1 Въ коне́цъ, ѡ҆ точи́лѣхъ, сынѡ́мъ коре́ѡвымъ, ѱало́мъ,
2 Ко́ль возлю́блєнна селє́нїѧ твоѧ҄, гд҇и си́лъ.
3 Жела́етъ и҆ скончава́етсѧ дѹша̀ моѧ̀ во дворы̀ гд҇ни: се́рдце моѐ и҆ пло́ть моѧ̀ возра́довастасѧ ѡ҆ бз҃ѣ жи́вѣ.
4 И҆́бо пти́ца ѡ҆брѣ́те себѣ̀ хра́минѹ, и҆ го́рлица гнѣздо̀ себѣ̀, и҆дѣ́же положи́тъ птенцы̀ своѧ҄, ѻ҆лтари҄ твоѧ҄, гд҇и си́лъ, цр҃ю̀ мо́й и҆ бж҃е мо́й.
5 Бл҃же́ни живѹ́щїи въ домѹ̀ твое́мъ: въ вѣ́ки вѣкѡ́въ восхва́лѧтъ тѧ̀.
6 Бл҃же́нъ мѹ́жъ, є҆мѹ́же є҆́сть застѹпле́нїе є҆гѡ̀ ѹ҆ тебє̀: восхождє́нїѧ въ се́рдцы свое́мъ положѝ,
7 во ю҆до́ль плаче́внѹю, въ мѣ́сто є҆́же положѝ {во ю҆до́ли плаче́внѣй, въ мѣ́стѣ, є҆́же положѝ}: и҆́бо блг҇ве́нїе да́стъ законополага́ѧй.
8 По́йдѹтъ ѿ си́лы въ си́лѹ: ѩ҆ви́тсѧ бг҃ъ богѡ́въ въ сїѡ́нѣ.
9 Гд҇и бж҃е си́лъ, ѹ҆слы́ши моли́твѹ мою̀, внѹшѝ, бж҃е ї҆а́кѡвль.
10 Защи́тниче на́шъ, ви́ждь, бж҃е, и҆ при́зри на лицѐ хрїста̀ твоегѡ̀.
11 ѩ҆́кѡ лѹ́чше де́нь є҆ди́нъ во дво́рѣхъ твои́хъ па́че ты́сѧщъ: и҆зво́лихъ примета́тисѧ въ домѹ̀ бг҃а моегѡ̀ па́че, не́же жи́ти мѝ въ селе́нїихъ грѣ́шничихъ.
12 ѩ҆́кѡ мл҇ть и҆ и҆́стинѹ лю́битъ гд҇ь, бг҃ъ блгдть и҆ сла́вѹ да́стъ: гд҇ь не лиши́тъ бл҃ги́хъ ходѧ́щихъ неѕло́бїемъ.
13 Гд҇и бж҃е си́лъ, бл҃же́нъ человѣ́къ ѹ҆пова́ѧй на тѧ̀.
Нашли в тексте ошибку? Выделите её и нажмите:
Ctrl + Enter
Псалтирь, псалом 83. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784