1 И҆ воста̀ и҆лїа̀ про҇ро́къ ѩ҆́кѡ ѻ҆́гнь, и҆ сло́во є҆гѡ̀ ѩ҆́кѡ свѣща̀ горѧ́ше:
2 и҆́же нанесѐ на нѧ̀ гла́дъ и҆ ре́вностїю свое́ю ѹ҆ма́ли ѧ҆̀,
3 сло́вомъ гд҇нимъ ѹ҆держа̀ не́бо и҆ сведѐ та́кѡ три́жды ѻ҆́гнь съ небесѐ.
4 Ко́ль просла́вилсѧ є҆сѝ, и҆лїѐ, чѹдесы̀ твои́ми, и҆ кто̀ подо́бенъ тебѣ̀ похвали́тисѧ;
5 Воздви́гнѹвъ мертвеца̀ ѿ сме́рти и҆ и҆з̾ а҆́да сло́вомъ вы́шнѧгѡ,
6 сведы́й цари҄ въ па́гѹбѹ и҆ просла́влєнныѧ ѿ ѻ҆дра̀ и҆́хъ,
7 слы́шавый въ сїна́и ѡ҆бличе́нїе и҆ въ хѡри́вѣ сѹдбы҄ ѿмще́нїѧ,
8 помазѹ́ѧй цари҄ на воздаѧ́нїе и҆ про҇ро́ки прее́мники по себѣ̀,
9 взѧ́выйсѧ ви́хромъ ѻ҆́гненнымъ на колесни́цѣ ко́ней ѻ҆́гненныхъ,
10 впи́санъ во ѡ҆бличє́нїѧ на времена̀, ѹ҆толи́ти гнѣ́въ пре́жде ѩ҆́рости и҆ ѡ҆брати́ти се́рдце ѻ҆́тчее къ сы́нѹ и҆ ѹ҆стро́ити кѡлѣ́на ї҆а҄кѡвлѧ.
11 Блаже́ни ви́дѣвшїи тѧ̀ и҆ любо́вїю ѹ҆кра́шеннїи.
12 И҆́бо мы̀ житїе́мъ поживе́мъ.
13 И҆лїа̀, и҆́же ви́хромъ покрове́нъ бы́сть, и҆ є҆лїссе́й и҆спо́лнисѧ дѹ́ха є҆гѡ̀ и҆ во дни҄ своѧ҄ не поколеба́сѧ ѿ кнѧзе́й, и҆ не премо́же є҆гѡ̀ никто́же:
14 всѧ́ко сло́во не превзы́де є҆гѡ̀, и҆ во ѹ҆спе́нїи про҇ро́чествова тѣ́ло є҆гѡ̀:
15 и҆ въ житїѝ свое́мъ сотворѝ чѹдеса̀, и҆ во ѹ҆ме́ртвїи ди҄вна дѣла̀ є҆гѡ̀.
16 Во всѣ́хъ си́хъ не пока́ѧшасѧ лю́дїе и҆ не ѿстѹпи́ша ѿ грѣ҄хъ свои́хъ, до́ндеже плѣне́ни бы́ша ѿ землѝ своеѧ̀ и҆ расточе́ни бы́ша по все́й землѝ.
17 И҆ ѡ҆ста́сѧ люді́й ма́лѡ, и҆ кнѧ́зь въ домѹ̀ даві́довѣ.
18 Нѣ́цыи ѹ҆́бѡ ѿ ни́хъ сотвори́ша ѹ҆го́дное, нѣ́цыи же ѹ҆мно́жиша грѣхѝ.
19 Е҆зекі́а ѹ҆твердѝ гра́дъ сво́й и҆ введѐ посредѣ̀ є҆гѡ̀ во́дѹ: и҆скопа̀ желѣ́зомъ ка́мень и҆ созда̀ и҆сто́чники вода́мъ.
20 Во дне́хъ є҆гѡ̀ взы́де сеннахирі́мъ и҆ посла̀ раѱа́ка, и҆ воздви́же рѹ́кѹ свою̀ на сїѡ́на и҆ возвели́чисѧ горды́нею свое́ю.
21 Тогда̀ подвиго́шасѧ сердца̀ и҆ рѹ́цѣ и҆́хъ, и҆ поболѣ́ша ѩ҆́кѡ ражда́ющыѧ.
22 И҆ помоли́шасѧ гд҇ѹ мл҇тивомѹ, воздѣ́вше рѹ́ки своѧ҄ къ немѹ̀:
23 и҆ ст҃ы́й съ нб҃сѐ ско́рѡ ѹ҆слы́ша ѧ҆̀ и҆ и҆зба́ви ѧ҆̀ рѹко́ю и҆са́їиною:
24 поразѝ полкѝ а҆ссѷрї҄йскїѧ, и҆ сокрѹшѝ ѧ҆̀ а҆́гг҃лъ є҆гѡ̀.
25 Сотвори́ бо є҆зекі́а ѹ҆го́дное гд҇еви и҆ ѹ҆крѣпи́сѧ на пѹте́хъ даві́да ѻ҆тца̀ своегѡ̀, ѩ҆̀же заповѣ́да и҆са́їа, про҇ро́къ ве́лїй и҆ вѣ́ренъ въ видѣ́нїи свое́мъ.
26 Во дне́хъ є҆гѡ̀ воспѧти́сѧ со́лнце, и҆ приложѝ житїѧ̀ царе́ви:
27 дѹ́хомъ ве́лїимъ ви́дѣ послѣ҄днѧѧ и҆ ѹ҆тѣ́ши сѣ́тѹющыѧ въ сїѡ́нѣ:
28 да́же до вѣ́ка показа̀ бѹ҄дѹщаѧ и҆ сокровє́наѧ, пре́жде не́же прїитѝ и҆̀мъ.
Нашли в тексте ошибку? Выделите её и нажмите:
Ctrl + Enter
Книга Премудрости Иисуса, сына Сирахова, 48 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784