1 Въ коне́цъ, ѱало́мъ дв҃дѹ,
2 Небеса̀ повѣ́даютъ сла́вѹ бж҃їю, творе́нїе же рѹкѹ̀ є҆гѡ̀ возвѣща́етъ тве́рдь.
3 Де́нь днѝ ѿрыга́етъ глаго́лъ, и҆ но́щь но́щи возвѣща́етъ ра́зѹмъ.
4 Не сѹ́ть рѣ҄чи, нижѐ словеса̀, и҆́хже не слы́шатсѧ гла́си и҆́хъ.
5 Во всю̀ зе́млю и҆зы́де вѣща́нїе и҆́хъ, и҆ въ концы҄ вселе́нныѧ глаго́лы и҆́хъ: въ со́лнцѣ положѝ селе́нїе своѐ:
6 и҆ то́й ѩ҆́кѡ жени́хъ и҆сходѧ́й ѿ черто́га своегѡ̀, возра́дѹетсѧ ѩ҆́кѡ и҆споли́нъ тещѝ пѹ́ть.
7 Ѿ кра́ѧ небесѐ и҆схо́дъ є҆гѡ̀, и҆ срѣ́тенїе є҆гѡ̀ до кра́ѧ небесѐ: и҆ нѣ́сть, и҆́же ѹ҆кры́етсѧ теплоты̀ є҆гѡ̀.
8 Зако́нъ гд҇ень непоро́ченъ, ѡ҆браща́ѧй дѹ́шы: свидѣ́телство гд҇не вѣ́рно, ѹ҆мѹдрѧ́ющее младе́нцы.
9 Ѡ҆правда҄нїѧ гд҇нѧ пра҄ва, веселѧ҄щаѧ се́рдце: за́повѣдь гд҇нѧ свѣтла̀, просвѣща́ющаѧ ѻ҆́чи.
10 Стра́хъ гд҇ень чи́стъ, пребыва́ѧй въ вѣ́къ вѣ́ка: сѹдбы҄ гд҇ни и҆́стинны, ѡ҆правда҄нны вкѹ́пѣ,
11 вожделѣ҄нны па́че зла́та и҆ ка́мене че́стна мно́га, и҆ сла́ждшѧ па́че ме́да и҆ со́та.
12 И҆́бо ра́бъ тво́й храни́тъ ѧ҆̀: внегда̀ сохрани́ти ѧ҆̀, воздаѧ́нїе мно́го.
13 Грѣхопадє́нїѧ кто̀ разѹмѣ́етъ; ѿ та́йныхъ мои́хъ ѡ҆ч҇ти мѧ̀,
14 и҆ ѿ чѹжди́хъ пощадѝ раба̀ твоего̀: а҆́ще не ѡ҆блада́ютъ мно́ю, тогда̀ непоро́ченъ бѹ́дѹ, и҆ ѡ҆чи́щѹсѧ ѿ грѣха̀ вели́ка.
15 И҆ бѹ́дѹтъ во бл҃говоле́нїе словеса̀ ѹ҆́стъ мои́хъ, и҆ поѹче́нїе се́рдца моегѡ̀ пред̾ тобо́ю вы́нѹ, гд҇и, помо́щниче мо́й и҆ и҆зба́вителю мо́й.
Нашли в тексте ошибку? Выделите её и нажмите: Ctrl + Enter

Псалтирь, псалом 18. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784

Я ХОЧУ ПОМОЧЬ

Псалтирь, псалом 18 в переводах:
Псалтирь, псалом 18, комментарии:
  1. Новой Женевской Библии
  2. Толкование Мэтью Генри
  3. Комментарии МакДональда
  4. Толковая Библия Лопухина
  5. Толкования Августина
  6. Комментарии Скоуфилда
  7. Комментарии Сперджена


2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.