1 Хвали́те и҆́мѧ гд҇не, хвали́те, рабѝ гд҇а,
2 стоѧ́щїи во хра́мѣ гд҇ни, во дво́рѣхъ до́мѹ бг҃а на́шегѡ.
3 Хвали́те гд҇а, ѩ҆́кѡ бла́гъ гд҇ь: по́йте и҆́мени є҆гѡ̀, ѩ҆́кѡ добро̀:
4 ѩ҆́кѡ ї҆а́кѡва и҆збра̀ себѣ̀ гд҇ь, ї҆и҃лѧ въ достоѧ́нїе себѣ̀:
5 ѩ҆́кѡ а҆́зъ позна́хъ, ѩ҆́кѡ ве́лїй гд҇ь, и҆ гд҇ь на́шъ над̾ всѣ́ми бѡ́ги:
6 всѧ҄, є҆ли҄ка восхотѣ̀ гд҇ь, сотворѝ на нб҃сѝ и҆ на землѝ, въ морѧ́хъ и҆ во всѣ́хъ бе́зднахъ.
7 Возводѧ̀ ѡ҆́блаки ѿ послѣ́днихъ землѝ, мѡ́лнїи въ до́ждь сотворѝ, и҆зводѧ́й вѣ́тры ѿ сокро́вищъ свои́хъ.
8 И҆́же поразѝ пе́рвенцы є҆гѵ́пєтскїѧ ѿ человѣ́ка до скота̀:
9 посла̀ зна́мєнїѧ и҆ чѹдеса̀ посредѣ̀ тебє̀, є҆гѵ́пте, на фараѡ́на и҆ на всѧ҄ рабы҄ є҆гѡ̀.
10 И҆́же поразѝ ѩ҆зы́ки мнѡ́ги и҆ и҆збѝ цари҄ крѣ҄пки:
11 сиѡ́на царѧ̀ а҆морре́йска и҆ ѡ҆́га царѧ̀ васа́нска, и҆ всѧ҄ ца҄рствїѧ ханаа҄нска:
12 и҆ дадѐ зе́млю и҆́хъ достоѧ́нїе, достоѧ́нїе ї҆и҃лю лю́демъ свои҄мъ.
13 Гд҇и, и҆́мѧ твоѐ въ вѣ́къ, и҆ па́мѧть твоѧ̀ въ ро́дъ и҆ ро́дъ:
14 ѩ҆́кѡ сѹди́ти и҆́мать гд҇ь лю́демъ свои҄мъ, и҆ ѡ҆ рабѣ́хъ свои́хъ ѹ҆мо́литсѧ.
15 Ідѡли ѩ҆зы҄къ сребро̀ и҆ зла́то, дѣла̀ рѹ́къ человѣ́ческихъ:
16 ѹ҆ста̀ и҆́мѹтъ, и҆ не возглаго́лютъ: ѻ҆́чи и҆́мѹтъ, и҆ не ѹ҆́зрѧтъ:
17 ѹ҆́ши и҆́мѹтъ, и҆ не ѹ҆слы́шатъ: ниже́ бо є҆́сть дѹ́хъ во ѹ҆стѣ́хъ и҆́хъ.
18 Подо́бни и҆̀мъ да бѹ́дѹтъ творѧ́щїи ѧ҆̀ и҆ всѝ надѣ́ющїисѧ на нѧ̀.
19 До́ме ї҆и҃левъ, благослови́те гд҇а: до́ме а҆арѡ́нь, благослови́те гд҇а: до́ме леѵі́инъ, благослови́те гд҇а:
20 боѧ́щїисѧ гд҇а, благослови́те гд҇а.
21 Блг҇ве́нъ гд҇ь ѿ сїѡ́на, живы́й во ї҆ер҇ли́мѣ.
Нашли в тексте ошибку? Выделите её и нажмите:
Ctrl + Enter
Псалтирь, псалом 134. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784