за скѹдотѹ̀, и҆ мѹ́жїе разѹ́миви а҆́ще ѿринове́ни бѹ́дѹтъ:
26 возвраща́ѧсѧ ѿ пра́вды на грѣ́хъ, гд҇ь ѹ҆гото́витъ є҆го̀ на ме́чь.
27 Е҆два̀ и҆́зметсѧ кѹпе́цъ ѿ погрѣше́нїѧ, и҆ не ѡ҆правди́тсѧ корче́мникъ ѿ грѣха̀.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 26 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784