1 Въ коне́цъ, въ ра́зѹмъ сынѡ́въ коре́овыхъ, ѱало́мъ дв҃дѹ,
2 И҆́мже ѡ҆́бразомъ жела́етъ є҆ле́нь на и҆сто́чники водны҄ѧ, си́це жела́етъ дѹша̀ моѧ̀ къ тебѣ̀, бж҃е.
3 Возжада̀ дѹша̀ моѧ̀ къ бг҃ѹ крѣ́пкомѹ, живо́мѹ: когда̀ прїидѹ̀ и҆ ѩ҆влю́сѧ лицѹ̀ бж҃їю;
4 Бы́ша сле́зы моѧ҄ мнѣ̀ хлѣ́бъ де́нь и҆ но́щь, внегда̀ глаго́латисѧ мнѣ̀ на всѧ́къ де́нь: гдѣ̀ є҆́сть бг҃ъ тво́й;
5 Сїѧ҄ помѧнѹ́хъ, и҆ и҆злїѧ́хъ на мѧ̀ дѹ́шѹ мою̀: ѩ҆́кѡ пройдѹ̀ въ мѣ́сто селе́нїѧ ди́вна, да́же до до́мѹ бж҃їѧ, во гла́сѣ ра́дованїѧ и҆ и҆сповѣ́данїѧ, шѹ́ма пра́зднѹющагѡ.
6 Вскѹ́ю приско́рбна є҆сѝ, дѹшѐ моѧ̀; и҆ вскѹ́ю смѹща́еши мѧ̀; ѹ҆пова́й на бг҃а, ѩ҆́кѡ и҆сповѣ́мсѧ є҆мѹ̀, сп҃се́нїе лица̀ моегѡ̀ и҆ бг҃ъ мо́й.
7 Ко мнѣ̀ самомѹ̀ дѹша̀ моѧ̀ смѧте́сѧ: сегѡ̀ ра́ди помѧнѹ́хъ тѧ̀ ѿ землѝ ї҆ѻрда́нски и҆ є҆рмѡнїи́мски, ѿ горы̀ ма́лыѧ.
8 Бе́здна бе́зднѹ призыва́етъ во гла́сѣ хлѧ́бїй твои́хъ: всѧ҄ высѡты҄ твоѧ҄ и҆ вѡ́лны твоѧ҄ на мнѣ̀ преидо́ша.
9 Въ де́нь заповѣ́сть гд҇ь мл҇ть свою̀, и҆ но́щїю пѣ́снь є҆гѡ̀ ѿ менє̀ {ѹ҆ менє̀}, моли́тва бг҃ѹ живота̀ моегѡ̀.
10 Рекѹ̀ бг҃ѹ: застѹ́пникъ мо́й є҆сѝ, почто̀ мѧ̀ забы́лъ є҆сѝ; и҆ вскѹ́ю сѣ́тѹѧ хождѹ̀, внегда̀ ѡ҆скорблѧ́етъ вра́гъ;
11 Внегда̀ сокрѹша́тисѧ косте́мъ мои҄мъ, поноша́хѹ мѝ вразѝ моѝ, внегда̀ глаго́лати и҆̀мъ мнѣ̀ на всѧ́къ де́нь: гдѣ̀ є҆́сть бг҃ъ тво́й;
12 Вскѹ́ю приско́рбна є҆сѝ, дѹшѐ моѧ̀; и҆ вскѹ́ю смѹща́еши мѧ̀; ѹ҆пова́й на бг҃а, ѩ҆́кѡ и҆сповѣ́мсѧ є҆мѹ̀, сп҃се́нїе лица̀ моегѡ̀ и҆ бг҃ъ мо́й.
Нашли в тексте ошибку? Выделите её и нажмите:
Ctrl + Enter
Псалтирь, псалом 41. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784