1 Приклонѝ, гд҇и, ѹ҆́хо твоѐ, и҆ ѹ҆слы́ши мѧ̀: ѩ҆́кѡ ни́щъ и҆ ѹ҆бо́гъ є҆́смь а҆́зъ.
2 Сохранѝ дѹ́шѹ мою̀, ѩ҆́кѡ прпдбенъ є҆́смь: сп҃сѝ раба̀ твоего̀, бж҃е мо́й, ѹ҆пова́ющаго на тѧ̀.
3 Поми́лѹй мѧ̀, гд҇и, ѩ҆́кѡ къ тебѣ̀ воззовѹ̀ ве́сь де́нь.
4 Возвеселѝ дѹ́шѹ раба̀ твоегѡ̀: ѩ҆́кѡ къ тебѣ̀ взѧ́хъ дѹ́шѹ мою̀.
5 ѩ҆́кѡ ты̀, гд҇и, бл҃гъ и҆ кро́токъ и҆ многомл҇тивъ всѣ҄мъ призыва́ющымъ тѧ̀.
6 Внѹшѝ, гд҇и, моли́твѹ мою̀ и҆ вонмѝ гла́сѹ моле́нїѧ моегѡ̀.
7 Въ де́нь ско́рби моеѧ̀ воззва́хъ къ тебѣ̀, ѩ҆́кѡ ѹ҆слы́шалъ мѧ̀ є҆сѝ.
8 Нѣ́сть подо́бенъ тебѣ̀ въ бозѣ́хъ, гд҇и, и҆ нѣ́сть по дѣлѡ́мъ твои҄мъ.
9 Всѝ ѩ҆зы́цы, є҆ли́ки сотвори́лъ є҆сѝ, прїи́дѹтъ и҆ покло́нѧтсѧ пред̾ тобо́ю, гд҇и, и҆ просла́вѧтъ и҆́мѧ твоѐ:
10 ѩ҆́кѡ ве́лїй є҆сѝ ты̀ и҆ творѧ́й чѹдеса̀, ты̀ є҆сѝ бг҃ъ є҆ди́нъ.
11 Наста́ви мѧ̀, гд҇и, на пѹ́ть тво́й, и҆ пойдѹ̀ во и҆́стинѣ твое́й: да возвесели́тсѧ се́рдце моѐ боѧ́тисѧ и҆́мене твоегѡ̀.
12 И҆сповѣ́мсѧ тебѣ̀, гд҇и бж҃е мо́й, всѣ́мъ се́рдцемъ мои́мъ и҆ просла́влю и҆́мѧ твоѐ въ вѣ́къ:
13 ѩ҆́кѡ мл҇ть твоѧ̀ ве́лїѧ на мнѣ̀, и҆ и҆зба́вилъ є҆сѝ дѹ́шѹ мою̀ ѿ а҆́да преиспо́днѣйшагѡ.
14 Бж҃е, законопрестѹ҄пницы воста́ша на мѧ̀, и҆ со́нмъ держа́вныхъ взыска́ша дѹ́шѹ мою̀, и҆ не предложи́ша тебѐ пред̾ собо́ю.
15 И҆ ты̀, гд҇и бж҃е мо́й, ще́дрый и҆ мл҇тивый, долготерпѣли́вый и҆ многомл҇тивый и҆ и҆́стинный,
16 при́зри на мѧ̀ и҆ поми́лѹй мѧ̀: да́ждь держа́вѹ твою̀ ѻ҆́трокѹ твоемѹ̀ и҆ сп҃сѝ сы́на рабы̀ твоеѧ̀.
17 Сотворѝ со мно́ю зна́менїе во бл҃го: и҆ да ви́дѧтъ ненави́дѧщїи мѧ̀, и҆ постыдѧ́тсѧ, ѩ҆́кѡ ты̀, гд҇и, помо́глъ мѝ и҆ ѹ҆тѣ́шилъ мѧ̀ є҆сѝ.
Нашли в тексте ошибку? Выделите её и нажмите:
Ctrl + Enter
Псалтирь, псалом 85. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784