1 И҆сповѣ́дайтесѧ гд҇еви, ѩ҆́кѡ бл҃гъ: ѩ҆́кѡ въ вѣ́къ мл҇ть є҆гѡ̀.
2 И҆сповѣ́дайтесѧ бг҃ѹ богѡ́въ: ѩ҆́кѡ въ вѣ́къ мл҇ть є҆гѡ̀.
3 И҆сповѣ́дайтесѧ гд҇еви господе́й: ѩ҆́кѡ въ вѣ́къ мл҇ть є҆гѡ̀.
4 Сотво́ршемѹ чѹдеса̀ вє́лїѧ є҆ди́номѹ: ѩ҆́кѡ въ вѣ́къ мл҇ть є҆гѡ̀.
5 Сотво́ршемѹ небеса̀ ра́зѹмомъ: ѩ҆́кѡ въ вѣ́къ мл҇ть є҆гѡ̀.
6 Ѹ҆тверди́вшемѹ зе́млю на вода́хъ: ѩ҆́кѡ въ вѣ́къ мл҇ть є҆гѡ̀.
7 Сотво́ршемѹ свѣти҄ла вє́лїѧ є҆ди́номѹ: ѩ҆́кѡ въ вѣ́къ мл҇ть є҆гѡ̀:
8 со́лнце во ѡ҆́бласть днѐ: ѩ҆́кѡ въ вѣ́къ мл҇ть є҆гѡ̀:
9 лѹнѹ̀ и҆ ѕвѣ́зды во ѡ҆́бласть но́щи: ѩ҆́кѡ въ вѣ́къ мл҇ть є҆гѡ̀.
10 Порази́вшемѹ є҆гѵ́пта съ пе́рвєнцы є҆гѡ̀: ѩ҆́кѡ въ вѣ́къ мл҇ть є҆гѡ̀:
11 и҆ и҆зве́дшемѹ ї҆и҃лѧ ѿ среды̀ и҆́хъ: ѩ҆́кѡ въ вѣ́къ мл҇ть є҆гѡ̀:
12 рѹко́ю крѣ́пкою и҆ мы́шцею высо́кою: ѩ҆́кѡ въ вѣ́къ мл҇ть є҆гѡ̀.
13 Раздѣ́льшемѹ чермно́е мо́ре въ раздѣлє́нїѧ: ѩ҆́кѡ въ вѣ́къ мл҇ть є҆гѡ̀:
14 и҆ прове́дшемѹ ї҆и҃лѧ посредѣ̀ є҆гѡ̀: ѩ҆́кѡ въ вѣ́къ мл҇ть є҆гѡ̀:
15 и҆ и҆стрѧ́сшемѹ фараѡ́на и҆ си́лѹ є҆гѡ̀ въ мо́ре чермно́е: ѩ҆́кѡ въ вѣ́къ мл҇ть є҆гѡ̀.
16 Прове́дшемѹ лю́ди своѧ҄ въ пѹсты́ни: ѩ҆́кѡ въ вѣ́къ мл҇ть є҆гѡ̀.
17 Порази́вшемѹ цари҄ вє́лїѧ: ѩ҆́кѡ въ вѣ́къ мл҇ть є҆гѡ̀.
18 И҆ ѹ҆би́вшемѹ цари҄ крѣ҄пкїѧ: ѩ҆́кѡ въ вѣ́къ мл҇ть є҆гѡ̀:
19 сиѡ́на царѧ̀ а҆морре́йска: ѩ҆́кѡ въ вѣ́къ мл҇ть є҆гѡ̀:
20 и҆ ѡ҆́га царѧ̀ васа́нска: ѩ҆́кѡ въ вѣ́къ мл҇ть є҆гѡ̀.
21 И҆ да́вшемѹ зе́млю и҆́хъ достоѧ́нїе: ѩ҆́кѡ въ вѣ́къ мл҇ть є҆гѡ̀:
22 достоѧ́нїе ї҆и҃лю рабѹ̀ своемѹ̀: ѩ҆́кѡ въ вѣ́къ мл҇ть є҆гѡ̀.
23 ѩ҆́кѡ во смире́нїи на́шемъ помѧнѹ́ ны гд҇ь: ѩ҆́кѡ въ вѣ́къ мл҇ть є҆гѡ̀.
24 И҆ и҆зба́вилъ ны̀ є҆́сть ѿ врагѡ́въ на́шихъ: ѩ҆́кѡ въ вѣ́къ мл҇ть є҆гѡ̀:
25 даѧ́й пи́щѹ всѧ́кой пло́ти: ѩ҆́кѡ въ вѣ́къ мл҇ть є҆гѡ̀.
26 И҆сповѣ́дайтесѧ бг҃ѹ нб҇номѹ: ѩ҆́кѡ въ вѣ́къ мл҇ть є҆гѡ̀.
Нашли в тексте ошибку? Выделите её и нажмите:
Ctrl + Enter
Псалтирь, псалом 135. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784